தமிழகத்தில் உள்ள ஏழை எளிய மாணவர்கள் போட்டி தேர்வுகளில் வெற்றி பெற வேண்டும் என்கிற நோக்கில் அவர்களுக்கு அரசு சார்பில் பயிற்சி அளிக்கப்படுகிறது. நீட் தேர்வை பொறுத்தவரை அனைத்து அரசியல் கட்சிகளும் ஒன்று சேர்ந்து வேண்டாம் என சட்ட மசோதாவை அனுப்பி உள்ளோம் என்று திருச்சியில் தமிழக பள்ளிக்கல்வித்துறை அமைச்சர் அன்பில் மகேஷ் பொய்யாமொழி கூறியுள்ளார்.
திருச்சி அரியமங்கலம் சேஷாயி தொழில்நுட்ப பயிலரங்கத்தில் திருச்சி மாவட்ட நிர்வாகம் மற்றும் மாவட்ட வேலைவாய்ப்பு மற்றும் தொழில்நெறி வழிகாட்டு மையம் இணைந்து நடத்தும் மாபெரும் தனியார் வேலை வாய்ப்பு முகாமை தமிழக பள்ளிக்கல்வித்துறை அமைச்சர் அன்பில் மகேஷ் பொய்யாமொழி மற்றும் தமிழக தொழிலாளர் நலன் மற்றும் திறன் மேம்பாட்டு துறை அமைச்சர் சி.வி கனேசன் ஆகியோர் கலந்து கொண்டு துவக்கி வைத்தனர்.
இதைத் தொடர்ந்து செய்தியாளர்களைச் சந்தித்த அமைச்சர் அன்பில் மகேஷ், “வேலைவாய்ப்பை ஏற்படுத்தும் நோக்கில் இந்த சிறப்பு முகாமினை துறை சார்ந்த அமைச்சராக சி.வி.கணேசன் ஏற்பாடு செய்துள்ளார். இது மிகவும் பயனுள்ளதாக இருக்கும்.
போட்டித்தேர்விற்கு பயிற்சி அளிக்கப்படும் என்று ஏற்கனவே நாங்கள் கூறியிருந்தோம். கிராமப்புறங்களில் உள்ள ஏழை எளிய மாணவர்கள் அரசு துறைகளில் பணியாற்ற வேண்டும் என்பதற்காக பல போட்டி தேர்வுகளுக்கு அவர்களை தயார் படுத்துவது தான் எங்கள் நோக்கம்.
ஏழை மாணவர்கள் பலன் அடைய வேண்டும் என்கிற நோக்கில் தான் அரசு சார்பில் இந்த ஏற்பாடு. நீட் தேர்வை பொறுத்தவரை ஒட்டுமொத்த அரசியல் கட்சியினரும் ஒன்று சேர்ந்துதான் சட்ட மசோதவை அனுப்பி வைத்தோம்” என்று கூறினார்.
புதிய கல்வி கொள்கை தமிழகத்தில் கடைபிடிக்கப்பட்டு வருகிறது என்று மத்திய கல்வித்துறை இணை அமைச்சர் சுபாஷ் சர்க்கார் திருச்சிக்கு வந்தபோது தெரிவித்திருந்தார் இது குறித்த கேள்விக்கு பதிலளித்த அன்பில் மகேஷ், “ஏற்கனவே மத்திய கல்வித்துறை இணை அமைச்சர் காஞ்சிபுரத்திற்கு வந்தபோது இதேபோன்று கூறினார் தற்போதும் இதே போல் அவர் பேசி சென்றிருக்கிறார்.
மத்திய இனை அமைச்சர் சரியாக படித்து பார்க்கவில்லை என எண்ணுகிறேன். அவர் சரியாக படித்து பார்த்தால் அவர் கூறுவது போல் எதுவும் இல்லை என்பது தெரியும்” எனக் கூறினார்.