பாம்பன் ரயில் பாலத்தில் நடைபெறும் பராமரிப்பு பணிகள் காரணமாக சென்னையில் இருந்து டிசம்பர் 31 ஆம் தேதி முதல் ஜனவரி 9 வரை புறப்பட வேண்டிய ராமேஸ்வரம் விரைவு ரயில்கள் (மெயின் லைன், கார்ட் லைன் வழி ரயில்கள்) மற்றும் ஜனவரி 1 முதல் ஜனவரி 10 வரை ராமேஸ்வரத்தில் இருந்து புறப்பட வேண்டிய சென்னை எழும்பூர் விரைவு ரயில்கள் (மெயின் லைன், கார்ட் லைன் வழி ரயில்கள்) ராமேஸ்வரம் – மண்டபம் இடையே பகுதியாக ரத்து செய்யப்படுவதாக அறிவிக்கப்பட்டுள்ளது.
ஜனவரி 1 ஆம் தேதி முதல் ஜனவரி 10 ஆம் தேதி வரை திருச்சி – ராமேஸ்வரம் – திருச்சி, மற்றும் அனைத்து மதுரை – ராமேஸ்வரம் – மதுரை விரைவு ரயில்கள் இரு மார்க்கத்திலும் ராமநாதபுரம் – ராமேஸ்வரம் இடையே பகுதியாக ரத்து செய்யப்படுவதாக அறிவிக்கப்பட்டுள்ளது.
அதேபோல இதே காலத்தில் அயோத்தியா, புவனேஸ்வர், ஹூப்ளி, செகந்திராபாத் மற்றும் கோயம்புத்தூர் ஆகிய ரயில் நிலையங்களில் இருந்து ராமேஸ்வரத்திற்கு வருகை தரவேண்டிய வாராந்திர விரைவு ரயில்களும் ராமேஸ்வரம் – ராமநாதபுரம் ரயில் நிலையங்களுக்கிடையே பகுதியாக ரத்து செய்யப்படுவதாக அறிவிக்கப்பட்டுள்ளது.
இருந்தபோதிலும், ராமேஸ்வரத்தில் இருந்து அயோத்தியா, புவனேஸ்வர், ஹூப்ளி, செகந்திராபாத், கோயம்புத்தூர் செல்லும் வாராந்திர விரைவு ரயில்கள் மண்டபத்தில் இருந்து இயக்கப்படும் என அறிவிக்கப்பட்டுள்ளது. மற்ற வாராந்திர மற்றும் வாரம் மும்முறை சேவை ரயில்கள் மண்டபம் – ராமேஸ்வரம் இடையே பகுதியாக ரத்து செய்யப் பட்டுள்ளது.
ராமேஸ்வரம் தீவை தமிழகத்தின் நிலப்பரப்புடன் இணைக்கும் 2.05 கி.மீ நீள புதிய பாம்பன் ரயில் பாலத்தின் மறுசீரமைப்புப் பணிகள் தீவிரமாக நடைபெற்று வருகின்றன. அதிநவீன தொழில்நுட்பங்களுடன் கட்டப்பட்டு இந்த பாலத்தின் கட்டுமானப் பணிகள் தற்போது வரை 84% நிறைவடைந்துள்ளதாக தெரிவிக்கப்பட்டுள்ளது. இந்த அதிநவீன பாலம் நாட்டின் முதல் செங்குத்து லிஃப்ட் ரயில்வே கடல் பாலமாக இருக்கும். இது 2023 மார்ச் மாதத்திற்குள் கட்டி முடிக்கப்படும் என்று எதிர்பார்க்கப்படுகிறது.
ராமேஸ்வரத்தை இந்தியாவின் நிலப்பரப்புடன் இணைக்கும் பாம்பன் ரயில் பாலம் 105 ஆண்டுகள் பழமையானது. மன்னார் வளைகுடாவில் அமைந்துள்ள ராமேஸ்வரம் தீவுடன் மண்டபத்தை இணைக்க 1914 ஆம் ஆண்டு அசல் பாலம் கட்டப்பட்டது. 1988 இல் கடல் ரயில் பாலத்துக்கு இணையாக ஒரு புதிய சாலைப் பாலம் கட்டப்படும் வரை இரண்டு இடங்களையும் இணைக்கும் ஒரே இணைப்பாக இது இருந்தது என்பது குறிப்பிடத்தக்கது.