டெல்லி யூனியன் பிரதேசத்தில் ஆம் ஆத்மியின் அரவிந்த கெஜ்ரிவால் தலைமையிலான ஆட்சி நடைபெற்று வருகிறது. இந்த நிலையில் நடப்பு ஆண்டிற்கான முதல் சட்டப்பேரவை கூட்டத்தொடர் கடந்த திங்கள் கிழமை தொடங்கியது.
சட்டப்பேரவை தொடங்கிய இரண்டாவது நாளே டெல்லி முதல்வர் அரவிந்த கெஜ்ரிவால், ஆளுநரை கடுமையாக சாடினார். இந்த மாநில அரசுக்கும், துணை நிலை ஆளுநர் வினய் குமார் சக்சேனாவுக்கும் இடையே தொடக்கம் முதலே முட்டல் மோதலாக உள்ளது.
டெல்லி யூனியன் பிரதேசம் என்பதால், எந்தவொரு திட்டத்திற்கும் ஆளுநரின் ஒப்புதல் பெற வேண்டும். அந்த வகையில் ஆம் ஆத்மி அரசு அனுப்பும் திட்டங்களுக்கு ஒப்புதல் அளிக்காமல் துணை நிலை ஆளுநர் வினய் குமார் சக்சேனா காலம் தாழ்த்தி வருவதாக அக்கட்சி குற்றம் சாட்டி வருகிறது.
இந்தநிலையில் சட்டப்பேரவையில் டெல்லி முதல்வர் அரவிந்த கெஜ்ரிவால் பேசும்போது, ‘‘வாழ்க்கையில் எதுவும் நிரந்தரமில்லை. காலம் மிகவும் சக்தி வாய்ந்தது. எங்கள் அரசு மக்களை துன்புறுத்தாது. நிரந்தரமாக ஆட்சியில் இருப்பேன் என்று நினைத்தால் அது நடக்காது. இன்று நாங்கள் டெல்லியில் ஆட்சியில் இருக்கிறோம். அதே போல் பஞ்சாப் மாநிலத்தில் ஆட்சி அமைத்துள்ளோம். நாளை மத்தியில் கூட ஆட்சி அமைப்போம்.
ஆசிரியர்களை பயிற்சிக்கு அனுப்பும் திட்டங்களுக்கு துணை நிலை ஆளுநர் இரண்டு முறை எதிர்ப்பு தெரிவித்தார். இது அவரது நோக்கங்கள் நல்லதல்ல என்பதைக் காட்டுகிறது. துணை நிலை ஆளுநர் வினய் குமார் சக்சேனா எனது தலைமை ஆசிரியர் அல்ல. மக்கள் என்னை முதலமைச்சராக தேர்ந்தெடுத்து உள்ளனர். துணை நிலை ஆளுநர் தன்னிச்சையாக எந்த முடிவும் எடுக்க முடியாது. பாஜகவினர் முதலாளித்துவ மனபான்மை உடையவர்கள். அதே போல் அந்த குணம் டெல்லி துணை நிலை ஆளுநருக்கு உள்ளது’’ என முதல்வர் ஆளுநரை கடுமையாக சாடினார்.
இந்தநிலையில் சட்டப்பேரவையின் மூன்றாவது நாளான இன்று ஆளும் ஆம் ஆத்மி எம்.எல்.ஏ மகேந்தர் கோயல் தனது உயிருக்கு அச்சுறுத்தல் இருப்பதாக கூறி சலசலப்பை ஏற்படுத்தினார். சட்டப்பேரவைக்குள் தனக்கு லஞ்சமாக வழங்கப்பட்ட பணத்தைக் காட்டி, நகர அரசு மருத்துவமனையில் ஒரு தனியார் ஒப்பந்ததாரர் தனக்கு லஞ்சம் கொடுக்க முயன்றதாகக் கூறினார்.
டெல்லியின் ரோகினியில் பகுதியில் உள்ள பாபாசாகேப் அம்பேத்கர் மருத்துவமனையில் தற்காலிக ஊழியர்களை பணியமர்த்துவதில் முறைகேடுகள் நடந்ததாக புகார் அளித்த ஆம் ஆத்மி எம்.எல்.ஏ மகேந்தர் கோயல், தன்னை அமைதிப்படுத்த முயற்சிக்கும் சக்தி வாய்ந்த நபர்களால் தனது உயிருக்கு அச்சுறுத்தல் இருப்பதாகக் கூறினார்.
பாகிஸ்தான் பெண்ணை 2வது திருமணம் செய்த தாவூத் இப்ராஹிம்
மேலும் எம்எல்ஏ மிரட்டல்களால் துவண்டுவிடவில்லை என்றும், தனியார் ஒப்பந்ததாரர் மீது நடவடிக்கை எடுக்க வேண்டும் என்றும் கோரினார். எனக்கு பாதுகாப்பு வேண்டும். என் உயிருக்கு ஆபத்து உள்ளது என்று டெல்லியின் ரிதாலா எம்எல்ஏ சட்டசபையில் கூறினார். சபாநாயகர் ராம் நிவாஸ் கோயல், இந்த விவகாரம் தீவிரமானது என்றும், மன்றத்தின் மனுக்கள் குழுவுக்கு அனுப்பப்பட்டது என்றும் கூறினார்.