பெங்களூரு:
கன்னடத்தில் முன்னணி நடிகராக இருப்பவர் கிஷோர் குமார். இவர் தமிழில் ‘வெண்ணிலா கபடி குழு’, ‘ஆடுகளம்’ உள்ளிட்ட திரைப்படங்களிலும் நடித்து உள்ளார். கடந்த ஆண்டு (2022) வெளியாகி பெரிய வெற்றியை பெற்ற காந்தாரா திரைப்படத்திலும் வனத்துறை அதிகாரி வேடத்தில் கிஷோர் குமார் நடித்து இருந்தார். சமூக பிரச்சினைகளை துணிவாக பேசும் கிஷோர் குமார், சமூக பிரச்சினைகள் பற்றி டுவிட்டரில் கருத்துகளை பதிவிட்டு வந்தார்.
காந்தாரா திரைப்படத்தை விமர்சிப்பவர்கள் ரத்தம் கக்கி மரணம் அடைவார்கள் என்றும் அவர் டுவிட்டரில் வீடியோ வெளியிட்டு இருந்தார். சில நேரத்தில் சர்ச்சைக்குரிய கருத்துகளையும் அவர் பதிவிட்டு வந்தார். இந்த நிலையில் டுவிட்டர் விதிகளை மீறியதாக கூறி கிஷோர் குமாரின் டுவிட்டர் கணக்கு திடீரென முடக்கப்பட்டு உள்ளது. அவர் டுவிட்டர் கணக்கு எப்போது முடக்கப்பட்டது என்பது குறித்து தகவல் வெளியாகவில்லை.