வெளிமாவட்டங்கள் மற்றும் வெளி மாநிலங்களைச் சேர்ந்த லட்சக்கணக்கானோர் பணிநிமித்தமாக தலைநகர் சென்னையிலும், கோவை, திருச்சி போன்ற இரண்டாம் நிலை நகரங்களிலும் வசித்து வருகின்றனர்.
இவர்களில் பெரும்பாலும் தீபாவளி, பொங்கல், ஆயுத பூஜை போன்ற பண்டிகை நாட்களிலும், தொடர் வார விடுமுறை நாட்களிலும் சொந்த ஊருக்கு செல்வதை வழக்கமாக கொண்டுள்ளனர். இதன் காரணமாக, பண்டிகை மற்றும் தொடர் விடுமுறை நாட்களில் சென்னை உள்ளிட்ட பெருநகரங்களில் ரயில், பேருந்துகளில் கூட்டம் நிரம்பி வழிவதும் வழக்கமாக உள்ளது.
பயணத்தை கடைசி நேரத்தில் திட்டமிடுபவர்கள், அரசுப் பேருந்தில் இடம் கிடைக்காதவர்களின் கடைசி வாய்ப்பாக தனியார் ஆம்னி பேருந்துகள் உள்ளன. பண்டிகை நாட்களில் குவியும் கட்டுக்கடங்காத பயணிகள் கூட்டத்தை பயன்படுத்தி தனியார் ஆம்னி பேருந்துகள் கட்டண கொள்ளை அடிப்பது தொடர் நிகழ்வாக இருந்து வருகிறது. தற்போதுகூட ஆயுத பூஜையை முன்னிட்டு சென்னையில் இருந்து நெல்லைக்கு 2500 முதல் 4000 ரூபாய் வரை கட்டணம் நிர்ணயிக்கப்பட்டுள்ளது.
இதேபோன்று சென்னை டூ கோவைக்கு 3,200 வரை பயண கட்டணம் வசூலிக்கப்பட்டு வருகிறது. இது வழக்கமான கட்டணத்தைவிட 3 மடங்கு, 4 மடங்கு அதிகம் என்றாலும், பண்டிக்கைக்கு ஊருக்கு சென்றாகவே வேண்டும் என்பதால் தங்களுக்கு வேறு வழியில்லை தெரியவில்லை என்று அழாத குறையாக கூறுகின்றனர் பயணிகள்.
ஆம்னி பேருந்துகள் அதிக கட்டணம் வசூலிப்பது குறித்து புகார் அளித்தால் உரிய நடவடிக்கை எடுக்கப்படும் என்று அரசு சொன்னாலும், அந்த நடவடிக்கை பெயரளவிலேயே இருப்பதாகவம், கட்டண கொள்ளை தொடர்ந்து கொண்டிருப்பதாகவும் பயணிகள் வேதனை தெரிவிக்கின்றனர்.
பயணிகளின் இந்த வேதனையை கருத்தி்ல் கொண்டு, பயணக் கட்டணம் தொடர்பாக ஆம்னி பேருந்து உரிமையாளர்களுடன், தமிழக போக்குவரத்துத் துறை அமைச்சர் எஸ். எஸ்.சிவசங்கர் பேச்சுவார்த்தை நடத்தி உள்ளார். இதன் பயனாக ஆம்னி பேருந்துகளின் பயண கட்டணம் குறைக்கப்பட உள்ளதாகவும், புதிய பயண கட்டண பட்டியல் வெகுவிரைவில் வெளியிடப்படும் என்று ஆம்னி பேருந்து சங்கம் தெரிவித்துள்ளது.
கட்டணம் குறைக்கப்படுகிறதோ, இல்லையா நிர்ணயிக்கப்பட்ட கட்டணத்தைவிட அதிகமாக வசூலித்து தங்களிடம் பகல் கொள்ளை அடிககாமல் இருந்தால் சரி என்பதுதான் பயணிகளின் மைண்ட் வாய்ஸாக உள்ளது.