பொங்கல் பரிசுத் தொகுப்பு திட்டத்தை முதலமைச்சர் மு.க.ஸ்டாலின் இன்று தொடங்கி வைக்க இருந்த நிலையில், அந்தத் திட்டம், 9 ஆம் தேதிக்கு தள்ளி வைக்கப்பட்டு இருப்பது, ரேஷன் அட்டைதாரர்களிடையே கடும் அதிருப்தியை ஏற்படுத்தி உள்ளது.
தமிழகத்தில், தைப் பொங்கல் பண்டிகையை பொது மக்கள் வெகு விமரிசையாக கொண்டாடும் நோக்கில், அரசு சார்பில், நியாய விலைக் கடைகள் மூலம், தகுதி வாய்ந்த அரிசி ரேஷன் அட்டைதாரர்களுக்கு, பொங்கல் பரிசுத் தொகுப்பு வழங்கப்படும். மேலும், அதனுடன், ரொக்கப் பணமும் வழங்கப்படும்.
அந்த வகையில், 2023 ஆம் ஆண்டு வர உள்ள பொங்கல் பண்டிகையை முன்னிட்டு, அரிசி குடும்ப அட்டைதாரர்கள் மற்றும் இலங்கைத் தமிழர் முகாம்களில் வசிக்கும் மக்களுக்கு தலா ஒரு கிலோ பச்சரிசி, சர்க்கரை ஆகியவற்றுடன், 1,000 ரூபாய் பரிசுத் தொகையும் வழங்கப்படும் என, கடந்த சில நாட்களுக்கு முன்பு, முதலமைச்சர் மு.க.ஸ்டாலின் அறிவித்தார்.
மேலும், இந்தத் திட்டத்தை, ஜனவரி மாதம் 2 ஆம் தேதி அதாவது இன்று, அவர் தொடங்கி வைக்க இருப்பதாகவும் அறிவிக்கப்பட்டு இருந்தது. மேலும், பொங்கல் பரிசு தொகுப்பு மற்றும் பொங்கல் பரிசுத் தொகையை பெறுவதற்கான டோக்கன் வினியோகமும் நடைபெற்று வருவதாகவும் தெரிவிக்கப்பட்டு இருந்தது.
இந்நிலையில், பொங்கல் பரிசுத் தொகுப்பு திட்டத்தை முதலமைச்சர் மு.க.ஸ்டாலின் இன்று தொடங்கி வைப்பார் என அறிவிக்கப்பட்டு இருந்த நிலையில், அந்தத் திட்டம், 9 ஆம் தேதிக்கு தள்ளி வைக்கப்பட்டு இருப்பது, ரேஷன் அட்டைதாரர்களிடையே கடும் அதிருப்தியை ஏற்படுத்தி உள்ளது.
இதே போல், தமிழகம் முழுவதும் பொங்கல் பரிசு தொகுப்பு மற்றும் பொங்கல் பரிசுத் தொகையை பெறுவதற்கான டோக்கன், நாளை முதல் 8 ஆம் தேதி வரை வினியோகம் செய்யப்பட இருப்பதாகவும் அறிவிக்கப்பட்டு உள்ளது. முன்னர், டிசம்பர் 30 ஆம் தேதி முதல் டோக்கன் வினியோகம் செய்யப்படும் என, அமைச்சர் பெரிய கருப்பன் அறிவித்திருந்த நிலையில், தற்போது புதிய தேதி அறிவிக்கப்பட்டு உள்ளது.
டோக்கனில், பொங்கல் பரிசுத் தொகுப்பு வழங்கப்படும் தேதி, நேரம் உள்ளிட்ட விபரங்கள் இடம் பெற்றிருக்கும். பொங்கல் பரிசுத் தொகுப்புடன் கரும்பு சேர்த்து வழங்க தமிழக அரசு உத்தரவிட்டதால் இந்தத் திட்டம் தள்ளிப் போனதான கோட்டை வட்டாரங்கள் தகவல் தெரிவிக்கின்றன.