தென்கிழக்கு வங்கக் கடலில் புதிய காற்றழுத்த தாழ்வுப் பகுதி வருகிற நவம்பர் 16ஆம் தேதி உருவாகும் என்று இந்திய வானிலை ஆய்வு மையம் அறிவித்துள்ளது.
சில தினங்களுக்கு முன்னர் தென்மேற்கு வங்க கடலில் உருவான குறைந்த காற்றழுத்த தாழ்வுப் பகுதி ஆழ்ந்த காற்றழுத்த தாழ்வுப் பகுதியாக மாறி தமிழகம் – புதுச்சேரி கடற்பகுதிகளை நோக்கி நகர்ந்து வந்தது.
இதனால் தமிழகம், புதுச்சேரியில் பெரும்பாலான மாவட்டங்களில் கனமழையும், சில மாவட்டங்களில் அதி கனமழையும் பெய்து வருகிறது. சீர்காழியில் அதிகபட்சமாக 44 செ.மீ மழை பதிவாகியுள்ளது.
கடலூர் மாவட்டம் சிதம்பரம் சுற்றுவட்டார பகுதிகளில் இரண்டு நாட்களாக கன மழை பெய்து வந்த நிலையில் சிதம்பரத்தில் அதிகபட்சமாக 31 சென்டிமீட்டர் மழையும், புவனகிரியில் 20, சேத்தியாத்தோப்பு 19 சென்டிமீட்டர் மழை பதிவாகியுள்ளது.
இன்று காலை 6 மணி நிலவரப்படி மயிலாடுதுறையில் 161.6 மிமீ மழையும், சீர்காழியில் 436 மிமீ மழையும் , கொள்ளிடத்தில் 316.8 மிமீ மழையும் செம்பனார்கோவிலில் 242.3 மழையும் பதிவாகியுள்ளது.
இந்த ஆழ்ந்த காற்றழுத்த தாழ்வுப் பகுதி மேற்கு, வடமேற்கு திசையில் நகர்ந்து தமிழகத்தை கடந்து அரபிக் கடலை அடையும்.
இதனால் இன்று, நாளை, நாளை மறுநாள் தமிழகத்தில் கனமழை இருக்கும் என தெரிவிக்கப்படுள்ளது.
அதன் பின்னர் தென்கிழக்கு வங்கக் கடலில் புதிய காற்றழுத்த தாழ்வுப் பகுதி வருகிற நவம்பர் 16ஆம் தேதி உருவாகும் என்று இந்திய வானிலை ஆய்வு மையம் அறிவித்துள்ளது.
தற்போதுள்ள ஆழ்ந்த காற்றழுத்த தாழ்வுப் பகுதி முழுவதுமாக கடந்து சென்ற பின்னர் தான், தென் கிழக்கு வங்ககடலில் உருவாகும் காற்றழுத்த தாழ்வுப் பகுதியின் வீரியம், திசை ஆகியவை குறித்து கணித்து இந்திய வானிலை ஆய்வு மையம் வெளியிடும்.
புதிதாக உருவாகும் காற்றழுத்த தாழ்வுப் பகுதி புயலாக மாறுமா, மாறாதா, தமிழகத்தை நோக்கி வருமா அல்லது வடக்கு நோக்கி செல்லுமா என்பது அடுத்து வரும் நாள்களில் தான் தெரிய வரும்.