கேரள மாநிலத்தில் உள்ள சபரிமலை ஐயப்பன் கோயிலில் மகர விளக்கு பூஜையை ஒட்டி நடை திறக்கப்பட்டுள்ளது. இதையொட்டி தமிழகத்தின் பல்வேறு பகுதிகளில் இருந்து பக்தர்கள் சென்ற வண்ணம் இருக்கின்றனர். தினசரி ஒரு லட்சம் பக்தர்கள் என சபரிமலையில் கூட்டம் அலைமோதிக் கொண்டிருக்கிறது. இதன் காரணமாக 8 மணி நேரத்திற்கு மேல் காத்திருந்து தரிசனம் செய்ய வேண்டிய நிலை ஏற்பட்டுள்ளது.
வேன் கவிழ்ந்து விபத்து
இந்நிலையில் சென்னை தாம்பரம் பகுதியில் இருந்து 22 ஐயப்ப பக்தர்கள் தனியார் வேன் ஒன்றின் மூலம் சபரிமலைக்கு புறப்பட்டனர். இவர்களின் வேன் சென்னை – திருச்சி நெடுஞ்சாலையில் பயணித்து கொண்டிருந்தது. இந்த சூழலில் திண்டிவனம் டி.வி நகர் என்ற இடத்தில் இன்று அதிகாலை 5.15 மணியளவில் வந்த போது, வேன் திடீரென கட்டுப்பாட்டை இழந்தது.
18 பேர் படுகாயம்
உடனே யாரும் எதிர்பாராத வகையில் அருகிலிருந்த சிறிய பள்ளம் ஒன்றில் கவிழ்ந்து விபத்தில் சிக்கியது. இந்த விபத்தில் 8 வயது சிறுமி உட்பட 18 பேர் படுகாயம் அடைந்தனர். பக்தர்களின் அலறல் சத்தம் கேட்டு அக்கம் பக்கத்தில் இருந்த மக்கள் ஓடிவந்தனர். உடனே ஆம்புலன்ஸ் மற்றும் போலீசாருக்கு தகவல் தெரிவித்தனர். காயமடைந்த அனைவரும் 108 ஆம்புலன்ஸ் மூலம் மீட்கப்பட்டு, திண்டிவனம் அரசு மருத்துவமனைக்கு கொண்டு செல்லப்பட்டனர்.
என்ன காரணம்?
அவர்களுக்கு அங்கு சிகிச்சை அளிக்கப்பட்டு வருகிறது. இந்நிலையில் மேல் சிகிச்சைக்காக 10க்கும் மேற்பட்டோர் முண்டியம்பாக்கம் அரசு மருத்துவமனைக்கு அனுப்பி வைக்கப்பட்டனர். இந்த விபத்து தொடர்பாக திண்டிவனம் போலீசார் வழக்குப்பதிவு செய்து விசாரணை நடத்தி வருகின்றனர். முதற்கட்ட விசாரணையில் ஓட்டுநர் சந்திரசேகர் தூக்க கலக்கத்தில் ஓட்டியதால் வேன் பள்ளத்தில் கவிழ்ந்தது தெரியவந்தது.
வேலூரில் மற்றொரு விபத்து
இதேபோல் நேற்றைய தினம் வேலூரில் இருந்து புறப்பட்டு சென்ற ஐயப்ப பக்தர்களின் வேன், கேரள மாநிலம் கோட்டயம் அருகே விபத்தில் சிக்கியது. வேன் கட்டுப்பாட்டை இழந்ததால் தடுப்பு சுவரில் மோதிய விபத்திற்கு ஆளானதாக சொல்லப்படுகிறது. இதில் 17 பேர் படுகாயம் அடைந்து அருகிலுள்ள மருத்துவமனையில் சிகிச்சைக்காக அனுமதிக்கப்பட்டுள்ளனர். அவர்களில் 5 பேரின் நிலை கவலைக்கிடமாக இருப்பதாக தகவல்கள் தெரிவிக்கின்றன.
போலீசார் அறிவுறுத்தல்
இந்த விபத்திலும் ஓட்டுநர் தூக்க கலக்கத்தில் வேனை ஓட்டிச் சென்றது போலீசார் விசாரணையில் தெரியவந்துள்ளது. எனவே அதிகாலை நேரப் பயணங்களின் போது மிகவும் வாகனங்களை ஓட்டுமாறு போலீசார் அறிவுறுத்தியுள்ளனர். ஏதேனும் ஓரிடத்தில் நிறுத்தி சூடான பானங்களை அருந்தலாம். இல்லையெனில் சிறிய ஓய்விற்கு பின்னர் வாகனங்களை இயக்கலாம் எனக் கேட்டுக் கொள்ளப்பட்டுள்ளது.