மகாராஷ்டிர மாநிலத்தில் முதல்வர் ஏக்நாத் ஷிண்டே தலைமையிலான சிவசேனா – பாஜக கூட்டணி ஆட்சி நடைபெற்று கொண்டிருக்கிறது. முன்னதாக சிவசேனா –
காங்கிரஸ்
– தேசியவாத காங்கிரஸ் கூட்டணி ஆட்சி நடைபெற்று வந்த நிலையில் திடீர் திருப்பம் ஏற்பட்டது. சிவசேனா இரண்டாக உடைய ஷிண்டே தலைமையிலான அணியினர் பாஜக உடன் கைகோர்த்து ஆட்சியை பிடித்தனர்.
இதன் பின்னணியில் பாஜகவின் அரசியல் கணக்குகள் இருப்பதை மறுக்க முடியாது என்கின்றனர் அரசியல் பார்வையாளர்கள். அடுத்தகட்டமாக உள்ளாட்சிகளில் தங்கள் பலத்தை வலுப்படுத்த பாஜக மும்முரம் காட்டி வருகிறது. இந்நிலையில் தான் நாக்பூர் பஞ்சாயத்து தேர்தல் முடிவுகள் பெரும் அதிர்ச்சியை அளித்துள்ளது. இந்த மாவட்டத்தில் மொத்தம் 13 தாலுக்காக்கள் இருக்கின்றன.
இதில் காங்கிரஸ் 9, தேசியவாத காங்கிரஸ் 3, ஏக்நாத் ஷிண்டே தலைமையிலான சிவசேனா 1 இடத்திலும் வெற்றி பெற்றுள்ளது. பாஜக ஒரு இடத்தில் கூட வெற்றி பெறவில்லை. ஜில்லா பஞ்சாயத்து தலைவர், துணைத் தலைவர் பதவிக்கான தேர்தலில் எப்படியாவது வெற்றி பெற்றுவிட வேண்டும் என்று உள்ளூரில் இருந்த காங்கிரஸ் தலைவர்கள், தேசியவாத காங்கிரஸ் தலைவர்கள் மூலம் பாஜக காய்களை நகர்த்தி வந்தது.
ஆனால் அக்கட்சி போட்டு வைத்த அரசியல் கணக்குகள் சுக்கு நூறானது. நாக்பூர் மாவட்டத்தில் ஒரு இடத்தில் கூட தலைவர் பதவியை கைப்பற்ற முடியவில்லை. இரண்டு இடங்களில் மட்டும் துணைத் தலைவர் பதவி கிடைத்திருக்கிறது. அதாவது, நாக்பூர் கிராமின், கம்தி, சவனேர், கலமேஷ்வர் பர்ஷிவானி, உம்ரேட், மவுடா, குஹி, பிவாபூர் உள்ளிட்ட பஞ்சாயத்துகளை காங்கிரஸ் கைப்பற்றியது. நார்கேட், கடோ, ஹிங்கனா ஆகிய பஞ்சாயத்துகளை தேசியவாத காங்கிரஸும்,
ராம்டேக் பஞ்சாயத்தில் ஷிண்டே தலைமையிலான சிவசேனாவும் வெற்றி பெற்றன. ராம்டெக் மற்றும் மவுடா தாலுக்காக்களில் மட்டும் துணைத் தலைவர் பதவிகளை பாஜக வென்றுள்ளது. குறிப்பாக மகாராஷ்டிர துணை முதல்வர் தேவேந்திர பட்னாவிஸ் மற்றும் பாஜக மாநிலத் தலைவர் சந்திரசேகர் பவன்குலே ஆகியோரின் சொந்த மாவட்டம் நாக்பூர் என்பது குறிப்பிடத்தக்கது.
அதுமட்டுமின்றி பாஜகவின் தாய் அமைப்பான ஆர்.எஸ்.எஸ் அமைப்பின் தலைமையகமும் நாக்பூரில் தான் இருக்கிறது. எனவே அரசியல் ரீதியாக நாக்பூர் மீது எப்போதும் மிகுந்த எதிர்பார்ப்பு நிலவும். இப்படிப்பட்ட சூழலில் பாஜக எப்படியும் பெருவாரியான இடங்களில் வெற்றி பெற்றிருக்கும் என்று எதிர்பார்க்கப்பட்டது. ஆனால் முடிவுகள் வேறு மாதிரியாக அமைந்துவிட்டன. இதன்மூலம் நாக்பூர் பஞ்சாயத்து தேர்தல் முடிவுகள் பாஜகவிற்கு பின்னடைவை ஏற்படுத்தியிருப்பதாக அரசியல் பார்வையாளர்கள் கூறுகின்றனர்.