சென்னை கலைவாணர் அரங்கில் அயலகத் தமிழர் தின விழா இன்று நடந்தது. இந்த விழாவில் தமிழ்நாடு முதல்வர்
மு.க.ஸ்டாலின்
கலந்து கொண்டு பேசியதாவது:
அயலக மண்ணில் வசிக்கும் நமது தமிழ் மக்களை ஒருங்கிணைக்கவும், அவர்களுக்கு தேவை ஏற்படக் கூடிய நிலைகளில் உதவி புரிந்து வரும் தமிழ்ச் சங்கங்களின் பணிகளை அங்கீகரிக்கவும் வேண்டும்.
இதற்காக அடுத்த தலைமுறைக்கு தமிழ் பண்பாடு, தமிழ்மொழி கற்றல், கற்பித்தல் போன்ற பணிகளை மேற்கொள்ள வேண்டும், என்கின்ற உயர்ந்த நோக்கத்தின் அடிப்படையில் ஒவ்வொரு ஆண்டும் ஜனவரி 12ம் நாள் ‘அயலகத் தமிழர் நாள்’ கொண்டாடப்படும் என, அறிவிக்கப்பட்டது.
இது வெறும் அறிவிப்பு மட்டும் இல்லை என்பதைத் தான் இங்கே திரண்டு இருக்கின்ற நீங்களும், உங்களோடு கலந்து நானும் சேர்ந்து இங்கே நிரூபித்துக் கொண்டு இருக்கிறோம்.
இது மட்டும் இல்லை. கடந்த ஆண்டு செப்டம்பர் 24 அன்று, அண்ணா பல்கலைக் கழகத்தில் நடைபெற்ற நிகழ்ச்சியில், தேமதுர தமிழோசை உலகம் எல்லாம் பரவச் செய்வதற்காக முதற்கட்டமாக ஒரு கோடி ரூபாய் நிதி ஒதுக்கீட்டுடன் தமிழ் பரப்புரை கழகத்தை தொடங்கி வைத்தேன்.
தமிழர்கள் நலன் காக்கவும், அவர்களுக்கான நலத் திட்டங்களை செயல்படுத்தவும், புலம்பெயர் தமிழர் நல வாரியம் உருவாக்கப்பட்டு, கார்த்திகேய சிவசேனாபதி தலைவராகவும், வெளி மாநிலங்கள் மற்றும் வெளிநாடுகளில் வசிக்கும் தமிழர்கள் அரசு சாரா உறுப்பினர்களாகவும், அரசு உயர் அலுவலர்களை உள்ளடக்கியதாக வாரியம் செயல்பட இருக்கிறது.
அயலகத்தில் வாழும் தமிழர் நலன் காக்கும் விதமாக தொடங்கப்பட்ட இந்த துறையில் கடந்த ஓராண்டில் மட்டும் வெளிநாடுகளில் இறந்து போன 288 தமிழர்களின் உடல்களை தமிழ்நாட்டிற்கு கொண்டு வருதல், அங்கு இறந்தவர்களின் சம்பள பாக்கி மற்றும் இழப்பீட்டுத் தொகையை பெற்றுத் தருதல், மருத்துவ இயலாமையால் பாதிக்கப்பட்டவர்களை தமிழ்நாட்டிற்கு அழைத்து வந்து உரிய சிகிச்சை அளிக்க ஏற்பாடு செய்தல் போன்ற வேலைகளை செயல்படுத்தி வருகின்றது.
அயலக தமிழர்களின் நலனுக்காக அமைக்கப்பட்டுள்ள அயலக தமிழர் நலவாரியத்தில் பதிவு செய்து, அயல் நாட்டிற்கு செல்லும் தமிழர்களுக்கு அடையாள அட்டை, காப்பீடு, குடும்பத்தில் உள்ளவர்களுக்கு திருமண உதவித்தொகை, கல்வி உதவித்தொகை என, பல்வேறு நலத்திட்டங்கள் செயல்படுத்தப்பட இருக்கின்றன.
ஏற்கனவே வெளிநாடுவாழ் தமிழர்கள் நலனுக்காக பல்வேறு முன்னெடுப்புகளை தமிழ்நாடு அரசு செய்து வருகிறது. குறிப்பாக கொரோனா நோய் பரவல் காலத்தில் வெளிநாடுகளில் இருந்து 80 ஆயிரம் தமிழர்கள் பாதுகாப்பாக தமிழ்நாட்டிற்கு அழைத்து வரப்பட்டனர்.
அவர்கள் வேலை வாய்ப்பு இழந்ததால் சிறு, குறு மற்றும் நடுத்தர தொழில் மூலமாக மானியத்துடன் கூடிய கடன் வசதி வழங்கும் புதிய திட்டம் செயல்படுத்தப்பட்டு உள்ளது.
அதேப் போல், கடந்த ஆண்டு ரஷ்யா – உக்ரைன் நாடுகளிடையே போர் மூண்டபோது இந்திய ஒன்றிய அரசின் ஒத்துழைப்புடனும், தன்னார்வலர்கள் உதவியுடனும் தமிழ்நாடு அரசு எடுத்த முயற்சியால் உக்ரைனில் மருத்துவம் பயின்று வந்த 1890 மாணவர்கள் பாதுகாப்பாக மீட்கப்பட்டனர்.
இதில், 1524 மாணவர்கள் தமிழ்நாடு அரசு செலவில் சொந்த ஊருக்கும் அனுப்பி வைக்கப்பட்டனர். அது மட்டுமல்லாமல் கடந்த ஆண்டு இலங்கையில் பொருளாதார நெருக்கடி மற்றும் உணவு தட்டுப்பாடு ஏற்பட்டபோது தமிழ்நாடு அரசு சார்பில் அவர்களுக்கு தேவையான ரூ.174 கோடி மதிப்பில் உணவுப் பொருட்கள், பால் பவுடர் மற்றும் உயிர் காக்கும் மருந்து பொருட்கள் அனுப்பி வைக்கப்பட்டது.
தமிழ்நாட்டில் திமுக ஆட்சி அமையும்போது எல்லாம் வெளிநாடு வாழ் தமிழர்களுக்கான பாதுகாப்பு மற்றும் முன்னேற்றத்தைக் கவனத்தில் கொண்டு திட்டம் தீட்டி செயல்படுத்தி வருகிறோம்.
இதன் தொடர்ச்சியாக அயலகத் தமிழர் நாளான இன்று சில அறிவிப்புகள் அறிவிக்க விரும்புகிறேன். முதலாவதாக தமிழ்நாட்டில் இருந்து பல்வேறு காலகட்டத்தில் புலம்பெயர்ந்து அயல்நாடுகளில் நிரந்தரமாகவும், தற்காலிகமாகவும் வாழ்ந்து வரும் தமிழர்கள் குறித்து விரிவான ஆய்வுகள் மேற்கொண்டு தரவுகள் முழுமையாக ஆவணப்படுத்தப்படும்.
அடுத்ததாக புலம்பெயர்ந்து வாழும் தமிழர்களின் குழந்தைகள், இளம் மாணவர்கள் தாய்த் தமிழ்நாட்டின் மரபின் வேர்களோடு உள்ள தொடர்பை புதுப்பிக்கும் படி ஆண்டுக்கு 200 மாணவர்கள் தேர்ந்தெடுக்கப்பட்டு தமிழ்நாடு பண்பாட்டு சுற்றுலா அழைத்து வர ஏற்பாடு செய்யப்படும்.
மூன்றாவதாக அயல்நாடுகளில் வெளிமாநிலங்களில் பணிக்கு சென்று அங்கு எதிர்பாராதவிதமாக இறந்துவிடுகிற தமிழர்களின் குடும்பத்திற்கு மாத ஓய்வூதியம் வழங்கும் திட்டம் அறிமுகப்படுத்தப்படும்.
நான்காவதாக, அயல்நாடுகளுக்கு செல்வோர் குறித்த தரவு தளம் ஒன்று ஏற்படுத்தப்படும். இது போன்ற பல்வேறு நலத் திட்டங்கள் செயல்படுத்தி கண்ணை இமை காப்பது போல உலகெங்கும் வாழும் தமிழ் இனத்தை தமிழ்நாடு அரசு காக்கும் என, உறுதியளிக்கிறேன். இவ்வாறு முதல்வர் மு.க.ஸ்டாலின் பேசினார்.
தமிழ்நாடு முதல்வர் மு.க.ஸ்டாலின் வெளியிட்டு இருக்கும் இந்த 4 அறிவிப்புகளும் அரசியல் கட்சியினர் மற்றும் பொதுமக்கள் மத்தியில் பெரும் வரவேற்பை பெற்று உள்ளது.