வடகிழக்கு பருவழை கடந்த மாதம் தொடங்கிய நிலையில் தமிழகத்தில் பல்வேறு மாவட்டங்களில் அவ்வப்போது
கனமழை
கொட்டித் தீர்த்து வருகிறது.
தமிழகம் முழுக்க பரவலாக மழை பெய்துவந்தாலும், இரு தினங்களுக்கு முன்னர் மயிலாடுதுறை, கடலூர், பூம்புகார், சீர்காழி ஆகிய பகுதிகளில் அதீத கனமழை பெய்தது.
குடியிருப்புகளுக்குள் வெள்ளநீர் புகுந்தது. ஆயிரக்கணக்கான ஏக்கர் விளைநிலங்கள் நீரில் மூழ்கியது. தமிழகத்தில் அதிக பாதிப்பை சந்தித்த இந்த பகுதிகளை முதல்வர் ஸ்டாலின் நேரில் பார்வையிட்டு பாதிக்கப்பட்ட மக்களிடம் பாதிப்பு குறித்து கேட்டறிகிறார்.
அத்துடன் நிவாரணப் பணிகளையும் மேற்கொள்கிறார். அந்த வகையில் கடலூர் மாவட்டம் கீழ்பூவாணிக்குப்பம் பகுதிகளை பார்வையிட்டு ஆய்வு செய்து மழையால் வீடுகளை இழந்த 13 பயனாளிகளுக்கும், கால்நடையை இழந்த ஒரு பயனாளிக்கும் நிவாரணத் தொகை மற்றும் நிவாரணப் பொருள்களை வழங்கினார்.
அதேபோல் மழை வெள்ள பாதிப்புகள் குறித்து அமைக்கப்பட்டுள்ள புகைப்பட காட்சிகளை பார்வையிட்டார். நீரில் மூழ்கியுள்ள விளைநிலங்களையும் நேரில் ஆய்வு செய்தார். கனமழை காரணமாக ஏற்பட்ட சேதங்கள் குறித்தும், எடுத்து வரும் நடவடிக்கைகள், வெள்ளத்தடுப்பு திட்டங்கள் குறித்தும் அதிகாரிகளிடம் கேட்டறிந்தார்.
இந்த நிகழ்வில் அமைச்சர்கள் கே.என்.நேரு, எ.வ.வேலு, எம்.ஆர்.கே.பன்னீர் செல்வம், சி.வி.கணேசன் உள்ளிட்டோர் உடனிருந்தனர்.
இதைத் தொடர்ந்து மயிலாடுதுறை மாவட்டத்துக்கு முதல்வர் ஸ்டாலின் பயணம் மேற்கொண்டார்.