தேசிய அரசியலில் கால் பதிக்க வேண்டும் என்ற கனவுடன் பாரத் ராஷ்டிர சமிதி (BRS) என தனது கட்சியை மாற்றி அமைத்தவர் தெலங்கானா முதல்வர் சந்திரசேகர் ராவ். இந்நிலையில் அவரது மகள் கவிதா சிபிஐ விசாரணையில் சிக்கியிருப்பது பெரும் சலசலப்பை ஏற்படுத்தியுள்ளது. அதாவது, டெல்லியில் ஆளும் ஆம் ஆத்மி அரசு புதிய கலால் கொள்கையை கொண்டு வந்தது.
கவிதாவிற்கு தொடர்பு?
இதில் ஊழல் நடந்திருப்பதாக எழுந்த புகாரை அடித்து, சிபிஐ மற்றும் அமலாக்கத்துறை அதிகாரிகள் வழக்குப்பதிவு செய்து விசாரணை நடத்தினர். இந்த விவகாரத்தில் தெலங்கானா முதல்வர் சந்திரசேகர் ராவ் மகளும், எம்.எல்.சியுமான கவிதாவிற்கும் தொடர்பிருப்பதாக பரபரப்பு தகவல் வெளியானது. இதனால் அமலாக்கத்துறை தாக்கல் செய்த குற்றப்பத்திரிகையில் அவரது பெயரும் சேர்க்கப்பட்டது.
யார் அந்த South Group?
இதன் தொடர்ச்சியாக சிபிஐ விசாரணை வளையத்திற்குள் கவிதா கொண்டு வரப்பட்டுள்ளார். முன்னதாக புதிய கலால் திட்ட ஊழல் வழக்கில் தொழிலதிபர் விஜய் நாயர் என்பவர் கைது செய்யப்பட்டார். இவர் ஆம் ஆத்மி கட்சி தலைவர்கள் சார்பாக ஒரு குழுவினரிடம் இருந்து 100 கோடி ரூபாயை பெற்றதாக புகார் முன்வைக்கப்பட்டது. சம்பந்தப்பட்ட குழுவிற்கு “South Group” என்று பெயரிடப்பட்டுள்ளது.
எம்.பிக்கும் தொடர்பு
இந்த குழுவில் சரத் ரெட்டி, கவிதா, மகுந்தா ஸ்ரீனிவாசுலு ரெட்டி ஆகியோர் இடம்பெற்றுள்ளதாக தகவல்கள் தெரிவிக்கின்றன. இதில் ஸ்ரீனிவாசலு ரெட்டி என்பவர் ஆந்திரப் பிரதேச ஆளுங்கட்சியான ஒய்.எஸ்.ஆர் காங்கிரஸ் கட்சி எம்.பி என்பது குறிப்பிடத்தக்கது. இந்நிலையில் தெலங்கானா முதல்வர் மகள் கவிதாவிடம் நேரில் விசாரணை நடத்த சிபிஐ அதிகாரிகள் திட்டமிட்டுள்ளனர்.
சிபிஐ எடுக்கும் நடவடிக்கை
இதையொட்டி கடந்த 6ஆம் தேதி கவிதாவிற்கு தகவல் தெரிவித்திருந்தனர். நாங்கள் விசாரணை நடத்த வருகிறோம். எனவே ஹைதராபாத் பஞ்சாரா ஹில்ஸில் உள்ள வீட்டில் இருப்பதை உறுதி செய்ய வேண்டும் என்று கேட்டுக் கொள்ளப்பட்டது. அதற்கு டிசம்பர் 11ஆம் தேதி காலை 11 மணிக்கு தான் வீட்டில் இருப்பதாக சிபிஐக்கு கவிதா பதில் அனுப்பினார்.
விசாரணைக்கு முழு ஒத்துழைப்பு
மேலும் நான் சட்டத்தை மதிக்கும் குடிமகள். எனவே விசாரணைக்கு முழு ஒத்துழைப்பு வழங்குவேன். 11, 12, 14, 15 ஆகிய தேதிகளில் வீட்டில் இருப்பேன். இதில் ஏதேனும் ஒரு தேதியில் என்னிடம் வந்து விசாரணை நடத்தலாம் எனத் தெரிவித்திருந்தார். அதன்படி, இன்று (டிசம்பர் 11) காலை 11 மணிக்கு கவிதா வீட்டிற்கு சிபிஐ அதிகாரிகள் நேரில் சென்று விசாரணையை தொடங்கவுள்ளனர்.
இந்த சூழலில் கவிதாவிற்கு ஆதரவாக பாரதிய ராஷ்டிர சமிதி கட்சியினர் மற்றும் ஆதரவாளர்கள் பலரும் பதாகைகள், போஸ்டர்களை ஒட்டி வருகின்றனர். ”போராளியின் மகள் ஒருபோதும், எதற்காகவும் பயப்பட மாட்டார். கவிதாவிற்காக நாங்கள் உடன் நிற்கிறோம்” என்று இடம்பெற்றுள்ள வாசகங்கள் வைரலாகி வருகின்றன.