தமிழ்நாட்டில் அரசுக்கும் ஆளுநர் ஆர்.என்.ரவிக்கும் இடையே மோதல் போக்கு நிலவி வருகிறது. நீட் தேர்வில் விலக்கு, ஆன்லைன் ரம்மி தடை என தமிழ்நாடு அரசு அனுப்பி வைத்த பல்வேறு மசோதாக்கள் மீது முடிவெடுக்காமல் ஆளுநர் ஆர்.என்.ரவி காலதாமதம் செய்து வருகிறார்.
இந்நிலையில் தேவையற்ற அரசியல் விவகாரங்கள் குறித்தும், தமிழ்நாடு பற்றியும் பேசி சர்ச்சைகளை கிளப்பி வருகிறார். இதனால் தமிழக அரசியல் கட்சிகளும் கொதித்து போய் உள்ளன.
இந்நிலையில் தமிழ்நாடு சட்டப்பேரவையில் முதல் கூட்டம் நேற்று முன்தினம் கவர்னர் உரையுடன் தொடங்கியது. ஏற்கனவே கண் கொத்தி பாம்பாக காத்திருந்த தமிழக எதிர்க்கட்சிகள் ஆளுநரை பேச விடாமல் அமளியில் ஈடுபட்டனர். ஆனால் ஆளுநர் ரவி தனது உரையை நிறுத்தாமல் வாசித்தார்.
இந்த களேபரத்துக்கு மத்தியில் தமிழ்நாடு அரசு தயாரித்து கொடுத்த உரையின் ஒரு சில பகுதியை மட்டும் குறிப்பாக பெரியார், தமிழ்நாடு அரசு, திராவிட மாடல், அம்பேத்கர் போன்ற வார்த்தைகளை ஆளுநர் ஆர்.என்.ரவி படிக்காமல் தவிர்த்து விட்டார்.
இதனால் ஆளுநருக்கு எதிராக முதல்வர் மு.க.ஸ்டாலின் ஒரு தீர்மானம் கொண்டு வந்தார். தீர்மானத்தை தமிழ்நாடு முதல்வர் மு.க.ஸ்டாலின் வாசித்துக் கொண்டு இருந்தபோதே ஆளுநர் ஆர்.என்.ரவி கோபத்தில் சட்டப்பேரவையை விட்டு ஆவேசமாக வெளியேறினார்.
இந்த விவகாரம் அரசியலிலும், தமிழ்நாடு அரசியல் வட்டாரத்திலும் பெரும் பரபரப்பை ஏற்படுத்தி உள்ள நிலையில் அஜித் நடிப்பில் இன்று வெளியாகி இருக்கும் துணிவு படத்தில், ஆளுநரை மறைமுகமாக எச்சரித்துள்ளது போல வசனம் அமைக்கப்பட்டு இருப்பதாக வெளியாகி உள்ள தகவல், பெரும் பரபரப்பை ஏற்படுத்தி உள்ளது.
அதில் ‘ரவி’ந்தர் இது தமிழ்நாடு.. இங்க உன் வேலைய காட்டாத’ என, அஜித்குமாரின் துணிவு படத்தில் இடம்பெற்றுள்ள வசனம் தற்போது சமூகவலைதளத்தில் வைரலாகி வருகிறது.
தமிழ்நாடு அரசு – ஆளுநர் ரவி இடையே மோதல் அதிகரித்து வரும் நிலையில் அஜித்தின் துணிவு இடம் பெற்றுள்ள ‘ரவி’ந்தர் இது தமிழ்நாடு இங்க உன் வேலைய காட்டாத’ என்ற வசனம் வைரலாகி வருகிறது.