இந்தியாவில் கடந்த ஜூலை மாதம் 26ஆம் தேதி 5ஜி அலைக்கற்றைக்கான ஏலம் தொடங்கியது. சுமார் 7 நாட்கள் நடைபெற்ற ஏலம் ஆகஸ்ட் 1ஆம் தேதியுடன் முடிவடைந்தது. ஜியோ, ஏர்டெல், வோடஃபோன் ஐடியா, அதானி டேட்டா நெட்வொர்க்ஸ் ஆகிய நிறுவனங்கள் இந்த ஏலத்தில் பங்கேற்றன. மொத்தம் 72,000 மெகாஹெர்ட்ஸ் அலைக்கற்றை ஏலத்துக்கு விடப்பட்ட நிலையில் 51,236 மெகாஹெர்ட்ஸ் அளவில் ஏலம் போனது.
மொத்தமாக ரூ.1.5 லட்சம் கோடிக்கு 5ஜி அலைக்கற்றை ஏலம் விடப்பட்டுள்ளது. அதிகபட்சமாக ஜியோ நிறுவனம் ரூ.88,078 கோடிக்கு ஏலம் எடுத்தது. ஏர்டெல் ரூ.43,084 கோடிக்கும், வோடஃபோன் ஐடியா ரூ.18,799 கோடிக்கும், அதானி டேட்டா நெட்வொர்க்ஸ் ரூ.212 கோடிக்கும் ஏலம் எடுத்துள்ளன.
இந்த நிலையில், இந்தியாவில் 5ஜி சேவையை பிரதமர் மோடி இன்று தொடங்கி வைத்துள்ளார். மத்திய தொலைத்தொடர்புத் துறை மற்றும் இந்திய செல்லுலர் ஆப்ரேட்டர்கள் சங்கம் இணைந்து நடத்தும் ‘இந்திய மொபைல் காங்கிரஸ்’ மாநாடு இன்று டெல்லியில் தொடங்கியுள்ளது. அக்டோபர் 4ஆம் தேதி வரை நடைபெறும் இந்த மாநாட்டை தொடங்கி வைத்த பிரதமர் மோடி, இந்தியாவில் 5ஜி சேவையையும் தொடங்கி வைத்தார்.
“முதற்கட்டமாக குறிப்பிட்ட சில நகரங்களில் மட்டும் 5ஜி சேவை அறிமுகம் செய்யப்படுகிறது. அடுத்தடுத்த ஆண்டுகளில் நாடு முழுவதும் 5ஜி சேவை கொண்டு சேர்க்கப்படும்.” என மத்திய தொலைத் தொடர்புத் துறை அமைச்சகம் வெளியிட்ட அறிவிப்பில் தெரிவிக்கப்பட்டுள்ளது.
அதன்படி, முதற்கட்டமாக இந்தியாவின் 13 நகரங்களில் 5ஜி சேவை பயன்பாட்டுக்கு வரவுள்ளது. அகமதாபாத், சண்டிகர், சென்னை, டெல்லி, காந்திநகர், குருகிராம், ஹைதராபாத், ஜாம்நகர், கொல்கத்தா, லக்னோ, மும்பை, புனே ஆகிய நகரங்களில் 5ஜி சேவை முதற்கட்டமாக பயன்பாட்டுக்கு வரவுள்ளது. இந்தியாவின் மற்ற நகரங்கள் மற்றும் கிராமங்களில் 5ஜி சேவையானது அடுத்தடுத்த மாதங்களில் பயன்பாட்டுக்கு வரும். இரண்டு அல்லது மூன்று ஆண்டுகளுக்குள் இந்தியா முழுவதும் 5ஜி சேவை பயன்பாட்டுக்கு வந்துவிடும் என எதிர்பார்க்கப்படுகிறது.
செல்போன் நெட்வொர்க்கின் 4ஜியை விட பத்து மடங்கு வேகமாக இருக்கும் என்று கூறப்படும் 5ஜியானது இந்தியாவின் தொழில்நுட்பக் கட்டமைப்பில் புதிய புரட்சியை ஏற்படுத்தும் என தெரிகிறது.