காலநிலை மாற்றம் சர்வதேச அளவில் மிகப்பெரிய பாதிப்புகளை ஏற்படுத்தி வருகிறது. இதனை குறைக்கும் வகையிலும், முன்னோடி மாநிலமாக திகழவும் தமிழக அரசு முன்னெடுத்துள்ள விஷயம் தமிழ்நாடு காலநிலை நிர்வாகக் குழு. இதற்கான நியமன அறிவிப்பு நேற்று வெளியான நிலையில், இன்று புதிய சர்ச்சை வெடித்துள்ளது. இந்த குழுவில் ஐக்கிய நாடுகள் சபையின் சுற்றுச்சூழல் திட்டத்தின் 6வது செயல் இயக்குநர் எரிக்.எஸ்.சொல்ஹெய்ம் இடம்பெற்றுள்ளார்.
இவர் சமீபத்தில் இலங்கை அதிபர் ரணில் விக்ரமசிங்கவின் சர்வதேச காலநிலை ஆலோசகராக நியமிக்கப்பட்டது கவனிக்கத்தக்கது. இவருக்கு எதிர்ப்பு தெரிவித்து தமிழீழ ஆதரவாளர்களும், பல்வேறு தமிழின ஆர்வலர்களும் குரல் கொடுக்க ஆரம்பித்துள்ளனர். இந்த இடத்தில் எரிக் சொல்ஹெய்மின் பின்னணி குறித்து கொஞ்சம் திரும்பி பார்க்க வேண்டியுள்ளது.
இலங்கை தமிழர்கள் ஈழத்தை முன்வைத்து நடத்திய போர், 2009ஆம் ஆண்டு இறுதிக் கட்டத்தை எட்டியது. கிட்டதட்ட இனப்படுகொலை என்று சொல்லுமளவிற்கு லட்சக்கணக்கான மக்கள் கொல்லப்பட்டனர். அப்போது எப்படியாவது போரை முடிவுக்கு கொண்டு வந்துவிட வேண்டும் என்றும், அமைதியை நிலைநாட்ட வேண்டும் என்றும் பல்வேறு நாடுகள் முயற்சி செய்தன.
இந்த சூழலில் சர்வதேச அளவில் குழு ஒன்று அமைக்கப்பட்டு அமைதி பேச்சுவார்த்தை நடத்த இலங்கைக்கு அனுப்பி வைக்கப்பட்டது. அதில் நார்வே நாட்டின் சார்பாக சென்றவர் தான் எரிக் சொல்ஹெய்ம். அப்போது இலங்கை அரசுக்கு ஆதரவாக அந்த குழு செயல்பட்டதாக குற்றச்சாட்டு எழுந்தது. குறிப்பாக அமைதி பேச்சுவார்த்தை குழு வந்து சென்ற பின்னரே கெடுபிடிகள் அதிகமானதாக ஒரு பேச்சும் உண்டு.
ரத்த சாட்சியங்களை நேரில் பார்த்த பின்னரும் ஏன் பெரிதாக எந்தவொரு நடவடிக்கைகளையும் எடுக்கவில்லை என்று எரிக் சொல்ஹெய்ம் மீதும், அவரது குழுவினர் மீதும் கேள்விகள் எழுப்பப்பட்டன. அதன்பிறகு ஐ.நாவில் சுற்றுச்சூழல் இயக்கத்தின் இயக்குநர் பதவி வழங்கப்பட்டது. இந்த சூழலில் பயணச் செலவுகளில் முறைகேடு செய்ததாக எரிக் சொல்ஹெய்ம் மீது புகார்கள் கிளம்பவே தனது பதவியை ராஜினாமா செய்தார்.
இந்த சூழலில் தான் தற்போது தமிழக அரசின் காலநிலை மாற்றம் தொடர்பான நிர்வாகக் குழுவில் இடம்பெற்றுள்ளார். இலங்கை அரசின் சார்பாக நடந்து கொண்ட ஒருவர், ஈழத் தமிழர்களை குற்றவாளிகளாக முன்னிறுத்திய ஒருவர், எப்படி தமிழகத்தின் சூழலியலை மேம்படுத்த ஆலோசனைகளை வழங்குவது சரியாக இருக்கும் என்று தமிழீழ அமைப்புகள் கேள்வி எழுப்புகின்றன.
குறிப்பாக மே 17 இயக்கத்தின் ஒருங்கிணைப்பாளர் திருமுருகன் காந்தி தனது ட்விட்டர் பதிவில், ஈழத்து கடற்கரை செந்நீராய் மாறியதை கண்ட பின்பும் கண்மூடிக் கொண்டவர் தமிழகத்தின் சூழலுக்காய் அக்கரை கொள்வார் என்பது பேதமை. பொய்களையும் வன்மங்களையும் அரசியலாக்கி அப்பாவி தமிழர்களை கைவிட்டவரை எதிர்த்து நிற்க வேண்டியது மானத் தமிழரின் மறுக்க இயலா கடமை எனக் குறிப்பிட்டுள்ளார்.