கேரள மாநிலம் எர்ணாகுளம் மாவட்டம் கடவந்திரா பகுதியை சேர்ந்த பத்மம் (52). காலடியைச் சேர்ந்த ரோசிலி (50). இவர்கள் இருவரும் கடந்த 26ஆம் தேதி முதல் காணவில்லை என்று கூறப்படுகிறது. இதுதொடர்பாக அளிக்கப்பட்ட புகாரின் பேரில் போலீசார் தீவிரமாக தேடி வந்தனர். இந்நிலையில் பல திடுக்கிடும் தகவல்கள் தற்போது வெளிவந்துள்ளன. திருவல்லாவைச் சேர்ந்த பகவந்த் சிங் என்ற மந்திரவாதி அதிக பணம் கொழிக்க வேண்டும் என்பதற்காக அந்த இரண்டு பெண்களையும் கடத்திச் சென்று நரபலி கொடுத்தது தெரியவந்துள்ளது.
இந்த விஷயம் கேரள ஊடகங்களில் வெளியாகி பெரும் அதிர்வலைகளை ஏற்படுத்தியிருக்கிறது. நரபலி கொடுப்பதற்காக பகவந்த் சிங், தனது மனைவி லைலா மற்றும் முகமது ஷபி ஆகியோருடன் சேர்ந்து திட்டமிட்டிருக்கிறார். சமூக வலைதளங்கள் மூலம் இரண்டு பெண்களுடன் முகமது ஷபி நட்பாக பழகி வந்துள்ளார். இதையடுத்து அவர்களை கடத்திச் செல்வதற்கும் உதவியுள்ளார்.
இரண்டு பெண்களையும் நரபலி கொடுத்து பூஜை செய்த பின்னர், உடல்களைத் துண்டு துண்டாக வெட்டி திருவல்லா அருகே உள்ள இடத்தில் புதைத்துள்ளனர். இந்த சம்பவம் தொடர்பாக பகவந்த் சிங், அவரது மனைவி லைலா, முகமது ஷபி ஆகியோரை போலீஸார் கைது செய்துள்ளனர். இதில் பத்மம் என்னும் பெண் தமிழ்நாட்டின் தர்மபுரி பகுதியில் வசித்து வந்ததாக தகவல் வெளியாகியுள்ளது.
தற்போது கைது செய்யப்பட்ட நபர்களிடம் அடுத்தகட்ட விசாரணையை தீவிரப்படுத்தியுள்ளனர். நடந்த சம்பவம் தொடர்பாக பேசிய காவல்துறை ஆணையாளர் நாகராஜு, பகவந்த் சிங் குடும்பத்திற்கு நிதி நெருக்கடி ஏற்பட்டுள்ளது. இதனை சமாளிப்பதற்காக நரபலி பூஜைக்கு ஏற்பாடு செய்துள்ளனர். இதனை அவர்கள் இருவருமே ஒப்புக் கொண்டனர். நரபலியில் இரண்டு பெண்களும் மிகவும் கொடூரமான முறையில் கொல்லப்பட்டுள்ளனர்.
அவர்களது உடல்களை கடவுளுக்கு படைத்து பணம் தருமாறு வேண்டியிருக்கின்றனர். கைது செய்யப்பட்ட தம்பதியினரின் வீட்டிற்கு அருகில் தான் நரபலி செய்யப்பட்ட நபர்களின் உடல்கள் புதைக்கப்பட்டுள்ளன. அந்த உடல்களை வெளியே எடுக்கும் பணிகள் முடுக்கி விடப்பட்டுள்ளன. இது சாதாரணமாக வழக்கு அல்ல. நிச்சயம் சிக்கலான வழக்காக தான் இருக்கும்.
இதன் பின்னணியில் வேறு காரணங்களும், நபர்களும் இருக்கக்கூடும் என்று தெரிவித்தார். இரண்டு பேர் நரபலி செய்யப்பட்ட விஷயத்தில் கேரள முதல்வர் பினராயி விஜயன் அதிர்ச்சி தெரிவித்துள்ளார். கேரளாவில் இப்படியொரு கொலை நடைபெறும் என்று நினைத்துக் கூட பார்க்கவில்லை. குற்றவாளிகள் அனைவரும் சட்டத்தின் பிடியில் கொண்டு வரப்படுவர். கடும் தண்டனை வழங்கப்படும் என்று குறிப்பிட்டுள்ளார்.