நாமக்கல், சூளகிரி ஆகிய இடங்களில் நேற்று பேசிய
மெகா கூட்டணி அமைப்போம் என்று பேசினார்.
எடப்பாடி பழனிசாமி அமமுகவை மனதில் வைத்துதான் இப்படி பேசினார் என்று அரசியல் நோக்கர்கள் கருத்து தெரிவித்தனர். இதை உறுதிப்படுத்தும் விதமாக டிடிவி தினகரன் தஞ்சையில் செய்தியாளர் சந்திப்பில் பேசியுள்ளார்.
“திமுக என்ற தீய சக்தியை வீழ்த்த வேண்டும் என்றால், அம்மாவின் தொண்டர்கள் அனைவரும் கூட்டணி அமைத்தால் தான் திமுகவை வீழ்த்த முடியும். திமுகவிற்கு எதிராக கூட்டணி அமைப்பதற்கு எப்போதும் நேசகரம் நீட்டுவோம், கூட்டணி தலைமை குறித்து அந்த நேரத்தில் முடிவு செய்து கொள்ளலாம்” என்று டிடிவி தினகரன் பேசியுள்ளார்.
மேலும் அவர் திமுகவுக்கு எதிராகவும், ஆளுநருக்கு ஆதரவாகவும் பேசியுள்ளார். “திமுக வரம்பு மீறி, தவறான ஆட்சி செய்யும் போது மூக்கணாங்கயிறு போல் இந்த ஆளுநர் தேவைதான். மழைநீர் வடிகால் பணிகள் தோண்டப்பட்டு பணிகள் முடிக்கப்படாமல் உள்ளன. ஆனால் 80 முதல் 85 சதவீத பணிகள் முடிந்து உள்ளதாக திமுக கூறி வருகின்றது. அவர்களுக்கு சதவீதம் தான் ஞாபகம் வருகிறது. மக்களிடம் அவர்கள் உண்மையைக் கூறி இருக்கலாம், அதனால்தான் மக்கள் கோபப்படுகிறார்கள். மக்களை ஏமாற்றாமல் முடிந்ததை செய்யுங்கள். மக்கள் அனுமதித்தால் தொடர்ந்து ஆட்சி செய்யுங்கள், இல்லை என்றால் வழி விட்டு செல்லுங்கள்” என்று கூறினார்.
மேலும் அவர், “மதவாதத்தை திமுக கூட்டணி குறிப்பாக திருமா போன்றவர்கள் கைவிட்டு, தமிழ்நாட்டு மக்களுக்கு தேவையான தமிழக அரசிடமும், மத்திய அரசாங்கத்திடம் பேசி அதற்கான போராட்டங்களை நடத்தி பெற்றுத் தர வேண்டும். இல்லையென்றால் அதற்கான பலனை 2024 தேர்தலில் அனுபவிப்பார்கள்” என்று கூறினார்.
எடப்பாடி பழனிசாமியும், டிடிவி தினகரனும் ராசியாகும் பட்சத்தில் அரசியல் அரங்கில் ஓபிஎஸ், சசிகலாவின் இடம் கேள்விக்கு உள்ளாகும் என்கிறார்கள் அரசியல் நோக்கர்கள்.
இபிஎஸ்ஸா, ஓபிஎஸ்ஸா என்றால் இபிஎஸ்ஸிடம் தான் நிர்வாகிகள், தொண்டர்கள், கட்சி கட்டமைப்பு உள்ளது. அதேபோல் சசிகலாவா, டிடிவி தினகரனா என்றால், தினகரன் தான் அமைப்பு கட்டி நிர்வாகிகளை, தொண்டர்களை தக்கவைத்தார். எனவே
, ஓபிஎஸ்ஸைவிட தினகரன், எடப்பாடி பழனிசாமி ஆகிய இருவருக்கான அரசியல் முக்கியத்துவம் அதிகமாக உள்ளது.
ஓபிஎஸ், சசிகலா போல் தினகரன் எடப்பாடி பழனிசாமியின் பதவியை குறிவைக்கவில்லை. அவர் அமமுகவின் பொதுச் செயலாளராகவே கூட்டணியில் தொடர்வார், அதன் மூலம் முக்குலத்தோர் சமூக வாக்குகளும் தங்கள் அணிக்கு வரும் என்று எடப்பாடி பழனிசாமி கருதுகிறார் என்கிறார்கள்.
அதிமுகவுடன் கூட்டணி வைக்கமுடியாமல் போனால் வாக்குகளை பிரிப்பவராக மட்டுமே தினகரன் தமிழக அரசியல் அரங்கில் அறியப்படுவார். அதனால் தினகரனுக்கோ, அதிமுகவுக்கோ எந்த பலனும் இல்லை, திமுக தான் அதன் பலனை அனுபவிக்கும். அதற்கு இடமளிக்க கூடாது என்பதற்காக இருவரும் ஒருசேர இணைப்பிற்கு சம்மதித்திருக்கிறார்கள் என்று கூறுகிறார்கள் அரசியல் விமர்சகர்கள்.
‘அதிமுக பொதுச்செயலாளர் – முகாம் அலுவலகம்’ என்று சசிகலா அறிக்கை வெளியிட்டுக்கொண்டிருக்கிறார். இந்நிலையில் இடைக்கால பொதுச் செயலாளருடன் டிடிவி தினகரன் கை கோர்ப்பது சசிகலாவுக்கு பெரும் அதிர்ச்சியை கொடுக்கும் என்கிறார்கள்.