பி.பி.சி., அலுவலகத்தில் மூன்றாவது நாளாக ஆய்வு| BBC, third day of investigation at the office

புதுடில்லி, சர்வதேச ஊடக நிறுவனமான, பி.பி.சி.,யின் புதுடில்லி அலுவலகத்தில் தொடர்ந்து மூன்றாவது நாளாக நேற்றும் வருமான வரித் துறையினர் ஆய்வு பணியை மேற்கொண்டனர்.

ஐரோப்பிய நாடான பிரிட்டனைச் சேர்ந்த பி.பி.சி., நிறுவனம், பல்வேறு நாடுகளில் இயங்கி வருகிறது. சமீபத்தில் இந்நிறுவனம் ௨௦௦௨ல் குஜராத்தில் நடந்த கலவரம் தொடர்பான ஆவணப் படத்தை வெளியிடுவதாக அறிவித்தது.

சர்ச்சை

இது, ௨௦௦௨ல் குஜராத் முதல்வராக இருந்த பிரதமர் நரேந்திர மோடிக்கும், கலவரத்துக்கும் தொடர்பு உள்ளதுபோல் தயாரிக்கப்பட்டுள்ளதாக கூறப்படுகிறது.

இதையடுத்து, இந்த ஆவணப் படத்தை ஒளிபரப்ப மத்திய அரசு தடை விதித்தது. இது பெரும் அரசியல் சர்ச்சையானது.

இந்நிலையில், புதுடில்லி மற்றும் மஹாராஷ்டிரா தலைநகர் மும்பையில் உள்ள, பி.பி.சி.,யின் அலுவலகங்களில், வருமான வரித் துறையினர் ஆய்வு மேற்கொண்டனர்.

கடந்த ௧௪ம் தேதி காலையில் துவங்கிய இந்த ஆய்வுப் பணி, தொடர்ந்து மூன்றாவது நாளாக நேற்றும் நடந்தது.

சர்வதேச வரி முறைகேடு மற்றும் தன் துணை நிறுவனங்களுக்குள் நிதி மாற்றத்தில், பி.பி.சி., மோசடியில் ஈடுபட்டுள்ள புகார் தொடர்பாக இந்த ஆய்வு நடத்தப்படுவதாக, வருமான வரித் துறை சார்பில் தெரிவிக்கப்பட்டுள்ளது.

இந்த ஆய்வுக்கு முழு ஒத்துழைப்பை அளித்து வருவதாக, பி.பி.சி., தரப்பில் தெரிவிக்கப்பட்டுள்ளது.

ஆனால், ஆய்வு தொடர்பாக வருமான வரித் துறை அதிகாரப்பூர்வமாக எந்த தகவலையும் வெளியிடவில்லை.

இந்த ஆய்வில், நிறுவனத்தின் நிதி தொடர்பான தகவல்கள் சேகரிக்கப்பட்டுள்ளதாக தகவல்கள் தெரிவிக்கின்றன. இந்த ஆய்வு துவங்கியதில் இருந்து, ௧௦க்கும் மேற்பட்ட நிறுவனத்தின் நிதித் துறை ஊழியர்கள் தொடர்ந்து அலுவலகத்திலேயே தங்கியுள்ளனர்.