உத்தரகண்ட் மாநிலத்தில் கர்வால் இமயமலையின் கங்கோத்ரி மலைத்தொடர் திரவுபதி தண்டா-2 உச்சியில் மலையேறும் பயிற்சியில் ஈடுபட்டு இருந்த தனியார் மலையேறும் நிறுவனத்தை சேர்ந்த 29 பேர் இன்று திடீரென பனிச்சரிவில் சிக்கினர்.
இதுகுறித்து தகவல் அறிந்து மாவட்ட நிர்வாகம் பனிச்சரிவில் சிக்கியவர்களை மீட்க அதிரடியாக களம் இறங்கியது. மாவட்ட நிர்வாகத்துடன் தேசிய மற்றும் மாநில பேரிடர் மீட்பு படையும், ராணுவ வீரர்களும் ஈடுபடுத்தப்பட்டுள்ளனர்.
இவர்களுக்கு உதவியாக, இந்திய விமான படையின் 2 ஹெலிகாப்டர்கள் தேடுதல் பணியில் ஈடுபடுத்தப்பட்டுள்ளன. இதுவரையில், 8 பேர் மீட்கப்பட்ட நிலையில் 21 பேரை தேடும் பணி தீவிரமாக நடைபெற்று வருவதாக மாவட்ட நிர்வாகம் தெரிவித்துள்ளது.
மலையேற்ற வீரர்களை மீட்க தேவையான அனைத்து உதவிகளை மத்திய அரசு தரப்பில் செய்து தரப்படும் என மத்திய பாதுகாப்புத்துறை அமைச்சர் ராஜ்நாத் சிங் அறிவித்துள்ளார்.
இந்த நிலையில் பனிச்சரிவில் சிக்கியவர்களில் 10 பேர் உயிரிழந்துவிட்டதாக தற்போது தகவல் வெளியாகி இருக்கிறது. முதல்வர் புஷ்கர் சிங் தாமி மீட்புப்பணிகள் குறித்து அதிகாரிகளிடம் விசாரித்துள்ளார். இந்த சம்பவம் உத்தரகண்ட் மாநிலத்தில் பெரும் சோகத்தை ஏற்படுத்தி உள்ளது.