இந்திய ஜனநாயக கட்சி தலைவர் பாரிவேந்தர் என்ற பச்சமுத்து. இவரது தலைமையின் கீழ் இயங்கும் ஐஜேகே கடந்த 2019ம் ஆண்டு நாடாளுமன்றத் தேர்தலில் திமுகவுடன் கூட்டணி அமைத்து போட்டியிட்டது.
இந்த தேர்தலில் ஐஜேகே கட்சிக்கு பெரம்பலூர் மக்களவை தொகுதி ஒதுக்கப்பட்ட நிலையில் உதய சூரியன் சின்னத்தில் போட்டியிட்டு பாரிவேந்தர் அமோக வெற்றி பெற்றார்.
இதன் பிறகு பச்சமுத்து பெரம்பலூர் தொகுதி பக்கமே தலைகாட்டவில்லை என்கிற குற்றச்சாட்டு தொகுதி மக்கள் மத்தியில் எழுந்தது. இதை ஈடு செய்யும் வகையில் இந்த ஆண்டும் தனது தொகுதியைச் சேர்ந்த 300 மாணவர்களுக்கு எஸ்ஆர்எம் பல்கலைக்கழகத்தில் இலவச கல்வி வழங்குவதாகக் கூறி தனது இருப்பை பாரிவேந்தர் தக்கவைத்துக் கொண்டார்.
கூட்டணியில் இருந்து பாரிவேந்தர் வெளியேறி விட்டாலும், மக்களவை உள்ளிட்ட முக்கியமான இடங்களில் எல்லாம் இன்னமும், திமுக எம்.பியாகவே தன்னை அடையாளப்படுத்தி வருவதாக கூறப்படுகிறது.
இதற்கிடையே சமீபகாலமாக செய்தியாளர்களை சந்திக்கும் பாரிவேந்தர் மத்திய பாஜக அரசுக்கு ஆதரவாகவும், தமிழ்நாடு அரசுக்கு எதிராகவும் கருத்துகளை கூறி பரபரப்பை ஏற்படுத்தி வருகிறார்.
மேலும், வருகிற 2024ம் ஆண்டு நடக்க இருக்கும் நாடாளுமன்றத் தேர்தலில் ஐஜேகே தனித்துப் போட்டியிடும் அல்லது தேசிய கட்சியுடன் கூட்டணி அமைக்க வாய்ப்பு உள்ளதாக கூறி வருகிறார்.
இவ்வாறு கூறி வரும் பாரிவேந்தர் சமீபகாலமாக பாஜகவுடன் அதிக நெருக்கம் காட்டி வருகிறார். இதன் பலனாக பாரிவேந்தர் வரும் தேர்தலில் பாஜகவுடன் தேர்தல் கூட்டணி அமைக்க வாய்ப்பு உள்ளதாக பரவலாக பேசப்படுகிறது.
இவ்வாறு கூட்டணியில் பாரிவேந்தர் இணையும் பட்சத்தில் பெரம்பலூர் தொகுதியையே பாரிவேந்தருக்கு மீண்டும் பெற்று தருவதாக பாஜக உறுதியளித்திருப்பதாக நம்பத்தகுந்த வட்டாரங்கள் கிசுகிசுத்தன.
அதுமட்டும் இல்லாமல் இனி தேர்தலில் போட்டியிடும் அளவுக்கு உடல்நிலை இடம் தராது என்பதால் தனக்கு பதிலாக மகன் ரவி பச்சமுத்துவை நிறுத்த முடிவெடுத்து உள்ளதாகவும் பெரம்பலூர் மக்களவை தொகுதிக்குள் பேச்சு ஒலிக்கிறது.
இந்த பரபரப்பான சூழலில் பாரிவேந்தருக்கு சொந்தமான டிவி நிருபர் பாஜக மாநில தலைவர் அண்ணாமலையை கேள்விகளால் நிலை குலைய செய்ததும் அதற்கு அண்ணாமலை, ‘ என்னை கேள்வி கேட்க உங்களுக்கு எப்படி உரிமை இருக்கோ, அதே கேள்வி கேட்கும் உரிமை எனக்கு இருக்கு.
இங்க வர்றவங்க எல்லாரும் கட்சியில யாரோ சொன்னாங்கன்னு தான் தூக்கிட்டு வர்றீங்க. உங்களுக்கு திமுக கிட்ட கேள்வி கேட்க தைரியம் இருக்கா? கமலாலயம் வந்தா மட்டும் எக்ஸ்ட்ரா தைரியம் வருது?
கட்சி சேனல் நடத்துறவங்க எல்லாம்.. என் கிட்ட பேசாதீங்க. டிஜிட்டல் மீடியா, யூடியூப், 4 லைக் போட வேண்டும், 4 ட்வீட் போட வேண்டும்னு 40,000 ரூபாய் கேமராவை வாங்கிட்டு வந்து பிரஸ் மீட்டில் உட்கார்ந்துட்டு பேசுறாங்க.
நீங்க பண்றது எவ்வளவு பெரிய அநியாயம் பாருங்க’ என, பேசியதோடு, பாரிவேந்தருக்கு சொந்தமான டிவி நிருபரிடம், ‘உங்க சேனல் பேர் என்ன?’ என, கேட்டு அண்ணாமலை பெரும் சர்ச்சையில் சிக்கியுள்ளார்.
அண்ணாமலை இவ்வாறு பேசி இருப்பது பத்திரிகையாளர்கள் மத்தியில் பெரும் கொந்தளிப்பை ஏற்படுத்தி இருக்கும் அதே சமயம், பாஜ கூட்டணிக்கு தூது அனுப்பி கொண்டு இருந்த பாரிவேந்தருக்கும் தற்போது நெருக்கடியை தந்து உள்ளதாக கூறப்படுகிறது.
பத்திரிகையாளர்களிடம் வாயைக் கொடுத்து வம்பில் சிக்கிக் கொள்வது அண்ணாமலைக்கு பழக்கப்பட்ட ஒன்று. இதன் மூலம், பாஜக மானத்தை கப்பல் ஏறுவதற்கு அண்ணாமலையே வழிவகுப்பதாக கட்சிக்குள்ளேயே ஒரு பேச்சு உள்ளது.
அண்ணாமலையின் இத்தகைய செயல்களால் மானம் போவது ஒருபுறம் என்றாலும் பாஜகவின் செல்வாக்கும் ஒரு சாண் ஏறினால் 4 முழம் அளவுக்கு இறங்கி போய் விடுகிறது.
இதனாலேயே டெல்லித் தலைமை அண்ணாமலையை அவ்வப்போது அழைத்து, ரெய்டு விட்டு வருவதாக செய்திகள் கசியும். இப்படிப்பட்டச் சூழலில் தேரை இழுத்து தெருவில் விடுவது போல் தற்போது பாஜக மாநில தலைவர் அண்ணாமலையுடன் கூட்டணி கை கோர்க்க காத்திருக்கும் பாரிவேந்தருக்கு சொந்தமான டிவி நிருபரே பிரச்சனைக்கு பிள்ளையார் சுழி போட்டுள்ளது முக்கியத்துவம் வாய்ந்ததாக பார்க்கப்படுகிறது.
இதனையே காரணமாக வைத்து பாரிவேந்தரை பாஜக கூட்டணியில் சேர்க்காமல் அண்ணாமலை கை கழுவும் முடிவுக்கு வந்துள்ளதாக பரவலாகப் பேசப்படுவதால் தமிழக அரசியலில் பரபரப்பான சூழல் நிலவி வருகிறது.