உண்மையான சிவசேனா கட்சி யாருக்கு சொந்தம் என்பது குறித்து உடனடியாக எந்த முடிவும் எடுக்கக் கூடாது என, இந்தியத் தலைமை தேர்தல் ஆணையத்துக்கு உச்ச நீதிமன்றம் தடை விதிக்க மறுத்து விட்டது.
மகாராஷ்டிர மாநிலத்தில், பால் தாக்கரே உருவாக்கிய சிவசேனா கட்சிக்கு, அவரது மகனும், முன்னாள் முதலமைச்சருமான உத்தவ் தாக்கரே, முதலமைச்சர் ஏக்நாத் ஷிண்டே ஆகியோர் சொந்தம் கொண்டாடி வருகின்றனர். இதில் ‘ எங்களைத் தான் உண்மையான சிவசேனா என அறிவிக்க வேண்டும்’ என, ஏக்நாத் ஷிண்டே தரப்பு, இந்தியத் தலைமை தேர்தல் ஆணையத்தில் சில ஆவணங்களை தாக்கல் செய்து மனு அளித்தது.
இந்நிலையில், உத்தவ் தாக்கரே தரப்பு உச்ச நீதிமன்றத்தில் தாக்கல் செய்த மனுவில் கூறி இருந்ததாவது:
சிவசேனாவின் அதிருப்தி எம்.எல்.ஏ.,க்களை தகுதி நீக்கம் செய்வது தொடர்பான மனு, நீதிமன்றத்தில் விசாரணையில் உள்ளது. எனவே, அதில் உத்தரவு வரும் வரை, சிவசேனா யாருக்கு சொந்தம் என்பது குறித்து முடிவெடுக்க தேர்தல் ஆணையத்துக்கு தடை விதிக்க வேண்டும் என மனுவில் கூறப்பட்டிருந்தது.
இந்த மனுவை அப்போதைய தலைமை நீதிபதி ரமணா தலைமையிலான அமர்வு தேர்தல் ஆணையம் முடிவு எடுக்க தடை விதித்தது. மேலும், உத்தவ் தாக்கரே தரப்பு ஆவணங்களை சமர்ப்பிக்க உத்தரவிட்டது.
பின் இந்த வழக்கு ஐந்து நீதிபதிகள் கொண்ட அரசியல் சாசன அமர்வுக்கு மாற்றப்பட்டது.
இந்நிலையில், உச்ச நீதிமன்றத்தில் இன்று நடந்த விசாரணையில், மொத்தம் 55 சிவசேனா எம்.எல்.ஏ.க்களில் ஷிண்டே தரப்பிற்கு 40 எம்.எல்.ஏ.க்கள் ஆதரவு இருப்பதால் தேர்தல் ஆணையத்திற்கு தடை விதிக்க உச்ச நீதிமன்றம் மறுத்து விட்டது. இது, உத்தவ் தாக்கரே தரப்பிற்கு பெரும் பின்னடைவை ஏற்படுத்தி உள்ளது. இந்த வழக்கு விசாரணையை உச்ச நீதிமன்றம் நேரலை செய்தது குறிப்பிடத்தக்கது.