குடியரசு தின விழாவை முன்னிட்டு தமிழ்நாடு ஆளுநர் ஆர்.என்.ரவி அளித்த தேநீர் விருந்தில் தமிழ்நாடு முதலமைச்சர், அமைச்சர்கள் கலந்து கொண்டது திமுக கூட்டணியில் சலசலப்பை உருவாக்கியுள்ளது.
ஆளுநர் ஆர்.என்.ரவி பதவியேற்றதிலிருந்தே தமிழ்நாடு அரசின் செயல்பாடுகளுக்கு முட்டுக்கட்டை போடும் வேலையை ஒவ்வொன்றாக செய்யத் தொடங்கினார். பாஜகவின் முகமாக, ஆர்.எஸ்.எஸ்ஸின் குரலாக ஒலித்து வருகிறார் ஆர்.என்.ரவி என விமர்சனங்கள் அதிகரித்தன.
சனாதன தர்மத்தை தூக்கிப் பிடிக்கும் ஆளுநர் தமிழ்நாடு அரசு சட்டப்பேரவையில் நிறைவேற்றும் தீர்மானங்களுக்கு ஒப்புதல் அளிக்காமல் கிடப்பில் போட்டு தமிழ்நாட்டு மக்களை வஞ்சிக்கும் செயலை செய்கிறார் என பல்வேறு கட்சிகளும் குற்றச்சாட்டுகளை முன்வைத்தன.
உதாரணத்துக்கு ஆன்லைன் ரம்மி தடை சட்டத்துக்கு ஒப்புதல் வழங்காமல் தொடர்ந்து உயிரிழப்புகள் ஏற்படுவதற்கு ரவி காரணமாக உள்ளார். தமிழ்நாட்டை தமிழகம் என்று அழைத்தால் போதும் என சர்ச்சையைக் கிளப்பினார்.
இதில் உச்சகட்டமாக தமிழக அரசின் ஆளுநர் உரையில் சிலவற்றை நீக்கியும் சேர்த்தும் வாசித்து மரபை மீறினார். இதனால் சட்டமன்றத்தில் அவர் முன்னிலையிலேயே அவருக்கு எதிராக தீர்மானம் கொண்டு வந்தார் முதல்வர் ஸ்டாலின். உடனே தேசிய கீதம் முடிவதற்கு கூட காத்திராமல் ரவி பாதியிலேயே சட்டப்பேரவையில் இருந்து கிளம்பிச் சென்றார்.
இந்த சூழலில் தை திருநாள் நிகழ்வை முன்னிட்டு ஆளுநர் மாளிகையில் தேநீர் விருந்து நடைபெற்றது. அப்போது தமிழ்நாடு என்ற வார்த்தை தவிர்க்கப்பட்டது. தமிழ்நாடு அரசின் முத்திரைக்கு பதிலாக ஒன்றிய அரசின் முத்திரை பயன்படுத்தப்பட்டது.
அந்த தேநீர் விருந்தை திமுக கூட்டணிக் கட்சிகள் முற்றிலும் புறக்கணித்தன. அதிமுக, பாஜக உள்ளிட்ட கட்சிகள் கலந்து கொண்டன.
குடியரசு விழாவை முன்னிட்டும் அனைத்து கட்சிகளுக்கும் தேநீர் விருந்துக்கு அழைப்பு விடுக்கப்பட்டது. திருமாவளவனின் விடுதலை சிறுத்தைகள் கட்சி தேநீர் விருந்தை புறக்கணிப்பதாக முதலில் அறிவித்தது. அதைத் தொடர்ந்து காங்கிரஸ், இடதுசாரிகள், மதிமுக என திமுக கூட்டணிக் கட்சிகள் தேநீர் விருந்தை புறக்கணித்தன. திமுக முடிவை அறிவிக்காமல் இருந்தது.
ஆர்.என்.ரவி முதல்வர் ஸ்டாலினுக்கு தொலைபேசி மூலமாக தொடர்பு கொண்டு அழைப்பு விடுத்தார். இதைத் தொடர்ந்து நேற்றைய தேநீர் விருந்தில் ஸ்டாலின் தனது அமைச்சரவை சகாக்களுடன் கலந்து கொண்டார். இந்த நிகழ்வு கூட்டணியில் இடம்பெற்றுள்ள கட்சிகளிடம் சிறு சலசலப்பை உருவாக்கியுள்ளது. இடைத் தேர்தல் நடைபெற உள்ளதால் காங்கிரஸ் உள்ளிட்ட கட்சிகள் தற்போது இதை பெரிதாக்க விரும்பவில்லை என்று கூறப்படுகிறது.
இது தொடர்பாக திமுக வட்டாரத்தில் விசாரிக்கையில், “ஆளுநருக்கு எப்போதெல்லாம் எதிர்ப்பு காட்ட வேண்டுமோ அப்போதெல்லாம் ஸ்டாலின் எதிர்ப்பு தெரிவித்து வருகிறார். அதே சமயம் முதலமைச்சர் என்ற வகையில் அவர் சில நகர்வுகளை கவனமாக எடுத்து வைக்க வேண்டியுள்ளது. இதன் பின்னால் மக்கள் நலன் தான் உள்ளது” என்கிறார்கள்.
கூட்டணிக் கட்சிகளின் வட்டாரத்தில் வேறு விதமாக பேசுகிறார்கள். “ஆர்.என்.ரவிக்கும் எங்களுக்கும் தனிப்பட்ட பகை இல்லை. மக்கள் நலனுக்கு எதிராக மசோதாக்களுக்கு அனுமதியளிக்க மறுப்பதும், சனாதனத்தை தூக்கிப் பிடிப்பதும் தான் அவர் மீது கோபத்தை ஏற்படுத்துகிறது. அதை நாம் சரியான சமயத்தில் காட்டியாக வேண்டும். ஆன்லைன் ரம்மி தடை சட்டத்துக்கு அனுமதியளிக்காமல் கிடப்பில் போட்டு பலர் உயிரிழப்பதற்கு காரணமாக இருப்பவரோடு எப்படி கை நனைப்பது? ஆன்லைன் ரம்மி நிறுவனங்களை அழைத்தும் தேநீர் கொடுக்கிறார், முதலவர் ஸ்டாலினையும் அழைத்து தேநீர் கொடுக்கிறார்.
‘வெறும் கரண்டியைக் கையில் வைத்திருப்போர் கையை எப்படி வேண்டுமானாலும் ஆட்டலாம்; திமுக கையில் எண்ணெய்க் கரண்டி உள்ளது. பக்குவமாக யோசித்துத்தான் கையை அசைக்க வேண்டும்’ என்ற அண்ணாவின் வார்த்தையை இப்போதும் பயன்படுத்தி தப்பித்துக் கொள்ளலாம் என்று பார்க்க கூடாது.
குடியரசு தின விழாவில் ஆளுநரை முதலமைச்சர் வரவேற்பது மரபு. அந்த மரபை காப்பாற்றக் கூடாது என்று கூறவில்லை. ஆனால் தேநீர் விருந்தை புறக்கணிக்கலாம்.. தெலங்கானாவில் குடியரசு தின விழாவையே முதல்வர் சந்திரசேகர் ராவ் புறக்கணித்து தனது எதிர்ப்பை பதிவு செய்தார். அந்த அளவுக்கு கூட செல்ல வேண்டாம். முதல்வர் ஸ்டாலின் இவ்வளவு தூரம் இறங்கி அரவணைத்து செல்லும் அளவுக்கு ஆர்.என்.ரவி நடந்து கொள்ளவில்லை” என்று கூறுகிறார்கள்.