தமிழ்நாட்டு மாணவர்கள் JEE 2023 விண்ணப்பம் பூர்த்தி செய்வதில் உள்ள சிக்கல் தொடர்பாக பள்ளிக் கல்வித்துறை அமைச்சர் அன்பில் மகேஷ் பொய்யாழிக்கு விழுப்புரம் எம்.பி., ரவிக்குமார் கடிதம் எழுதியுள்ளார்.
இதுகுறித்து அவர் எழுதியுள்ள கடிதத்தில் கூறியிருப்பதாவது: “ஐஐடி, என்.ஐ.டி உள்ளிட்ட தேர்வுகளுக்கு நேஷனல் டெஸ்டிங் ஏஜென்சி மூலம் நடத்தப்படும் JEE 2023 தேர்வுக்கு விண்ணப்பிப்பதற்கான அறிவிப்பு கடந்த 15.12.2022 அன்று இந்திய ஒன்றிய அரசால் வெளியிடப்பட்டுள்ளது. அந்தத் தேர்வுக்கு ஆன்லைன் மூலமாக விண்ணப்பிக்க வேண்டும். விண்ணப்பத்தில் பத்தாம் வகுப்பில் தேர்ச்சி பெற்றபோது ஒவ்வொரு பாடத்திலும் பெற்ற மதிப்பெண்களையும் அதன் சதவீதத்தையும் குறிப்பிடும்படிக் கோரப்பட்டுள்ளது.
இந்த ஆண்டு JEE 2023 தேர்வுக்கு விண்ணப்பிக்கும் தமிழ்நாட்டைச் சேர்ந்த மாணவர்கள் 2021 ஆம் ஆண்டு பத்தாம் வகுப்பு தேர்ச்சி பெற்றவர்கள் ஆவார்கள். 2021 இல் கொரோனா பெருந்தொற்று காரணமாக மாநிலக் கல்வி வாரியத்தில் படித்த அனைத்து மாணவர்களும் 10 ஆம் வகுப்பில் தேர்ச்சி பெற்றவர்களாகத் தமிழ்நாடு அரசு அறிவித்தது. அவர்களுக்கு 10 ஆம் வகுப்பில் ஒவ்வொரு பாடத்துக்கு எதிரேயும் மதிப்பெண் குறிப்பிடுவதற்குப் பதிலாக ’தேர்ச்சி’ என்று மட்டும் குறிக்கப்பட்டது. அதன் காரணமாக இப்போது JEE 2023 தேர்வுக்கு விண்ணப்பிக்கும் மாநிலக் கல்வி வாரியத்தில் பயின்ற மாணவர்களால் அந்த விண்ணப்பத்தில் மதிப்பெண்களையோ சதவீதத்தையோ குறிப்பிட முடியாத நிலை உள்ளது.
அவ்வாறு குறிப்பிடாவிட்டால் அந்த விண்ணப்பத்தைப் பூர்த்தி செய்ய முடியாதபடி அந்த விண்ணப்பம் வடிவமைக்கப்பட்டிருக்கிறது. கடந்த ஆண்டு 39,348 மாணவர்கள் இந்தத் தேர்வை எழுதியதில் 9918 பேர் தேர்ச்சி பெற்றனர். மாநிலக் கல்வி வாரியத்தில் படித்து தேர்வுக்கு விண்ணப்பிக்க விரும்பும் பல்லாயிரக் கணக்கான மாணவர்கள் இந்த ஆண்டு பாதிக்கப்படுவார்கள் எனத் தெரிகிறது.
இந்தப் பிரச்சனைக்கு உடனடியாகத் தமிழ்நாடு அரசின் பள்ளிக்கல்வித்துறை தீர்வு காண வேண்டும். இல்லாவிட்டால் நமது மாநிலப் பாடத்திட்டத்தின்கீழ் பயின்ற அரசுப் பள்ளி மாணவர்களும் தனியார் பள்ளி மாணவர்களும் JEE 2023 தேர்வுக்கு விண்ணப்பிக்க முடியாதது மட்டுமின்றி எவரும் ஐஐடி, என்ஐடி போன்ற படிப்புகளில் சேர முடியாத நிலை ஏற்படும். நமது மாணவர்களின் இந்த இக்கட்டான நிலை கருதி 10 ஆம் வகுப்பு மதிப்பெண்களை பூர்த்தி செய்யாமல் விண்ணப்பிக்கும் விதத்தில் விண்ணப்பத்தை மாற்றி அமைக்கும்படி நேஷனல் டெஸ்டிங் ஏஜன்சியிடம் அனுமதி பெற்றுத் தருமாறு பணிவோடு கேட்டுக்கொள்கிறேன்.” இவ்வாறு அதில் கூறப்பட்டுள்ளது.