ஈரோடு கிழக்கு தொகுதி இடைத்தேர்தல். ஊடகங்களில் தலைப்பு செய்தியாகவும், அரசியல் கட்சிகள் மத்தியில் விவாதப் பொருளாகவும் மாறியுள்ளது. மு.க.ஸ்டாலின் தலைமையிலான திமுக ஆட்சி அமைந்த ஒன்றரை ஆண்டுகளில் வரும் முதல் தேர்தல். ஏற்கனவே செய்து கொண்ட உடன்படிக்கையின் படி, ஈரோடு கிழக்கு தொகுதியை மீண்டும் காங்கிரஸ் வசம் ஒப்படைத்துவிட்டனர். அதிமுக தரப்பில் தான் சிக்கல் நீடித்து வருகிறது. தமிழ் மாநில காங்கிரஸ் கட்சி தலைவர் ஜி.கே.வாசன் உடன் அதிமுக நிர்வாகிகள் நேற்று ஆலோசனை நடத்தினர்.
எடப்பாடி தரப்பு
இதையடுத்து பேசுகையில், ஓரிரு நாளில் கூட்டணி கட்சிகளுடன் பேசி வேட்பாளர் குறித்து அறிவிக்கப்படும் என்று தெரிவித்துள்ளனர். மறுபுறம் பாஜக தனித்து போட்டியிட வாய்ப்புள்ளதாக சொல்லப்படுகிறது. இதுதொடர்பாக கடலூரில் இன்று நடக்கும் பாஜக மாநில செயற்குழு கூட்டத்தில் முக்கிய முடிவுகள் எடுக்கப்படலாம். இதற்கிடையில்
ஓ.பன்னீர்செல்வம்
தரப்பு என்ன செய்யப் போகிறது என்ற கேள்வி எழுந்துள்ளது.
ஓபிஎஸ் தரப்பு
கோவையில் செய்தியாளர்களிடம் பேசிய ஓபிஎஸ் ஆதரவாளர் புகழேந்தி, நடந்து முடிந்த சட்டமன்ற தேர்தலில் அதிமுக கூட்டணியில் ஆறு தொகுதிகளில் போட்டியிட்டு அனைத்து தொகுதிகளிலும் தமிழ் மாநில காங்கிரஸ் கட்சி தோல்வி அடைந்தது. இந்நிலையில் ஈரோடு கிழக்கு தொகுதியில் போட்டியிட மீண்டும் கோரிக்கை வைத்துள்ளனர். அந்த தொகுதியை ஒப்படைத்து விட்டு
எடப்பாடி பழனிசாமி
தப்பித்துக் கொள்ள நினைக்கிறார். ஈரோட்டில் போட்டியிட நாங்கள் தயாராக இருக்கிறோம்.
பாஜக உடன் பேச்சுவார்த்தை
ஓ.பன்னீர்செல்வம் என்ன சொல்கிறார் என்பதற்காக காத்திருக்கிறோம். ஏனெனில் இரட்டை இலைக்கு சொந்தக்காரர் அவர் மட்டுமே. கூட்டணி தொடர்பாக பாஜக உடன் ஓபிஎஸ் பேசி முடிவு எடுப்பார் எனக் கூறினார். மேலும் பேசுகையில், சொந்த தொகுதியில் நின்று தோல்வி கண்டவர் முன்னாள் அமைச்சர் ஜெயக்குமார். அவர் அரசியல் அனாதை ஆகி விட்டார். எனவே அவருக்கு கருத்து சொல்ல உரிமை இல்லை.
புத்திசாலி வேலுமணி
தற்போது அதிமுகவை பொறுத்தவரை எடப்பாடி பழனிசாமியை விட முன்னாள் அமைச்சர் எஸ்.பி.வேலுமணி புத்திசாலி. ஏனெனில் கள நிலவரம் நன்கு தெரிந்தவர். திரை மறைவில் அதிமுகவை ஒழிக்க எடப்பாடி பழனிசாமி திட்டமிட்டுள்ளார். பழனிசாமி என்ற சர்வாதிகாரி ஒழிய வேண்டும் என்பதற்காகவே தான் ஓ.பன்னீர்செல்வம் உடன் இருக்கிறேன். தனது இணை ஒருங்கிணைப்பாளர் பதவியை எடப்பாடி பழனிசாமி ராஜினாமா செய்து விட்டதால் தற்போது அவருக்கு கட்சியில் எந்த பதவியும் இல்லை.
சவால் விட்ட புகழேந்தி
அதிமுகவிற்கும், எடப்பாடி பழனிசாமிக்கும் எந்தவித சம்பந்தமும் இல்லை. எடப்பாடி பழனிசாமி உடன் இருக்கும் சட்டமன்ற உறுப்பினர்கள் அனைவரும் வெற்றி பெற்றது ஓ.பன்னீர்செல்வத்தால் தான். ரோஷம் இருந்தால் ஓ.பன்னீர்செல்வம் கையெழுத்திட்ட பதவியை எடப்பாடி பழனிசாமி ராஜினாமா செய்யட்டும் என்று புகழேந்தி சவால் விடுத்தார்.
இரட்டை இலை சின்னம்
அதிமுக தரப்பில் ஒருவேளை ஓபிஎஸ் தரப்பில் வேட்பாளர் நிறுத்தப்பட்டால் இரட்டை இலை சின்னம் கிடைக்குமா? என்ற கேள்வி எழுந்துள்ளது. ஏனெனில் பி பார்மில் ஒருங்கிணைப்பாளர், இணை ஒருங்கிணைப்பாளர் என இருவரும் கையெழுத்திட வேண்டும். எடப்பாடி பழனிசாமி முரண்டு பிடித்து வரும் சூழலில் ஓபிஎஸ் தரப்பிற்கு சின்னம் விஷயம் சிக்கலாக மாறும் எனத் தெரிகிறது.