லவ் டுடே இயக்குநருக்கு ரஜினியின் வாழ்த்து – அடுத்த படத்திற்கான கதை ரெடியா?

கோமாளி படம் மூலம் இயக்குநராக அறிமுகமானவர் பிரதீப் ரங்கநாதன். ஜெயம் ரவி, காஜல் அகர்வால், யோகிபாபு உள்ளிட்டோர் நடித்திருந்த அப்படம் 2019ஆம் ஆண்டு வெளியாகி நல்ல வரவேற்பைப் பெற்றது. இதனையடுத்து பிரதீப் தானே ஹீரோவாக நடித்து ‘லவ் டுடே’ என்ற படத்தை இயக்கியுள்ளார். ஏஜிஎஸ் நிறுவனம் தயாரித்திருக்கும் லவ் டுடே படத்துக்கு யுவன் ஷங்கர் ராஜா இசையமைத்துள்ளார். இவானா மற்றும் ரவீனா ரவி, சத்யராஜ் உள்ளிட்டோர் நடித்திருக்கின்றனர். இப்படம் சமீபத்தில் வெளியாகி பலத்த வரவேற்பைப் பெற்றிருக்கிறது. 2K கிட்ஸை குறிவைத்து இந்தப் படம் தயாராகியிருப்பதாகவும் படம் அனைத்து தரப்பினருக்கும் பிடிக்கும் எனவும் படத்தை பார்த்தவர்கள் கூறிவருகின்றனர்.

மேலும் ஹீரோவாக பிரதீப்பின் நடிப்பு அட்டகாசமாக இருக்கிறதென்றும், தொடர்ந்து அவர் ஹீரோவாகவே நடிக்கலாம் எனவும் கூறிவருகின்றனர். அதேசமயம் பிரதீப்பின் நடிப்பிலும், உடல்மொழியிலும் தனுஷின் சாயல் தெரிகிறது. இப்படியோ போனால் இரண்டு படங்களை தாண்டி அவரால் ஹீரோவாக நிலைக்க முடியாதென்றும் ஒரு தரப்பினர் கூறிவருகின்றனர். எது எப்படியோ லவ் டுடே படம் பெரும் ஹிட்டடித்திருக்கிறது. வசூல் ரீதியாகவும் நல்ல வரவேற்பை பெற்றிருக்கும் படம் மேற்கொண்டு வரும் நாள்களிலும் வசூலை குவிக்கும் என்கின்றனர் திரை ஆர்வலர்கள்.

What more can I ask for ? It was like to be near a sun . So warm . The tight hug , those eyes , the laugh , the style and the love . What a personality . SUPERSTAR @rajinikanth saw #LoveToday and wished me  Will never forget the words you said sir @archanakalpathi pic.twitter.com/Zm0ceJ1iZm

— Pradeep Ranganathan (@pradeeponelife) November 12, 2022

இந்நிலையில் நடிகர் ரஜினிகாந்த் லவ் டுடே படத்தை பார்த்துவிட்டு பிரதீப் ரங்கநாதனை நேரில் அழைத்து பாராட்டியிருக்கிறார். ரஜினியுடன் இருக்கும் புகைப்படத்தை தனது ட்விட்டர் பக்கத்தில் பிரதீப் பகிர்ந்து, “இதற்கு மேல் நான் என்ன கேட்பேன். சூரியனின் பக்கத்தில் உள்ளதுபோல் இருந்தது. அழுத்தமான அரவணைப்பும், அந்த கண்களும், அந்த சிரிப்பும் , அந்த ஸ்டைலும், அன்பும் … என்ன ஒரு மனிதர். சூப்பர் ஸ்டார் ரஜினி லவ் டுடே படத்தை பார்த்து என்னிடம் வாழ்த்து தெரிவித்தார். நீங்கள் கூறிய வார்த்தைகளை நான் மறக்க மாட்டேன் சார்” என குறிப்பிட்டுள்ளார். தற்போது இந்தப் புகைப்படம் சமூக வலைதளங்களில் வைரலாகியுள்ளது.