சென்னையில் விஜய் மற்றும் அஜித் ரசிகர்கள் பேனர்களை கிழித்தெறிந்து சண்டையிட்டதால் பரபரப்பு ஏற்பட்டது.
அஜித் நடித்துள்ள துணிவு திரைப்படமும், விஜய் நடித்துள்ள வாரிசு திரைப்படமும் இன்று திரையரங்குகளில் ரிலீஸ் ஆகி உள்ளது. இந்த படங்களுக்கு இன்று அதிகாலை காட்சிகள் திரையிடப்பட்டன. குறிப்பாக துணிவு திரைப்படம் அதிகாலை 1 மணிக்கு திரையிடப்பட்டது.
இதனால் இரவு முதலே திரையரங்கு முன் குவிந்த ரசிகர்கள் ஆடிப்பாடி கொண்டாடி மகிழ்ந்தனர். அதேபோல் விஜய் நடித்துள்ள வாரிசு திரைப்படம் இன்று அதிகாலை 4 மணிக்கு முதல் காட்சி திரையிடப்பட்டது. இருதரப்பு ரசிகர்களிடையேயான மோதலை தவிர்ப்பதற்காகவே இவ்வாறு இரண்டு படங்களுக்கும் முதல் காட்சி வெவ்வேறு நேரத்தில் திரையிடப்பட்டது.
இருப்பினும் இருதரப்பு ரசிகர்கள் மோதிக்கொண்ட சம்பவம் அரங்கேறி உள்ளது. சென்னையில் புகழ்பெற்ற திரையரங்கான ரோகினியில், அதிகாலை 1 மணிக்கு துணிவு படம் திரையிடப்பட்டபோது திரையரங்கு முன் குவிந்த அஜித் ரசிகர்கள் அங்கிருந்த விஜய்யின் வாரிசு பட பேனர்களை கிழித்தெறிந்தனர்.
அதேபோல் 4 மணிக்கு வாரிசு படம் பார்க்க வந்த விஜய் ரசிகர்கள் பதிலுக்கு அஜித் பேனரை கிழித்தெறிந்ததால் இருதரப்பு ரசிகர்களுக்கும் இடையே மோதல் வெடித்தது. பின்னர் இருதரப்பு ரசிகர்களும் அடிதடியில் இறங்கியதால் அந்த இடமே போர்க்களம் போல காட்சி அளித்தது.
இதையடுத்து அங்கு சென்ற காவலர்கள் தடியடி நடத்தி இருதரப்பு ரசிகர்களையும் விரட்டி அடித்தனர். இதனால், அப்பகுதியில் சிறிது நேரம் பதற்றம் நிலவியது.
newstm.in