ஒத்திபோன உயர் நீதிமன்ற வழக்கறிஞர்கள் சங்க தேர்தல்… காரணம் அறிந்த வக்கீல்கள் வேதனை!

சென்னை உயர் நீதிமன்றத்தில் 100 ஆண்டுகளுக்கு மேல் பழமையான வழக்கறிஞர் சங்கமாக சென்னை உயர்நீதிமன்றம் வழக்கறிஞர் சங்கம் உள்ளது. இந்த சங்கத்திற்கு இரண்டு ஆண்டுகளுக்கு ஒருமுறை தேர்தல் நடத்தபட வேண்டும். கடந்த 2016 நவம்பர் 23 ஆம் தேதி தேர்தல் நடைபெற்றது.

சங்க தேர்தல் தொடர்பாக அறிவிப்புக்கும், தேர்தல் புதிய விதிகளுக்கும் எதிராக சென்னை உயர்நீதிமன்றத்தில் வழக்குகள் தொடரபட்டன. இதனால் தேர்தல் கடந்த 4 ஆண்டுகளாக தள்ளிபோனது.

சங்க தேர்தல் தொடர்பான வழக்கை விசாரித்த உயர் நீதிமன்றம் தேர்தலை நடத்த மூத்த வழக்கறிஞர் கபீரை தேர்தல் அதிகாரியாக நியமித்து உத்தரவிட்டது. இதனையடுத்து தேர்தல் ஜனவரி 9 ஆம் தேதி (இன்று) நடைபெறும் என்று அறிவிக்கபட்டுள்ளது.

இந்த தேர்தலில் 4696 வழக்கறிஞர் வாக்களிக்க தகுதியுடையவர்கள் ஆவார்கள். இந்த தேர்தலில் தலைவர், துணைத் தலைவர், செயலாளர், பொருளாளர், நூலகர், 6 மூத்த செயற்குழு உறுப்பினர்கள், 5 இளைய செயற்குழு உறுப்பினர்கள் என 16 பதிவிகளுக்கு தேர்தல் நடைபெறுவதாக இருந்தது. கடந்த மாதம் 14 ஆம் தேதி தொடங்கிய மனு தாக்கல் 16 ஆம் தேதி நிறைவடைந்தது.

தலைவர் பதவிக்கு எம். வேல்முருகன், ஆர்.சி.பால் கனகராஜ், ஜி.மோகனகிருஷ்ணன் சத்தியபால் உள்ளிட்ட 9 பேர் போட்டியில் உள்ளனர். துணைத்தலைவர் பதவிக்கு அறிவழகன், முரளி, கோபால், ராம சிவசங்கர் உள்ளிட்ட 8 பேரும் செயலாளர் பதவிக்கு கிருஷ்ணகுமார், காமராஜ், உள்ளிட்ட 10 பேரும் போட்டியிடுகின்றனர்.

பொருளாளர் பதவிக்கு ஆனந்த், ராஜேஷ் ஆகிய 9 பேர் போட்டியில் உள்ளனர். நூலகர் பதவிக்கு 12 பேர் மூத்த செயற்குழு உறுப்பினர் பதவிக்கு 42 பேர், இளைய செயற்குழு உறுப்பினர் பதவிக்கு 35 பேர் போட்டியில் உள்ளனர்.

இந்த தேர்தலுக்கு சென்னை உயர்நீதிமன்ற வளாகத்தில் உள்ள புதிய கூட்ட அரங்கின் கீழ்தளத்தில் 12 வாக்குசாவடிகள் அமைக்கப்பட்டு இன்று காலை 10.30 மணிக்கு வாக்குபதிவு தொடங்கி நடைபெற்ற நிலையில், வாக்குபதிவு, மற்றும் வாக்கு எண்ணிக்கை முழுவதையும் www.mhaa.in என்ற என்ற இணைய தளத்தில் நேரடியாக ஒளிபரப்பு செய்ய ஏற்பாடு செய்யப்பட்டிருந்தது.

இந்த நிலையில், வாக்கு சீட்டை பெறுவதற்கான கியுஆர் கோடு சீட்டுகளை சிலர் மொத்தமாக அள்ளி சென்றுள்ளதாக தகவல் பரவியது. இதனால் வாக்கு சாவடியில் திடீர் பரபரப்பும், பதற்றமும் ஏற்பட்டது. இதையடுத்து வழக்கறிஞர்கள் சிலர் வாக்குசாவடியில் தகராறு செய்தனர். இதைதொடர்ந்து அங்கிருந்த மேஜை, நாற்காலிகளை சிலர் அடித்து நொறுக்கினர். இதனால் அந்த பகுதியில் பதற்றம் ஏற்பட்டது.

ஆயிரக்கணக்கான வழக்கறிர்கள் அங்கு கூடினர். பிரச்னை பெரிய அளவுக்கு மாறியதால் தேர்தல் நடத்தும் அதிகாரியான மூத்த வழக்கறிஞர் கபீர் இன்று நடைபெற்ற தேர்தலை தள்ளிவைப்பதாக அறிவித்தார். இதுகுறித்து அவர் கூறும்போது, “இன்று நடைபெற்ற தேர்தலில் துரதிஷ்டவசமாக சிலர் வாக்கு சாவடிகளை கைபற்றியுள்ளனர். இந்த சம்பவம் குறித்து தலைமை நீதிபதியிடம் தெரிவிக்கப்பட்டு நீதிமன்ற உத்தரவின் அடிப்படையில் தேர்தல் நாள் அறிவிக்கப்படும்” என தெரிவித்தார்.

ஆறு ஆண்டுகளுக்கு பின்னர் பெரும் எதிர்பார்ப்புடன் நடைபெற்ற தேர்தல் தள்ளிவைக்கப்படுவது ஏமாற்றத்தை ஏற்படுத்தியுள்ளதாக வழக்கறிஞர்கள் வேதனை தெரிவித்துள்ளனர்.