பீகாரில் உள்ள தேஜஸ்வி யாதவின் கட்சியான ஆர்ஜேடியைச் சேர்ந்த மூத்த தலைவர் ஒருவர், தனது குழந்தைகளை வெளிநாட்டில் வேலை பெற்று அங்கேயே குடியேறுமாறு அறிவுறுத்தியதாகக் கூறியது, சமூக வலைதளங்களில் வைரலாகி வருகிறது.
ராஷ்ட்ரீய ஜனதா தளத்தின் (ஆர்ஜேடி) தேசிய பொதுச் செயலாளரான அப்துல் பாரி சித்திக், ‘‘நம் நாட்டில் உள்ள முஸ்லிம்கள் இரண்டாம் தர குடிமக்களாக நடத்தப்படுகிறார்கள். பாஜக ஆட்சிக்கு வந்ததில் இருந்து முஸ்லீம்களுக்கு நாட்டில் பாதுகாப்பு இல்லை. முஸ்லீம்கள் பாரபட்சமாக நடத்தப்படுகிறார்கள். நாட்டின் சூழலை முன்னிலைப்படுத்த ஒரு தனிப்பட்ட உதாரணத்தை நான் மேற்கோள் காட்ட விரும்புகிறேன்.
எனக்கு ஹார்வர்டில் படிக்கும் ஒரு மகனும், லண்டன் ஸ்கூல் ஆஃப் எகனாமிக்ஸில் பட்டம் பெற்ற ஒரு மகளும் உள்ளனர். அவர்களை வெளிநாட்டில் வேலைகள் கண்டுபிடிக்கச் சொன்னேன். மேலும், முடிந்தால் அங்கேயே குடியுரிமையை எடுத்துக் கொள்ளுங்கள் என்று கூறினேன். நான் இன்னும் இங்கேயே (இந்தியாவில்) வாழ்ந்து வருகிறேன் என்று என் குழந்தைகள் அவநம்பிக்கையுடன் நடந்துகொண்டபோது, அவர்களால் சமாளிக்க முடியாது என்று அவர்களிடம் சொன்னேன். அதையே தான் அனைத்து முஸ்லீம்களுக்கும் கூறுகிறேன். இங்கு பாதுகாப்பு இல்லை. வெளிநாடுகளுக்கு செல்லுங்கள்” என்று கூறினார்.
ஆர்ஜேடி தலைவரின் இந்த கருத்துக்கு, பீகார் பாஜகவினர் கடும் கண்டணம் தெரிவித்து, அவர் “பாகிஸ்தானுக்குச் செல்ல வேண்டும்” என்று பரிந்துரைத்தனர். “சித்திக்கியின் கருத்து இந்தியாவுக்கு எதிரானது. அவர் மிகவும் நம்பிக்கை இழந்திருந்தால், அவர் அரசியல் தலைவராக இங்கு அனுபவிக்கும் சலுகைகளை விட்டுவிட்டு பாகிஸ்தானுக்குச் செல்ல வேண்டும்.
யாரும் அவரைத் தடுக்க மாட்டார்கள்” என்று மாநில பாஜக செய்தித் தொடர்பாளர் நிகில் ஆனந்த் விமர்சித்தார். மேலும் அவரது பேச்சுகள் முஸ்லிம்களை திருப்திப்படுத்தும் அவரது கட்சியின் கலாச்சாரத்தை பிரதிபலிக்கின்றன, என்று பாஜக தலைவர் கூறினார்.
வெளிநாடு செல்ல நடிகை ஜாக்குலின் பெர்னாண்டஸுக்கு நோ; நீதிமன்றம் கறார்.!
அப்துல் பாரி சித்திக் ஆர்ஜேடி தலைவர் லாலு பிரசாத்தின் (தேஜஸ்வி யாதவின் தந்தை) நெருங்கிய உதவியாளர். ஆர்ஜேடி தலைவரின் கருத்துகளை கட்சியின் கூட்டணிக் கட்சியான முதல்வர் நிதிஷ் குமாரின் ஜனதா தளம் (யுனைடெட்) ஆமோதித்துள்ளது.