தமிழ்நாட்டில் அரசு கல்லூரி பேராசிரியர்களுக்கான பணி இட மாறுதல் கலந்தாய்வு கடந்த 2019ம் ஆண்டு முதல் 4 ஆண்டுகளாக, நடத்தப்படாமல் உள்ளது. இதனால் குடும்பத்தை விட்டு பிரிந்து வெளியூர்களில் பணியாற்றும் கல்லூரி பேராசிரியர்கள் மிகவும் கடுமையாக பாதிக்கப்பட்டு உள்ளனர்.
இதுதொடர்பாக தமிழ்நாடு கல்லூரி ஆசிரியர் சங்கங்கள் உயர்கல்வி துறைக்கு பல முறை கோரிக்கை விடுத்தும் கூட அவர்களது கோரிக்கை ஏற்கப்படவில்லை என கூறப்படுகிறது.
அதே நேரத்தில், நிர்வாக காரணங்கள் என்று கூறி ஒரு சிலருக்கு மட்டும் பணி இடம் மாற்றங்கள் வழங்கப்படுவதாகவும், இதில் தகுதியானவர்களுக்கு இடம் மாறுதல் கிடைப்பதில்லை என்கிற குற்றச்சாட்டும் அரசு கல்லூரி பேராசிரியர்கள் மத்தியில் நிலவுகிறது.
தகுதியானவர்களுக்கு நியாயமான, சட்டப் பூர்வ வழியில் இட மாறுதல் வழங்குவதற்காக உருவாக்கப்பட்டது தான் பணியிட மாறுதல் கலந்தாய்வு ஆகும். இதில் எந்த முறைகேடுகளும் நடப்பதில்லை.
மாறாக உயர் கல்வித் துறையில் இந்த முறையில் முறையாக இட மாறுதல் வழங்கப்படுகிறது என, அதிகாரிகள் மட்டத்தில் இதுவரை விளக்கம் அளிக்கப்பட்டு வந்த போதிலும் அதற்கான வாய்ப்பு தள்ளியே போனபடி இருந்தது.
எனவே அரசு கல்லூரி பேராசிரியர்களுக்கான பணியிட மாறுதல் கலந்தாய்வு முறையை மீண்டும் நடைமுறைப்படுத்த வேண்டும். அதன் மூலம் தகுதியும், தேவையும் உள்ள கல்லூரிப்பேராசிரியர்களுக்கு நியாயமான முறையில் பணியிட மாறுதல் கிடைப்பதை தமிழக அரசு உறுதி செய்ய வேண்டும் தொடர்ந்து கோரிக்கை விடுத்து வந்தனர்.
இந்நிலையில் சென்னை கிண்டி, தொழில்நுட்ப கல்வி இயக்குனரகத்தில் உயர் கல்வித்துறை அமைச்சர் பொன்முடி செய்தியாளர்களை சந்தித்து கூறியதாவது:
பொறியியல் கலந்தாய்வு 4வது சுற்று வரும் 14ம் தேதி நிறைவு பெறுகிறது. இதுவரையில் 89,585 பேர் கல்லூரிகளில் சேர்ந்துள்ளனர். சென்ற ஆண்டு 80,383 பேர் சேர்ந்து இருந்தனர்.
இந்த ஆண்டு 10 ஆயிரம் பேர் அதிகமாக சேர்ந்து இருக்கிறார்கள். 4வது சுற்றிலும் மாணவர்கள் இன்னும் சேர இருக்கின்றனர். இதன் பிறகு துணை கலந்தாய்வு காலி இடங்களுக்கு நடைபெறும்.
இந்த ஆண்டு அதிக மாணவர்கள் சேர்க்கப்படும் நிலை உருவாக்கப்பட்டுள்ளது. கல்லூரி ஆசிரியர்கள் 4000 பேர் தேர்வு செய்வதற்கான அரசாணை வெளியிடப்பட்டு இருக்கிறது.
ஆசிரியர் தேர்வு வாரியம் மூலம் விரைவில் இதற்கான பணிகள் தொடங்கும். கெஸ்ட் விரிவுரையாளர்கள் தேர்வு செய்வதற்கு ஏற்பாடு செய்யப்பட்டுள்ளது. கல்லூரி ஆசிரியர்களின் நீண்ட கால கோரிக்கையான இடமாறுதல் கலந்தாய்வு நடத்தப்படுகின்றது.
5 ஆண்டுகளாக நடைபெறாமல் இருந்த கவுன்சிலிங் தற்போது ஆன்லைன் வழியாக இன்று தொடங்கி வைக்கப்பட்டிருக்கிறது. 5,408 உதவி பேராசிரியர்களுக்கான இடமாறுதல் கலந்தாய்விற்கு ஆன்லைன் மூலம் விண்ணப்பிக்க வேண்டும்.
மொத்தம் 3 ஆயிரம் காலி இடங்கள் உள்ளன. விரும்பும் இடங்களை பெறும் வகையில் ஏற்பாடு செய்யப்பட்டுள்ளது. 10 நாட்களுக்குள் விண்ணப்பிக்க வேண்டும். சீனியாரிட்டி அடிப்படையில் காலி இடங்களுக்கு மாறுதல் வழங்கப்படும். இவ்வாறு அமைச்சர் பொன்முடி கூறினார்.