‘கட்சியின் அமைச்சர்கள் மற்றும் தலைவர்கள் சிலர், ஒன்றன் பின் ஒன்றாக பிரச்சினைகளை உருவாக்கி தனக்கு தூக்கமில்லாத இரவுகளை தருகிறது. உங்களின் ஒவ்வொரு நிமிடமும் கண்காணிக்கப்படுகிறது. மிக மிக எச்சரிக்கையாக பேசுங்கள். நாம் பயன்படுத்த வேண்டிய சொற்கள் மிக மிக முக்கியமானவை, ஒரு சொல் வெல்லும், ஒரு சொல் கொல்லும்; இதனால் அடுத்தவர்களிடம் பேசும்போது மிக மிக எச்சரிகையாக பேசுங்கள்’
சென்னையில் அண்மையில் நடைபெற்ற
பொதுக்குழுவில் அக்கட்சியின் தலைவரும், முதல்வருமான ஸ்டாலின் மிகுந்த வேதனையுடன் உதிர்த்த வார்த்தைகள்தான் இவை.
முன்னதாக, திமுக மூத்த அமைச்சர்களான கே.என்.நேரு, பொன்முடி, துரைமுருகன் போன்றவர்கள் ஒருவர் பின் ஒருவராய் தொடர்ந்து பொதுவெளியில் சர்ச்சைக்குரிய விதத்தில் பேசி வந்தது கட்சிக்கு தலைமைக்கு கடும் நெருக்கடியையும், அவப்பெயரையும், எதிர்க்கட்சிகள் எள்ளி நகையாடுவதற்கு வாய்ப்பளிக்கும் விதத்திலும் அமைந்திருந்தது. குறிப்பாக அரசு மாநகர பேருந்துகளில் மகளிருக்கான இலவச பயணத் திட்டம் குறித்து பேசியபோது, ‘நீங்க எல்லாம் ஓசியலதானே பயணிக்கிறீங்க?’ என்று உயர்கல்வித் துறை அமைச்சர் பொன்முடி கூறியது கடும் சர்ச்சையை ஏற்படுத்தியது.
இவற்றையெல்லாம் நிதானமாக கவனித்த பின்பும்தான், மூத்த அமைச்சர்கள் மற்றும் நிர்வாகிகளுக்கு அறிவுறுத்தும் விதத்தில்தான் கட்சி பொதுக்குழுவில் ஸ்டாலின் அப்படி உடைந்து பேசியிருந்தார்.
ஸ்டாலின் இப்படி மனம் வருந்தி பேசி, இன்னும் ஒரு மாதம் கூட ஆகவில்லை. அதற்குள் பாஜக பிரமுகர்களும், நடிகைகளுமான குஷ்பு, நமீதா, காய்தரி ரகுராம், கவுதமி ஆகியோரை, திமுக நிர்வாகியான சைதை சாதிக், சென்னை கே.கே.நகரில் அண்மையில் நடைபெற்ற பொதுக்கூட்டத்தில் ஒருமையிலும், அவதூறாகவும் பேசவே, இந்த விஷயம் விவகாரமானது.
‘தீப்பொறி ஆறுமுகம், வெற்றிக் கொண்டான் காலத்தில் இருந்தே இந்த திமுககாரங்க இப்படிதான்பா… பொது இடம்னு பார்க்காம கொஞ்சமும் நாகரிகம் இல்லாம பேசுவாங்க…’ என்று சாதிக் என்ற கட்சி நிர்வாகியின் பேச்சு, ஒட்டுமொத்த திமுகவின் இமேஜையே டேமேஜ செய்யும்படியாக அமைந்துவிட்டது.
பற்றாக்குறைக்கு பாஜக மாநில தலைவரான அண்ணாமலையும், எங்கள் கட்சியைச் சேர்ந்த பெண்களை திமுகவினர் கண்ணிய குறைவாக பேசிவிட்டனர்; ஆனால் இந்த திராவிட மாடல் அரசு அவ்வாறு பேசியவர்களை கண்டுகொள்ளவே இல்லை எனக்கூறி, சென்னை வள்ளுவர் கோட்டத்தில் மகளிர் படையுடன் போராட்டத்தில் இறங்கவே, வேறு வழியில்லாமல் சைதை சாதிக் மீது வழக்குப்பதிவு செய்துள்ளனர் போலீசார்.
இந்த விவகாரம் ஒருபுற்ம் போய்க் கொண்டிருக்க, அதே நாளில் அமைச்சர் பொன்முடியால் மற்றொரு சர்ச்சை ஏற்பட்டது. விழுப்புரம் மாவட்டம், திருவெண்ணைநல்லூர் அருகே உள்ள சித்தலிங்கமடம் ஊராட்சியை இரண்டாக பிரித்து டி.எடப்பாளையம் பெயரில் தனி வருவாய் கிராமம் உருவாக்க எதிர்ப்பு தெரிவித்து, சித்தலிங்கமடம் கிராம மக்கள் லருவாய்த் துறை அதிகாரிகளை முற்றுகையிட்டு போராட்டம் நடத்தினர்.
விஷயம் அறிந்து அந்த கிராமத்துக்கு விரைந்த அமைச்சர் பொன்முடி கிராம மக்களுடன் பேச்சுவார்த்தை நடத்தியும் அவர்கள் சமாதானம் அடையவில்லை. இதனால் ஒருகட்டத்தில் பொறுமையிழந்த அமைச்சர், தகாத வார்த்தைகளால் பொதுமக்களை திட்டியதாக குற்றச்சாட்டு எழுந்தது.
‘ஒரு சொல் வெல்லும், ஒரு சொல் கொல்லும்; எனவே பொதுவெளியில் பேசும்போது மிக மிக எச்சரிகையாக பேசுங்கள் என்று கட்சியினரை ஸ்டாலின் எச்சரித்து ஒரு மாதம்கூட ஆகாத நிலையில், கட்சியின் மூதத அமைச்சரும், நிர்வாகியும் ஒரே நாளில் சர்ச்சையில் சிக்கி இருப்பது திமுக தலைமைக்கு தர்மசங்கடத்தையும், கட்சிக்கு மீண்டும் அவப்பெயரை ஏற்படுத்தம் விதத்திலும் அமைந்துள்ளது.
கட்சித் தலைமையின் எச்சரிக்கையை மீறி, இவர்கள் இ்வ்வாறு பேசிவதை, இவர்களின் பக்குவம் இவ்வளவுதானா அல்லது தலைமைக்கு நெருக்கடியை ஏற்படுத்தும் விதத்தில் வேண்டுமென்றே இப்படி பேசுகிறார்களா என்ற சந்தேகத்தை பலதரப்பிலும் எழுப்புகிறது.
பொன்முடி போன்றவர்கள் பொது இடங்களில் தொடர்ந்து இப்படி சர்ச்சைக்கு இடமளி்க்கும் விதத்தில் பேசி வந்தாலும், கட்சியின் தலைவர் என்ற முறையில் ஸ்டாலின் இவரை போன்றவர்கள் மீது நடவடிக்கை எடுக்க தயங்குவது ஏன்? திமுக எம்எல்ஏக்கள் குறிப்பிட்ட பேரை தமது பேரில் பிரித்துக் கொண்டு சென்றுவிடுவார் என்ற பயமா? என்று அதிமுக உள்ளிட்ட எதிர்க்கட்சியினர் எள்ளி நகையாடும் அளவுக்கு இந்த விஷயம் போய் கொண்டிருக்கிறது.
தீப்பொறி ஆறுமுகம், வெற்றிக் கொண்டான் போன்றவர்கள் கருணாநிதி காலத்திலேயே பொதுக்கூட்டங்களில் ஆபாசமாக பேசியிருக்கின்றனர் என்ற மோசமான வரலாறும் திமுகவுக்கு உண்டு. ஆனால், இது வாட்ஸ் அப் யுகம். நீங்கள் ம்… என்று சொன்னாலே அது மறுகணமே வீடியோவாக வைராலாகும் ஆபத்து உள்ளது. பொது வாழ்க்கையில் உள்ள உடன்பிறப்புகள் அனைவரும் இந்த அபாயத்தை உணர்ந்து, பொது இடங்களில் மிகவும் பொறுப்புணர்வுடன் செயல்பட வேண்டும்.
இல்லையென்றால், கட்சித் தலைவர் என்ற முறையில் ஸ்டாலின் தமது கடுமையான நடவடிக்கைகளால், அவர்களுக்கு தங்களது பொறுப்பை உணர செய்ய வேண்டும். இதனை செய்ய தவறினாலோ, தயங்கினாலோ இனியும் ஸ்டாலின் தூக்கத்தை இழக்க வேண்டிய வரும் என்று அறிவுறுத்துகின்றனர் திமுக நலவிரும்பிகள்.