சிறையில் அடைக்கப்பட்டு இருக்கும் வைர வியாபாரி நிரவ் மோடியை, இந்தியாவுக்கு நாடு கடத்துவதற்கு எதிராக தாக்கல் செய்யப்பட்ட மேல் முறையீட்டு மனுவை, லண்டன் உயர் நீதிமன்றம் தள்ளுபடி செய்து உத்தரவிட்டு உள்ளது.
குஜராத்தை சேர்ந்த வைர நகை வியாபாரி நிரவ் மோடி மீது, 11 ஆயிரத்து 600 கோடிக்கும் அதிகமாக சட்டவிரோத பரிவர்த்தனையும், ரூ.280 கோடி மோசடி செய்ததாகவும் பஞ்சாப் நேஷனல் வங்கி புகார் அளித்தது. இது தொடர்பாக வழக்குப்பதிவு செய்து சிபிஐ மற்றும் அமலாக்கத்துறை அதிகாரிகள் விசாரணை மேற்கொண்டு வருகின்றனர். ஆனால், நிரவ் மோடி கடந்த 2018ஆம் ஆண்டே நாட்டி விட்டு வெளியேறி விட்டார். அவரை தேடப்படும் குற்றவாளிகளாக மத்திய அரசு அறிவித்துள்ளது.
வெவ்வேறு பாஸ்போர்ட்டுகளை பயன்படுத்தி வெவ்வேறு நாடுகளுக்கு பயணம் மேற்கொண்டு வந்த நிரவ் மோடி, லண்டனில் இருப்பதாக இந்திய அரசுக்கு தகவல் கிடைத்தது. இதையடுத்து, இந்திய அரசின் கோரிக்கையை ஏற்று, இங்கிலாந்து உள்துறை அமைச்சகத்தின் பரிந்துரையின் பேரில் கடந்த 2019ஆம் ஆண்டு நிரவ் மோடி லண்டனில் கைது செய்யப்பட்டு வாண்ட்ஸ்வா்த் சிறையில் அடைக்கப்பட்டார். அவரை இந்தியாவுக்கு கொண்டு வரும் முயற்சிகளில் இந்திய அரசு தீவிரமாக ஈடுபட்டு வருகிறது.
இது தொடர்பான வழக்கு லண்டன் நீதிமன்றத்தில் நடைபெற்று வந்தது. கடந்த பிப்ரவரி மாதம் லண்டனில் உள்ள வெஸ்ட்மின்ஸ்டா் மாஜிஸ்திரேட் நீதிமன்றம் அவரை இந்தியாவுக்கு நாடு கடத்தலாம் என்று தீா்ப்பளித்தது. இந்தத் தீா்ப்புக்கு எதிராக லண்டன் உயா் நீதிமன்றத்தில் நிரவ் மோடி மேல்முறையீட்டு மனு தாக்கல் செய்தாா். அந்த மனு மீதான விசாரணை கடந்த ஆண்டு டிசம்பர் மாதம் முதல் நடைபெற்று வந்தது.
இந்நிலையில் இன்று, நிரவ் மோடி தாக்கல் செய்த மேல் முறையீட்டு மனு மீது லண்டன் உயர் நீதிமன்றம் தீர்ப்பு அளித்தது. அப்போது, நிரவ் மோடி மனநிலை காரணமாக தற்கொலை செய்து கொள்ளும் அபாயம் இருப்பதைக் காரணமாகக் காட்டி, இந்தியாவில் அவருக்கு எதிரான குற்றச்சாட்டுகளையும் பண மோசடி வழக்குகளையும் எதிர்கொள்வதிலிருந்து தப்பிப்பது நியாயமாகாது என்று நீதிபதிகள் தீர்ப்பு அளித்தனர்.
‘என் வேலை பேசும்..!’ – புதிய தலைமை நீதிபதி டி.ஒய்.சந்திரசூட் அதிரடி!
மேலும், கடந்த பிப்ரவரி மாதம் லண்டனில் உள்ள வெஸ்ட்மின்ஸ்டா் மாஜிஸ்திரேட் நீதிமன்றம் அவரை இந்தியாவுக்கு நாடு கடத்தலாம் என்று தீா்ப்பு அளித்தது சரியே என்றும் நீதிபதிகள் தங்கள் தீர்ப்பில் குறிப்பட்டு உள்ளனர்.
இந்த வழக்கில் நிரவ் மோடிக்கு பாதகமாக தீா்ப்பு வந்திருப்பதால், உயா் நீதிமன்றம் தீா்ப்பளித்த 14 நாட்களுக்குள் பிரிட்டன் உச்ச நீதிமன்றத்தில் அவா் மேல் முறையீடு செய்யலாம் என்று கூறப்படுகிறது. அதுவும் இந்த வழக்கு பொது முக்கியத்துவம் வாய்ந்தது என்று கருதி உயர் நீதிமன்றம் அனுமதி அளித்தால் மட்டுமே அவரால் மேல் முறையீடு செய்ய முடியும். உச்ச நீதிமன்றத் தீா்ப்பும் நிரவ் மோடிக்கு சாதகமாக அமையாவிட்டால், அவரால் ஐரோப்பிய மனித உரிமைகள் நீதிமன்றத்தை அணுக முடியும் என்பது குறிப்பிடத்தக்கது.