மூக்கு வழி செலுத்தும் தடுப்பு மருந்து மத்திய சுகாதார அமைச்சகம் அனுமதி| Nasal prophylactic drug approved by Union Ministry of Health

புதுடில்லி,?:’பாரத் பயோடெக்’ நிறுவனம் தயாரித்துள்ள மூக்கு வழியாக செலுத்தப்படும் கொரோனா தடுப்பு மருந்துக்கு, மத்திய சுகாதார அமைச்சகம் அனுமதி அளித்துள்ளது.

இதை, 18 மற்றும் அதற்கு மேற்பட்ட வயது உடையோர், ‘பூஸ்டர் டோசாக’ செலுத்தலாம்.

நம் நாட்டில் கொரோனா தொற்றை கட்டுப்படுத்துவதற்காக, தெலுங்கானா மாநிலம் ஹைதராபாதை தலைமையிடமாக வைத்து செயல்படும் பாரத் பயோடெக் நிறுவனம் ஏற்கனவே ‘கோவாக்சின்’ என்ற தடுப்பூசியை தயாரித்தது.

இது, நம் நாட்டில் மட்டுமல்லாமல் வெளிநாடுகளுக்கும் ஏற்றுமதி செய்யப்பட்டது.

இந்நிலையில் இந்நிறுவனம் ஊசியாக இல்லாமல், மூக்கு வழியாக செலுத்தும் வகையிலான, ‘இன்கோவேக்’ என்ற பெயரில் கொரோனா தடுப்பு மருந்தை தயாரித்துள்ளது.

இரண்டு சொட்டுகள் உடைய இந்த மருந்தை, 18 மற்றும் அதற்கு மேற்பட்ட வயதுடையோர், பூஸ்டர் டோசாக செலுத்தலாம்.

குறிப்பாக, கோவாக்சின் அல்லது ‘கோவிஷீல்டு’ தடுப்பூசி செலுத்தியவர்கள் இதை பூஸ்டர் டோசாக செலுத்தலாம்.

இந்த மருந்துக்கு, மத்திய சுகாதார அமைச்சகம் அனுமதி அளித்துள்ளதை அடுத்து, இது தற்போது தனியார் மருத்துவமனைகளில் விற்பனைக்கு அனுப்பி வைக்கப்பட்டுள்ளது.

‘கோவின்’ இணையதளத்தில் பதிவு செய்தும் இதை பெறலாம்.

இந்த மருந்தின் மூன்று கட்ட பரிசோதனைகள் ஏற்கனவே வெற்றிகரமாக முடிந்து விட்டதை அடுத்து, மத்திய அரசின் மருந்து கட்டுப்பாட்டு துறை இதற்கு சில மாதங்களுக்கு முன் அனுமதி அளித்தது.

அமெரிக்காவின் வாஷிங்டனில் உள்ள செயின்ட் லுாயிஸ் பல்கலையுடன் இணைந்து, இந்த மருந்தை பாரத் பயோடெக் நிறுவனம் தயாரித்துள்ளது.