தமிழகத்தில் வரும் அக்டோபர் 2ஆம் தேதி காந்தி ஜெயந்தி நாளில் ஆர்.எஸ்.எஸ் ஊர்வலம் நடத்த அனுமதி கோரப்பட்டிருந்தது. ஆனால் தமிழக அரசு எந்தவொரு உத்தரவும் பிறப்பிக்காத நிலையில் சென்னை உயர் நீதிமன்றத்தை ஆர்.எஸ்.எஸ் நாடியது. அப்போது நிபந்தனைகளுடன் அனுமதி அளிக்க பரிசீலிக்க வேண்டும் என்று தமிழக அரசுக்கு உத்தரவு பிறப்பிக்கப்பட்டது.
இந்த சூழலில் தான் பி.எஃப்.ஐ அமைப்பு மீதான ரெய்டு நடவடிக்கைகள், கைது, வழக்குப்பதிவு சம்பவங்கள் நடந்தன. உடனே ஆர்.எஸ்.எஸ், பாஜகவினரை குறிவைத்து பல்வேறு இடங்களில் பெட்ரோல் குண்டுகள் வீசப்பட்டன. இதன் தொடர்ச்சியாக 5 ஆண்டுகளுக்கு பி.எஃப்.ஐ மற்றும் அதனுடன் தொடர்புடைய 8 அமைப்புகளுக்கு தடை விதித்து மத்திய அரசு உத்தரவிட்டது.
இதனால் தமிழகம் பதற்றமான சூழலில் காணப்பட்டது. எனவே சட்டம், ஒழுங்கு பிரச்சினையை காரணம் காட்டி ஆர்.எஸ்.எஸ் ஊர்வலத்திற்கு தமிழக போலீசார் அனுமதி மறுத்துவிட்டனர். மேலும் விடுதலை சிறுத்தைகள் கட்சி ஏற்பாடு செய்திருந்த அனைத்து கட்சிகளும் பங்கேற்கும் மத நல்லிணக்கப் பேரணிக்கும் அனுமதி இல்லை என்று அறிவித்துவிட்டது.
தமிழக அரசின் உத்தரவை எதிர்த்து மீண்டும் உயர் நீதிமன்றத்திற்கு சென்றது ஆர்.எஸ்.எஸ். அதேசமயம் ஆர்.எஸ்.எஸ் ஊர்வலத்திற்கு அனுமதி அளித்த உத்தரவை மறுபரிசீலனை செய்ய வேண்டும் என்று தமிழக காவல்துறை சார்பில் சீராய்வு மனு தாக்கல் செய்யப்பட்டது. ஆர்.எஸ்.எஸ் தொடர்ந்த வழக்கை இன்று விசாரித்த உயர் நீதிமன்ற நீதிபதிகள்,
அக்டோபர் 2ஆம் தேதிக்கு பதிலாக நவம்பர் 6ஆம் தேதி ஆர்.எஸ்.எஸ் ஊர்வலம் நடத்த அனுமதி அளிக்க போலீசாருக்கு உத்தரவு பிறப்பித்தனர். இந்த தேதியில் ஆர்.எஸ்.எஸ் ஊர்வலத்திற்கு அனுமதி மறுத்தால் காவல்துறையானது நீதிமன்ற அவமதிப்பு நடவடிக்கையை எதிர்கொள்ள நேரிடும் என்று உயர் நீதிமன்றம் உத்தரவிட்டுள்ளது. இதற்கிடையில் ஆர்.எஸ்.எஸ் தரப்பு தொடர்ந்த நீதிமன்ற அவமதிப்பு வழக்கை அக்டோபர் 31ஆம் தேதிக்கு தள்ளி வைத்தது.