மக்களவை, சட்டப்பேரவைத் தேர்தல்களில் தற்போது மின்னணு வாக்குப்பதிவு இயந்திரம் பயன்படுத்தப்படுகிறது. இந்நிலையில், எங்கிருந்தாலும் வாக்களிக்கும் வகையில், ரிமோட் வாக்குப்பதிவு இயந்திரம் (ஆர்விஎம் – ரிமோட் எலெக்ட்ரானிக் வோட்டிங் மெஷின்) என்ற புதிய மின்னணு வாக்குப்பதிவு இயந்திரத்தை தலைமை தேர்தல் ஆணையம் அறிமுகம் செய்யவுள்ளது.
இந்த இயந்திரம் தொடர்பாக வருகிற ஜனவரி 16ஆம் தேதியன்று தேர்தலை ஆணையம் செயல்முறை விளக்கம் அளிக்கவுள்ளது. இதற்காக, அனைத்துக் கட்சிகளுக்கும் தேர்தலை ஆணையம் அழைப்பு விடுத்துள்ளது. அத்துடன், இந்த புதிய நடைமுறை தொடர்பாக ஏற்கெனவே அரசியல் கட்சிகளிடம் கருத்துகள் பகிர்ந்து கொள்ளப்பட்டதாக தெரிவித்துள்ள தேர்தல் ஆணையம், அங்கீகரிக்கப்பட்ட அரசியல் கட்சிகள் ஜனவரி 31ஆம் தேதிக்குள் தங்கள் கருத்துகளை தலைமை தேர்தல் ஆணையத்திடம் தெரிவிக்குமாறும் கேட்டுக் கொண்டுள்ளது.
அந்த வகையில், தமிழ்நாடு மாநில தேர்தல் ஆணையம் அதிமுகவுக்கும் அழைப்பு விடுத்திருந்தது. தமிழ்நாடு தலைமைத் தேர்தல் அதிகாரி சத்யபிரதா சாகு அனுப்பிய அந்தக் கடிதத்தில், அதிமுக ஒருங்கிணைப்பாளர், இணை ஒருங்கிணைப்பாளர் எனக் குறிப்பிடப்பட்டிருந்தது.
ஆனால், தமிழ்நாடு மாநில தலைமை தேர்தல் அதிகாரி சத்யபிரதா சாகு அனுப்பிய கடிதத்தை அதிமுக திருப்பி அனுப்பியது. தலைமை தேர்தல் அதிகாரி குறிப்பிட்ட பதவியில் யாரும் இல்லை என கூறி கடிதத்தை ஏற்க மறுப்பு தெரிவித்து அதிமுக திருப்பி அனுப்பியது. இதையடுத்து, அதிமுக தலைமை அலுவலகத்திற்கு ஒருங்கிணைப்பாளர் – இணை ஒருங்கிணைப்பாளர் எனக் குறிப்பிட்டு அந்த கடிதத்தை தமிழக தேர்தல் ஆணையம் மீண்டும் அனுப்பியது. ஆனால், அந்த கடிதத்தையும் அதிமுக திருப்பி அனுப்பியது.
இந்த நிலையில், அதிமுக கடிதம் வாங்க மறுப்பதாக தகவல் தெரிவித்துள்ள தமிழ்நாடு தலைமை தேர்தல் அதிகாரி சத்யபிரதா சாகு, கடிதத்தை அதிமுக வாங்க மறுப்பது பற்றி தேர்தல் ஆணையத்திடம் தெரியப்படுத்தியுள்ளார். ஒருங்கிணைப்பாளர், இணை ஒருங்கிணைப்பாளர் என குறிப்பிட்டு 2 முறை கடிதம் அனுப்பியும்
தரப்பு 2 முறையும் திருப்பி அனுப்பியுள்ளது. இதுபற்றி தலைமைத் தேர்தல் ஆணையத்திற்கு மின்னஞ்சல் மூலம் சத்யபிரதா சாகு தெரியப்படுத்தியுள்ளார்.
அதிமுகவில் ஒற்றைத் தலைமை விவகாரம் தீவிரமாகியுள்ள நிலையில், ஒருங்கிணைப்பாளர், இணை ஒருங்கிணைப்பாளர் பதவிகளை ரத்து செய்து இடைக்கால பொதுச் செயலாளராக எடப்பாடி பழனிசாமி தேர்வு செய்யப்பட்டுள்ளார். இதனை எதிர்த்து ஓபிஎஸ் தொடர்ந்த வழக்கு உச்ச நீதிமன்றத்தில் நிலுவையில் உள்ளது. இதனிடையே, இடைக்காலப் பொதுச்செயலாளராக எடப்பாடி பழனிசாமி தாக்கல் செய்த வரவு-செலவு கணக்கை இந்திய தேர்தல் ஆணையம் தனது வலைதளப் பக்கத்தில் பதிவிட்டது. அதேபோல், சட்டத்துறை ஆணையம் எடப்பாடி பழனிசாமியை அதிமுக இடைக்கால பொதுச்செயலாளர் என குறிப்பிட்டு கடிதம் அனுப்பியிருந்தது.
ஆனால், தமிழ்நாடு தேர்தல் ஆணையம் ஒருங்கிணைப்பாளர் – இணை ஒருங்கிணைப்பாளர் எனக் குறிப்பிட்டு கடிதம் அனுப்பியது. இது பேசுபொருளான நிலையில், அந்த கடிதங்களை எடப்பாடி பழனிசாமி தரப்பு திருப்பி அனுப்பியுள்ளது.
முன்னதாக, இந்திய தேர்தல் ஆணையம் கொடுத்த ஆவணங்கள் அடிப்படையில்தான் ஒருங்கிணைப்பாளர், இணை ஒருங்கிணைப்பாளர் என முகவரியிட்டு அதிமுகவுக்கு கடிதம் அனுப்பப்பட்டதாக சத்யபிரதா சாகு தெரிவித்தார். மேலும், கடிதத்தை வாங்க அதிமுக மறுப்பதாக தற்போது தலைமை தேர்தல் ஆணையத்திடம் அவர் தெரியபடுத்தியுள்ளார். தேர்தல் ஆணையத்துடனான இந்த மோதல் போக்கு, எடப்பாடி பழனிசாமிக்கு சிக்கலை ஏற்படுத்தலாம் என்கிறார்கள்.