சென்னை பாரிமுனையில் உள்ள ராஜா அண்ணாமலை மன்றத்தில் கூட்டுறவுத் துறையின் கீழ் சென்னை மத்திய கூட்டுறவு வங்கி சார்பில் மகளிர் சுய உதவி குழுக்களுக்கு கடன் தள்ளுபடி, பயனாளிகளுக்கு சான்று வழங்குதல் மற்றும் மகளிர் சுய உதவிக் குழுக்களுக்கு புதிய வங்கி கடன் வழங்கும் நிகழ்ச்சி நடந்தது.
இந்த நிகழ்ச்சிக்கு சென்னை மத்தியக் கூட்டுறவு வங்கி தலைவர் பெரம்பூர் மகேஷ் தலைமை தாங்கினார். நிர்வாக இயக்குனர் அமலதாஸ் வரவேற்று பேசினார். நிகழ்ச்சியில் சிறப்பு அழைப்பாளர்களாக கூட்டுறவு துறை அமைச்சர் கே.ஆர்.பெரியகருப்பன் மற்றும் இந்து சமய அறநிலைய துறை அமைச்சர் பி.கே.சேகர்பாபு ஆகியோர் கலந்து கொண்டு பயனாளிகளுக்கு கடன் தள்ளுபடி சான்றிதழ்களை வழங்கினர்.
இந்த நிகழ்ச்சியில் அமைச்சர் பி.கே.சேகர்பாபு பேசியதாவது:
மகளிர் சுய உதவி குழுக்களுக்கு கடன் தள்ளுபடி செய்யப்படும் என தமிழக முதல்வர்
மு.க.ஸ்டாலின்
தேர்தல் அறிக்கையில் தெரிவித்து இருந்தார். அதன்பேரில் முதலமைச்சர் அதற்கென ஒரு தொகையை ஒதுக்கீடு செய்து தற்போது அதை நடைமுறைப்படுத்தி வருகிறார்.
மேலும் 251 குழுக்களுக்கு 4.98 கோடி வாரி வழங்கி மகளிரின் இன்னலை போக்கியவர் நமது முதல்வர். கடன் தள்ளுபடி பெற்றவர்கள் தொழில் செய்வதற்கு உதவியாக வருமுன் காப்போம் என்ற வாசகத்திற்கு இணங்க 18 குழுக்களுக்கு 1.21 கோடி கடன் உதவியாக தந்து இருப்பவர் நமது முதல்வர்.
மேலும் பொதுமக்கள், தொழில் முனைவோர் அதிக வளர்ச்சி பெற வேண்டும் என்ற நோக்கில் தமிழ்நாடு அரசு சார்பில் 452 பேருக்கு 3.18 கோடியை அவர்களுடைய வாழ்வாதாரத்திற்காக கடனாக வழங்க கூடிய முதல்வர் நமது முதல்வர்.
கூட்டுறவு துறையை பொறுத்தவரை பயிர் கடன் தள்ளுபடி, நகை கடன் தள்ளுபடி உள்ளிட்ட அனைத்து கடன்களையும் தள்ளுபடி செய்ய கூடிய ஒரே துறை தமிழக அரசின் கூட்டுறவு துறை தான். இவ்வாறு அமைச்சர் பி.கே.சேகர்பாபு பேசினார்.
இந்த நிகழ்ச்சியில் அமைச்சர் பெரியகருப்பன் பேசியதாவது:
தமிழ்நாட்டில் கலைஞர் முதலமைச்சராக இருந்தபோது இந்து சமய அறநிலைய துறை எனக்கு வழங்கப்பட்டது. ஆனால் நமது முதல்வர் பதவி ஏற்றதும் இந்து சமய அறநிலைய துறையை அமைச்சர் பி.கே.சேகர் பாபுவுக்கு வழங்கினார். அவர் அந்த துறையில் என்னை விட கூடுதலாக மிகவும் சிறப்பாக பணியாற்றி வருகிறார்.
மகளிர் சுய உதவி குழுவுக்கு விதை விதைத்தவர் கலைஞர் தான். தமிழகத்தில் சிறிய அளவில் தொடங்கி பெரிய அளவில் மகளிர் சுய உதவிக் குழு வளர்ச்சி அடைய செய்தவர் மறைந்த நமது கலைஞர் தான் காரணம்.
இன்றைக்கு இது மிக பெரிய அளவில் வருவதற்கு முதல்வர் ஸ்டாலின் தான் காரணம். ஏனெனில் முதல்வர் ஸ்டாலின் அமைச்சராக இருந்தபோது தான் மகளிர் சுய உதவிக்குழு பெரிய அளவில் விஸ்வரூபம் எடுத்தது.
அன்று மகளிர் சுய உதவி குழுக்களை ஊக்கப்படுத்தி திறன் பட செயலாற்றியவர் தான் நம்முடைய முதல்வர் மு.க.ஸ்டாலின். மேலும் பெண்களின் பொருளாதாரம் உயர்வதற்கு 20 ஆயிரம் கோடி வரை மகளிர் சுய உதவி குழுக்களுக்கு வங்கி கடன் வழங்க வேண்டும் என நிர்ணயம் செய்தவரும் முதல்வர் தான்.
ஆனால், தமிழகத்தில் நிர்ணயம் செய்யப்பட்ட அளவை விட கூடுதலாக கடந்த 2022ம் ஆண்டு 21 ஆயிரம் கோடி கடன் தொகையாக வழங்கப்பட்டு புதிய சாதனை படைக்கப்பட்டது.
தற்போது இந்த துறை அமைச்சர் உதயநிதி ஸ்டாலின் துறையின் கீழ் கொண்டு வரப்பட்டுள்ளது. முதல்வரை போல் மிகவும் அமைச்சர் உதயநிதி ஸ்டாலின் தமது பணியை சிறப்பாக செய்து வருகிறார்.
ஆண்களுக்கு நிகராக பெண்களும் முன்னேற வேண்டும் என, நினைப்பவர் முதல்வர் ஸ்டாலின். அதுமட்டும் இன்றி கடந்த 10 ஆண்டுகளில் மட்டும் விவசாய கடன் வெறும் ரூ.6000 கோடி மட்டுமே வழங்கப்பட்டு இருந்தது.
ஆனால் தமிழக முதல்வராக மு.க.ஸ்டாலின் ஆட்சி பொறுப்பை ஏற்ற பிறகு 3 ஆண்டுகளில் 10 ஆயிரம் கோடிக்கு மேல் விவசாயிகளுக்கு வங்கி கடன் வழங்கப்பட்டு உள்ளது.
இவை மட்டும் இல்லாமல், தமிழ்நாட்டில் இன்னும் சில தினங்களில் விவசாயிகளுக்கான கடன் தொகையின் அளவு ரூ.12 ஆயிரம் கோடியை எட்ட உள்ளது. இவ்வாறு அமைச்சர் பெரியகருப்பன் பேசினார்.