அண்டை நாடான சீனாவின் வூகான் நகரில், கடந்த 2019 ஆம் ஆண்டு டிசம்பர் மாத இறுதியில் கோவிட் – 19 எனப்படும் கொரோனா வைரஸ் தொற்று பரவியது. இந்தத் தொற்று, இந்தியா, அமெரிக்கா, இத்தாலி, பிரிட்டன், பிரான்ஸ் உள்ளிட்ட நாடுகளுக்கு பரவி கடுமையான பாதிப்புகளை ஏற்படுத்தியதை அடுத்து யாராலும் மறுக்க முடியாது. கொரோனா காரணமாக இந்தியாவில் லட்சக்கணக்காணோர் உயிரிழந்தனர்.
மேலும்,தொற்றால் பாதிக்கப்பட்டவர்கள் மருத்துவமனைக்கு படையெடுத்தால், பல்வேறு மருத்துவமனைகளில் ஆக்சிஜன் சிலிண்டர், படுக்கை வசதிகள் உள்ளிட்ட அத்தியாவசிய பொருட்களுக்கு கடும் தட்டுப்பாடு ஏற்பட்டது. இதன் காரணமாகவும் பலர் உயிரிழந்தனர். கொரோனா தீவிர பரவல் காரணமாக தமிழகத்தில் இரண்டு முறை முழு ஊரடங்கு அமல்படுத்தப்பட்டது. இந்த வைரஸ் தொற்றுக்கு உலக நாடுகள் தடுப்பூசிகளை கண்டுபிடித்ததை அடுத்து கடந்த ஜனவரி மாதம் முதல் இயல்பு நிலை உலகமெங்கும் திரும்பியது.
இந்நிலையில், கொரோனா வைரஸ் தொற்றின் பிறப்பிடமாகக் கருதப்படும் சீனாவில், கடந்த சில நாட்களாக, கொரோனா வைரஸ் தொற்றால் பாதிக்கப்படுவோரின் எண்ணிக்கை தொடர்ந்து அதிகரித்து வருகிறது. தலைநகர் பெய்ஜிங், ஷாங்காய் உள்ளிட்ட நகரங்களில் கொரோனா பரவல் மீண்டும் வேகம் எடுத்துள்ளது, சுகாதாரத் துறைக்கு அச்சத்தை ஏற்படுத்தி உள்ளது.
சீனாவில் ஜீரோ கோவிட் பாலிசி கடைபிடிக்கப்படுவதால், 10 சதவீத பேருக்கு கொரோனா வைரஸ் தொற்று பரவினாலே கடுமையான கட்டுப்பாடுகள் அமல்படுத்தப்பட்டு விடும். இந்நிலையில், தலைநகர் பெய்ஜிங்கில் கடந்த சில நாட்களாக கொரோனா பரவல் மீண்டும் வேகம் எடுத்துள்ளது. இதன் காரணமாக இந்த மாகாணத்தில் உள்ள பெரும்பாலான மாவட்டங்களில், பொது மக்கள் வீடுகளுக்குள்ளேயே இருக்கும்படி அதிகாரிகள் உத்தரவிட்டு உள்ளனர்.
பொது மக்கள் இந்த வாரம் வரை வீடுகளை விட்டு வெளியே வரத் தடை விதிக்கப்பட்டுள்ள நிலையில், கொரோனா பரிசோதனைக்கு கட்டாயம் செல்ல வேண்டும் என்றும் அறிவுறுத்தப்பட்டு உள்ளது. மேலும், வணிக வளாகங்கள், கடைகள் உள்ளிட்டவற்றை மூடும்படி அதிகாரிகள் தெரிவித்து உள்ளனர். இந்தநிலையில் இன்று ஒரே நாளில் 316 பேருக்கு கொரோனா தொற்று உறுதி செய்யப்பட்டதால், போக்குவரத்து கட்டுப்பாடுகள் அறிவிக்கப்பட்டுள்ளன.
தொற்றுநோய் தொடங்கியதிலிருந்து, சீனாவின் தலைநகரம் அதன் மிகவும் சிக்கலான மற்றும் கடுமையான கோவிட் கட்டுப்பாட்டு நிலைமையை தற்போது எதிர்கொள்கிறது என்று, பெய்ஜிங்கின் நோய் கட்டுப்பாடு மற்றும் தடுப்பு மையத்தின் துணை இயக்குனர் லியு சியாஃபெங் கூறியுள்ளார். அதேபோல் பெய்ஜிங்கிற்குச் செல்லும் மக்கள், தங்கியிருக்கும் முதல் மூன்று நாட்களில் தினசரி சோதனைகளைச் செய்ய வேண்டும்.
மேலும் அவர்களின் வீடுகள் அல்லது தங்குமிடங்களை விட்டு வெளியேற அனுமதிக்கப்படுவதற்கு முன்பு, முடிவுகளுக்காகக் காத்திருக்க வேண்டும் என்று நகர அரசாங்கத்தின் செய்தித் தொடர்பாளர் சூ ஹெஜியன் தெரிவித்துள்ளார். மேலும் செவ்வாய்க்கிழமை (நாளை) முதல் இந்த புதிய விதிமுறைகள் அமலுக்கு வரும் என்று தெரிவிக்கப்பட்டுள்ளது.