கர்நாடகா மற்றும் மகாராஷ்டிரா இடையே உள்ள பெலகாவி எல்லை பிரச்சினையானது, கடந்த 1960 ஆம் ஆண்டு மொழிவாரியாக மாநிலங்கள் பிரிக்கப்பட்டதில் இருந்தே இருந்து வருகிறது. பெலகாவியில் உள்ள சுமார் 80 மராத்தி மொழி பேசும் கிராமங்களை மகாராஷ்டிரா விட்டுக்கொடுக்க விரும்பாத நிலையில், கர்நாடகா அதற்கு சொந்தம் கொண்டாடி வருகிறது.
இதனால் மகாராஷ்டிரா அரசின் கோரிக்கையை ஏற்று, கடந்த 1957 ஆண்டு ஜூன் மாதம் பெலகாவியை மறுசீரமைப்பது குறித்து முடிவெடுக்க மத்திய அரசு மகாஜன் குழுவை அமைத்தது. குழு அமைக்கப்பட்ட போதிலும், இரு மாநிலங்களுக்கும் எந்த உடன்பாடும் எட்டப்படவில்லை. இப்போது இந்த வழக்கு உச்ச நீதிமன்றத்தில் உள்ளது. இப்போது இந்த எல்லை பிரச்சினை வலுவாக வெடித்துள்ளது.
மகாராஷ்டிர மாநிலம் சாங்லி மாவட்டத்தில் உள்ள கிராமங்கள் கடுமையான தண்ணீர் பஞ்சத்தை எதிர்கொண்டு வருவதால், கர்நாடகாவுடன் இணைக்க வேண்டும் என்று அந்த கிராமங்களில் தீர்மானம் நிறைவேற்றப்பட்டதாக கர்நாடக முதல்வர் பசவராஜ் பொம்மை கூறியிருந்தார். இதை கடுமையாக கண்டித்த மகாராஷ்டிரா துணை முதல்வர் தேவேந்திர ஃபட்னாவிஸ், ”அதுபோன்ற எந்த தீர்மானமும் இயற்றப்படவில்லை. மகாராஷ்டிராவில் எந்த கிராமமும் கர்நாடகாவுக்குச் செல்லாது.
பெல்காம்-கார்வார்-நிபானி உள்ளிட்ட மராத்தி மொழி பேசும் கிராமங்களைப் பெற உச்ச நீதிமன்றத்தில் மாநில அரசு வலுவாகப் போராடும்” என்று கூறினார். அதைத் தொடர்ந்து இரு மாநிலங்களுக்கு இடையேயும் மோதல் போக்கு வலுத்தது. கர்நாடகாவிற்குள் நுழைந்த மகாராஷ்டிரா பேருந்து தாக்கப்பட்டது. மகாராஷ்டிராவில் கர்நாடகா முதல்வரின் உருவம் கருப்பு மை பூசி அழிக்கப்பட்டது. இப்படியாக மோதல் வலுத்து வருகிறது.
மேலும் எல்லை பிரச்சனை தொடர்பாக மகாராஷ்டிரா துணை முதல்வர் தேவேந்திர பட்நாவிஸ், ஒன்றிய உள்துறை அமைச்சர் அமித்ஷா சந்தித்து பேசினார். அதேபோல் கர்நாடகா எம்பிக்களும், தேவைப்பட்டால் நானும் ஒன்றிய உள்துறை அமைச்சர் அமித்ஷாவை சந்தித்து பேசுவேன் என கர்நாடக முதல்வர் பசவராஜ் பொம்மை தெரிவித்தார். இந்தநிலையில் பெலகாவியில் கர்நாடக சட்டப்பேரவை நடந்து வரும் நிலையில், சர்ச்சைக்குரிய பகுதிகள் கர்நாடகாவிற்கே சொந்தம் என சட்டப்பேரவை தீர்மானம் நிறைவேற்றப்பட்டது.
இந்தநிலையில் மகாராஷ்டிரா சார்பில் அடுத்த வாரம் தீர்மானம் நிறைவேற்றப்படும் என்றும், அது கர்நாடகா தீர்மானத்தை விட 10 மடங்கு வலுவானதாக இருக்கும் என மகாராஷ்டிரா அமைச்சர் தெரிவித்துள்ளார். இது குறித்து அமைச்சர் சம்புராஜ் தேசாய் கூறும்போது, ‘‘ எல்லை பிரச்சனை தொடர்பாக மிக விரிவான தீர்மானம், வருகிற திங்கள் கிழமை மகாராஷ்டிரா சட்டப்பேரவையில் நிறைவேற்றப்படும். அது கர்நாடகா நிறைவேற்றியதை விட 10 மடங்கு வலுவானதாக இருக்கும்.
யாத்திரையை நிறுத்த சாக்குபோக்குகள் சொல்லப்படுகின்றன; ராகுல்காந்தி பதிலடி.!
இரு மாநில முதல்வர்களும் ஒன்றிய உள்துறை அமைச்சரை சந்தித்து பேசினர். அப்போது முடிவு செய்யப்பட்டதை கர்நாடகா முதல்வர் ஏற்கவில்லை. மகாராஷ்டிரா முதல்வரும், துணை முதல்வரும் பேச்சு வார்த்தை மூலமாக இந்த பிரச்சனையை தீர்க்க ஆவலோடு உள்ளனர். ஆனால் கர்நாடகா அதை விரும்பவில்லை. மகாராஷ்டிரா தலைவர்கள் சர்ச்சைகுரிய பகுதிகளுக்குச் சென்றால் தடுத்து நிறுத்தப்படுகின்றனர். தீர்மானம் நிறைவேற்றப்பட்ட பிறகு ஒன்றிய உள்துறை அமைச்சரிடம் எங்களது நிலைப்பாடை வலுவாக தெரிவிப்போம்’’ என அவர் தெரிவித்தார்.