கரூர் நெடுஞ்சாலைத்துறை அதிகாரிகள் சாலை போடாமலேயே ரூபாய் 5 கோடி பணத்தை சங்கர ஆனந்த இன்ஃப்ரா என்கிற ஒப்பந்ததாரருக்கு பட்டுவாடா செய்து இருப்பதாக, அறப்போர் இயக்கம் குற்றம்சாட்டி உள்ளது.
இதுதொடர்பாக அறப்போர் இயக்கம் சமீபத்தில் வெளியிட்ட அறிக்கையில், ‘கரூர் நெடுஞ்சாலை துறை அதிகாரிகள் சாலை போடாமலேயே, ரூ 5 கோடி பணத்தை சங்கர் ஆனந்த் இன்ஃப்ரா என்ற ஒப்பந்ததாரருக்கு மார்ச் 2022ம் தேதி பட்டுவாடா செய்துள்ளது.
இதன் மீது FIR பதிவு செய்து நடவடிக்கை எடுக்க வேண்டும் என அறப்போர் இயக்கம் லஞ்ச ஒழிப்புத் துறையில் ஏப்ரல் 20ம் தேதி முக்கிய ஆதாரங்களுடன் புகார் அளித்துள்ளது.
6 மாதங்கள் ஆகியும் இதுவரை FIR கூட பதிவு செய்யப்படவில்லை. அறப்போர் இயக்கம் தகவல் அறியும் உரிமை சட்டம் மூலமாக மேலும், பல ஆதாரங்களையும் திரட்டி உள்ளது.
மேலும், நவம்பர் 2021 முதல் மார்ச் 2022 வரையில் போடப்பட்ட கரூர் கட்டுமானம் மற்றும் பராமரிப்பு டெண்டரில், 163 கோடியில் 110 கோடி ரூபாய் டெண்டர் சங்கர் ஆனந்த் இன்ஃப்ராவுக்கு மட்டும் வழங்கப்பட்டுள்ளது.
இதன் ஆதாரங்களையும் லஞ்ச ஒழிப்புத்துறையில் சமர்ப்பித்துள்ளோம். அதாவது 68 % டெண்டர்கள் ஒருவருக்கு போய் இருக்கிறது. அந்த ஒப்பந்ததாரர்தான் இந்த ஊழலில் ஈடுபட்டவர்.
எனவே, உடனே லஞ்ச ஒழிப்பு துறை FIR பதிவு செய்து நடவடிக்கை எடுக்க வேண்டும்’ என்று, அறப்போர் இயக்கம் வலியுறுத்தி வெளியிட்ட அறிக்கை, தமிழகம் முழுவதும் பெரும் பரபரப்பை ஏற்படுத்தி இருந்தது.
இந்நிலையில் அம்மா மக்கள் முன்னேற்ற கழக பொதுச்செயலாளர் டி.டி.வி தினகரன் வெளியிட்டுள்ள டிவிட்டர் பதிவு தமிழ்நாடு அரசு மற்றும் திமுக வட்டாரத்தில் பெரும் அதிர்வலைகளை ஏற்படுத்தி உள்ளது.
அதில், ‘கரூரில் சாலை போடாமலேயே திமுக ஆட்சியில் கோடிக்கணக்கில் பணம் கையாடல் செய்யப்பட்டதாக வெளியாகியிருக்கும் புதிய ஆதாரங்கள் குறித்து முதல்வர் ஸ்டாலின், நெடுஞ்சாலைத்துறை அமைச்சர் ஆகியோர் உரிய விளக்கம் அளிப்பார்களா?
இந்த முறைகேட்டிற்கு காரணமானவர்கள் மீது நடவடிக்கை எடுக்காமல் அவர்களை காப்பாற்ற முயற்சிப்பதாக வெளியாகியிருக்கும் செய்திகள் இது ஒரு கூட்டுக் கொள்ளையோ? என்கிற சந்தேகத்தை மக்களிடையே ஏற்படுத்தி உள்ளது.
அதுமட்டுமில்லாமல், இந்த முறைகேட்டில் ஈடுபட்ட நிறுவனத்திற்கே 100 கோடி ரூபாய்க்கு மேலாக டெண்டர்கள் கொடுக்கப்பட்டு இருப்பது, திமுக ஆட்சியில் எந்த அளவிற்கு ஊழல் மலிந்து கிடக்கிறது? என்பதற்கு சாட்சியாக உள்ளது.
‘சர்க்காரியா புகழ்’ திமுகவினர் கரூரில் சாலை போடாமலேயே மக்களுடைய பணத்தை சுரண்டியதை போன்று, இன்னும் என்னென்ன…திருவிளையாடல்களை அரங்கேற்றுவார்களோ? என, சற்று காட்டமாகவே விமர்சனம் செய்துள்ளார்.
கரூர் நெடுஞ்சாலைத்துறையில் ஊழல் நடந்து உள்ளதாக கூறப்படும் தகவல்களை வைத்து டிடிவி தினகரன் கேள்விகளால் தமிழக முதல்வர் மு.க.ஸ்டாலினை மடக்கி போட்டுள்ளது அரசியல் மற்றும் வட்டாரத்தில் பெரும் அதிர்வலைகளை ஏற்படுத்தும் என எதிர்பார்க்கப்படுகிறது.