தமிழ்நாட்டில் உள்ள ரேஷன் கடைகளுக்கு பொது விநியோகத் திட்டத்தின் கீழ் சப்ளை பருப்பு பாமாயில் உள்பட உணவுப்பொருட்களை சப்ளை செய்யும் இரண்டு நிறுவனங்கள் மற்றும் அதன் தொடர்புடைய இடங்கள் என மொத்தம் 40 இடங்களில் வருமான வரித்துறை அதிகாரிகள் அதிரடியாக சோதனை நடத்தி வருகின்றனர்.
வரி ஏய்ப்பு புகாரின் பேரில் இந்த சோதனை நடைபெற்று வருவதாக தெரிகிறது. தமிழக அரசின் பொது விநியோகத் திட்டத்திற்கு பருப்பு மற்றும் பாமாயில் மற்றும் உணவுப்பொருட்களை சப்ளை செய்யும் நிறுவனங்களான அருணாச்சலம் இம்பேக்ஸ் என்ற நிறுவனத்தின் சென்னை மண்ணடி அலுவலகம் மற்றும் தண்டையார்பேட்டையில் உள்ள காமாட்சி குரூப் ஆஃப் கம்பெனிஸ், இன்டெர் கிரேடட் சர்வீஸ் குரூப் ஆகிய நிறுவனங்களிலும் வருமான வரித்துறை அதிகாரிகள் சோதனை நடத்தி வருகின்றனர்.
தமிழகம் முழுவதும் மொத்தம் 40 இடங்களில் இந்த சோதனைகள் நடந்து வருவதால் சம்பந்தப்பட்ட நிறுவனங்களில் பரபரப்பும் பதற்றமும் நிலவுகிறது. முன்னதாக, தமிழக அரசுக்கு சத்துமாவு, முட்டை, பருப்பு வழங்கும், கிறிஸ்டி பிரைடு கிராம் இண்டஸ்ட்ரி எனும் நிறுவனத்தில் கடந்த 2018ஆம் ஆண்டில் இதேபோன்று வருமான வரித்துறை சோதனை நடைபெற்றது.
சுமார் 4 நாட்கள் நடந்த அந்த சோதனையில் ரூ.17 கோடி ரொக்கம், 10 கிலோ தங்கம் மற்றும் முக்கிய ஆவணங்கள் உள்ளிட்டவைகள் பறிமுதல் செய்யப்பட்டதாக தெரிவிக்கப்பட்டது. பின்னர் அந்த நிறுவனத்துக்கு அபராதம் விதிக்கப்பட்டது என்பது குறிப்பிடத்தக்கது.