சென்னை திரு.வி.க. நகர் மண்டலத்தின் வார்டு 74ல் வெற்றி பெற்ற 28 வயதான எம்.காம் பட்டதாரியும், முன்னாள் எம்எல்ஏ செங்கை சிவத்தின் பேத்தியான பிரியா ராஜன் சென்னை மேயராக பொறுப்பாற்றி வருகிறார். சென்னையின் மூன்றாவது பெண் மேயர் என்றும் முதல் தலித் மேயர் என்றும் திமுக அவருக்கு புகழாரம் சூட்டியது.
இளம் மேயராக இருக்கும் பிரியா ராஜன் அவ்வப்போது செய்தியாளர்கள் சந்திப்பில் கொடுத்து வரும் பேட்டி கலவையான விமர்சனங்களை பெற்று வருகிறது. அதென்ன கலவையான விமர்சனம் என்றால், கொஞ்சும் குரலில் அவர் பேசுவது பல பேருக்கு பிடித்திருக்குறது. அதேபோல், மேடையில் பள்ளி மாணவிகள் ஒப்பிப்பதை போல பேசும் மேயர் பிரியா, டங்க் ஸ்லிப்பாகி விடும் வார்த்தைகள் நகைச்சுவையை ஏற்படுத்துகிறது.
மேலும், எதிர்கட்சிகளால் விமர்சனமும் செய்யப்பட்டு வருகிறது. இளம் மேயர் மட்டுமின்றி இதற்கு முன்பு எந்த மேடையிலும் பேசி பழக்கம் இல்லாதவராக இருக்கும் மேயர் பிரியாவின் பேச்சில் சில தடுமாற்றங்கள் இருக்கத்தான் செய்யும். இதை புரிந்துகொள்ளாமல் விமர்சன வேலையை எதிர்க்கட்சிகள் கட்சிதமாக பயன்படுத்திக்கொள்கின்றன.
இந்த நிலையில், நாம் தமிழர் கட்சியின் சீமான் மேயர் பிரியா ராஜனின் பேச்சுக்கு கருத்து தெரிவித்துள்ளார். செய்தியாளர் சந்திப்பின்போது, மேயர் பிரியாவின் சில பேச்சு தடுமாற்றத்தை குறித்து சீமானிடம் கேள்வி எழுப்பப்பட்டது. அதற்கு பதிலளித்த சீமான், ” சின்ன புள்ள… அவங்க முதல் முதல்ல ஒரு பதவிக்கு வந்திருக்காங்க… ஒரு எளிய விளிம்பு நிலையில் இருந்து வந்துருக்காங்க.. அதையெல்லாம் ஒரு குறையா பேசிட்டு இருக்க கூடாது… எத்தனையோ பல பெரிய தலைவர்களே தடுமாறிடுறாங்க.. ”கொசுவை ஒழிக்க வலை வழங்கும் என சொல்வதற்கு கொசு வழங்கும் விழா” என்று சொல்லிட்டாங்க.. அதை போய் பெரிய குறையா எடுத்துக்க கூடாது” என்று சீமான் பதிலளித்தார்.
இந்த நிலையில், எதிர்க்கட்சியாக இருந்தாலும் இதுதான் மாண்பு என்று சீமானுக்கு பலரும் பாராட்டுகளை தெரிவித்து வருகின்றனர்.