திருச்செந்தூர் கோவில் அருகே சுமார் 100 கோடி மதிப்புள்ள தருமபுர ஆதீனத்துக்குச் சொந்தமான நிலங்களை மீட்க நடவடிக்கை எடுக்க உத்தரவிட கோரிய வழக்கில், திருச்செந்தூர் தருமபுர ஆதீன மடத்திற்கு சொந்தமான ஆக்கிரமிப்பாளர்களை கண்டறிந்து உடனடியாக அகற்ற உயர் நீதிமன்ற மதுரை கிளை உத்தரவு பிறப்பித்துள்ளது.
திருச்செந்தூரை சேர்ந்த மார்க்கண்டன் என்பவர் தாக்கல் செய்த பொதுநல மனுவில், “திருச்செந்தூர் சுப்பிரமணிய சுவாமி கோவில் அருகே தருமபுரம் ஆதின மடத்திற்கு சொந்தமான சொத்தை பலர் ஆக்கிரமிப்பு செய்து உள்ளனர். ஆக்கிரமிப்பாளர்கள் வெளியேற மறுக்கின்றனர் இந்த நிலம் 3.5 ஏக்கர் ஆகும். இடத்தின் மதிப்பு தற்போது 100 கோடி ரூபாய்க்கு அதிகமாக உள்ளது. இந்த சொத்தை மீட்டு உடனடியாக ஒப்படைக்க நடவடிக்கை எடுக்க வேண்டும்.” என கோரியிருந்தார்.
மேலும், ஆதினத்திற்கு சொந்தமான சொத்துகளுக்கு 1971 வரை வாடகை செலுத்தி வந்தனர். அதன்பிறகு, முறைகேடாக பத்திரப் பதிவு செய்துள்ளனர். எனவே தருமபுரம் ஆதின மடத்தின் சொத்துகளை மீட்க நடவடிக்கை எடுக்க இந்து சமய அறநிலையத்துறை அணையருக்கு உத்தரவிட வேண்டும் எனவும் மனுவில் அவர் கோரியிருந்தார்.
இந்த வழக்கு விசாரணையின் போது மனுதாரர் தரப்பில் வழக்கறிஞர் கார்த்திகேயன் ஆஜராகி, தருமபுர ஆதீன மடத்திற்கு சொந்தமான நிலங்கள் ஆக்கிரமிப்பு செய்யப்பட்டுள்ளதற்கான மூல ஆவணங்களையும் சிலர் போலியான பத்திரப் பதிவு செய்துள்ள ஆவணங்களையும் நீதிமன்றத்தில் தாக்கல் செய்திருந்தார்.
இதனைத்தொடர்ந்து, திருச்செந்தூர் சுப்பிரமணிய சுவாமி கோவில் உதவி ஆணையர் நேரில் ஆஜராகி விளக்கம் அளித்தார். அப்போது ஆக்கிரமிப்பு சம்பந்தமான ஆவணங்களையும் தாக்கல் செய்திருந்தார். இந்த வழக்கு நீதிபதிகள் மகாதேவன் சத்திய நாராயண பிரசாத் ஆகியோர் அடங்கிய அமர்வில் விசாரணை செய்யப்பட்டு இன்று தீர்ப்பு வழங்கப்பட்டது.
அதன்படி, திருச்செந்தூரில் தருமபுர ஆதீனத்திற்கு சொந்தமான இடங்கள் ஆக்கிரமிப்பு செய்யப்பட்டுள்ளது. தற்போது ஆதீன மடத்திற்கு சம்பந்தமில்லாத நபர்களிடம் இருக்கும் ஆக்கிரமிப்பு நிலங்களை உடனடியாக மீட்கும் நடவடிக்கையை அறநிலையத்துறை ஆணையர் எடுக்க வேண்டும். அவ்வாறு மீட்கப்படும் நிலங்களை தருமபுர ஆதீன மடத்து நிர்வாகத்திடம் ஒப்படைக்க வேண்டும் என உத்தரவிட்டு வழக்கை முடித்து வைத்துள்ளனர்.