மத்திய அரசின் சுகாதாரத் திட்டங்களை தமிழக அரசு சிறப்பாக செயல்படுத்தி வருவதாக மத்திய சுகாதாரம் மற்றும் குடும்ப நலத்துறை இணை அமைச்சர் பாரதி பிரவீன் பவார் தெரிவித்துள்ளார். தருமபுரி மாவட்டத்தில் இரண்டு நாட்கள் பல்வேறு நிகழ்ச்சிகளில் பங்கேற்பதற்காக மத்திய சுகாதாரம் மற்றும் குடும்ப நலத்துறை இணை அமைச்சர் பாரதி பிரவீன் பவார் வருகை புரிந்துள்ளார்.
முதல் நாளான நேற்று, அமைச்சர் தலைமையில் சுகாதாரத்துறை அலுவலர்கள் பங்கேற்ற ஆய்வுக் கூட்டம் தருமபுரி மாவட்ட ஆட்சித்தலைவர் அலுவலகத்தில் நடைபெற்றது. அக்கூட்டத்தில் பேசிய அமைச்சர், “தேசிய சுகாதார இயக்கம், பள்ளி மாணவர்கள் மருத்துவ பரிசோதனை திட்டம் ( Rashtriya Bal Swasthya Karyakram), நடமாடும் மருத்துவ சேவைகள், ஜனனி சுரக்ஷா யோஜனா, பிரதம மந்திரி தேசிய இரத்த சுத்திகரிப்பு திட்டம் (Pradhan Mantri National Dialysis Programme), தேசிய காசநோய் ஒழிப்பு திட்டம் உள்ளிட்ட திட்டங்கள் மத்திய அரசு நிதியில் மாநிலங்களில் சிறப்பாக செயல்படுத்தப்பட்டு வருகிறது.” என்று பாராட்டு தெரிவித்தார்.
காசநோயால் பாதிக்கப்பட்டுள்ள நோயாளிகளை ஒவ்வொரு மாவட்ட அலுவலர்கள் மற்றும் மக்கள் பிரதிநிதிகள் ஒவ்வொருவரும் தலா 3 பேரை தத்தெடுத்து அவர்களுக்கு தேவையான ஊட்டச்சத்து மிக்க உணவுகளை வழங்க வழிவகை செய்ய வேண்டும். இவ்வாறு செய்யும் பட்சத்தில் முழுமையாக காச நோயை நம்மால் ஒழிக்க முடியும் என்று மத்திய இணையமைச்சர் தெரிவித்தார்.
தருமபுரி மாவட்ட அரசு மருத்துவமனைகளில் அதிக அளவில் பிரசவங்கள் சிறந்த முறையில் மேற்கொள்ளப்பட்டு வருவதாக அவர் பாராட்டினார். மருத்துவர்களையும், மருத்துவப் பணியாளர்களையும் பாராட்டிய அமைச்சர், அனைவரும் இணைந்து கொரோனா தடுப்பூசி செலுத்துவதில் சாதனை படைத்துள்ளதாக தெரிவித்தார்.
அதன்பின்னர், தருமபுரி அரசு மருத்துவக் கல்லூரி மருத்துவமனையில் ஆய்வு செய்த அமைச்சர், அங்கு சிகிச்சை பெற்று வருபவர்களிடம் நலம் விசாரித்தார். இந்த நிகழ்ச்சிகளில் மாவட்ட ஆட்சித்தலைவர் கி.சாந்தி, அரசு மருத்துவக் கல்லூரி முதல்வர் அமுதவல்லி, சுகாதாரப் பணிகள் துணை இயக்குனர் சவுண்டம்மாள் உள்ளிட்ட பல்துறை அதிகாரிகள் பங்கேற்றனர்.