வடகிழக்கு மாநிலமான சிக்கிமில் இந்திய ராணுவ வாகனம் விபத்தில் சிக்கி 16 ராணுவ வீரர்கள் பலியான சம்பவம் பெரும் சோகத்தை ஏற்படுத்தியுள்ளது. சிக்கிமில் உள்ள ஜெமா என்ற இடத்தில் இந்த விபத்து நடந்துள்ளதாக தகவல் வெளியாகியுள்ளது.
இன்று காலையில் சட்டெனிலிருந்து தாங்கு நோக்கிச் 3 ராணுவ வாகனங்கள் அணிவகுத்து சென்று கொண்டிருந்தபோது ஒரு வாகனம் ஜெமாவில் செல்லும் வழியில் செங்குத்தான சரிவில் சறுக்கி பள்ளத்தில் விழுந்து விபத்து ஏற்பட்டுள்ளது. இந்த விபத்தில் வாகனத்தில் பயணித்த மூன்று அதிகாரிகள் உட்பட 16 வீரர்கள் உயிரிழந்துள்ளனர். மேலும், நான்கு பேர் படு காயங்களுடன் மீட்கப்பட்டு சிகிச்சை பெற்று வருவதாக ராணுவம் தெரிவித்துள்ளது.
இந்தநிலையில், ராணுவ வீரர்களின் உயிரிழப்புக்கு இரங்கல் தெரிவித்த மத்திய பாதுகாப்பு அமைச்சர் ராஜ்நாத் சிங்,”வடக்கு சிக்கிமில் நடந்த சாலை விபத்தில் இந்திய ராணுவ வீரர்கள் உயிரிழந்தது மிகவும் வேதனை அளிக்கிறது. அவர்களின் சேவை மற்றும் அர்ப்பணிப்புக்காக தேசம் ஆழ்ந்த நன்றியை தெரிவித்துக் கொள்கிறது. உயிரிழந்த வீரர்களின் குடும்பங்களுக்கு எனது இரங்கல்கள். காயமடைந்தவர்கள் விரைவில் குணமடைய பிரார்த்தனை செய்கிறேன். ,” என்று பாதுகாப்பு அமைச்சர் ட்வீட் செய்துள்ளார்.