டெல்லி துணை முதல்வர் மற்றும் கல்வித்துறை அமைச்சரான மணிஷ் சிசோடியா மீது புதிய மதுபான கொள்கையில் ஊழல் நடந்ததாக குற்றம்சாட்டப்பட்டது. மதுபான வியாபாரிகளுக்கு உரிமம் வழங்கும் டெல்லி அரசின் கொள்கை, சில வியாபாரிகளுக்கு சாதகமாக இருப்பதாக சிபிஐ குற்றம் சாட்டியது, இந்தக் குற்றச்சாட்டை ஆம் ஆத்மி கடுமையாக மறுத்தது. ஆம் ஆத்மியை உடைக்க தன்னுடன் பாஜக பேரம் பேசியதாக மணிஷ் சிசோடியா பொதுவெளியில் கூறியதைத் தொடர்ந்து, தன் மீது வீண் குற்றச்சாட்டுகள் வைக்கப்படுவதாக அவர் கூறிவருகிறார்.
அதைத் தொடர்ந்து டெல்லியில் மதுபான கடைகளுக்கு உரிமம் வழங்கியதில் முறைகேடு நடந்ததாக பதிவு செய்யப்பட்ட வழக்கு தொடர்பாக, துணை முதல்வர் மணிஷ் சிசோடியா வீடு உள்ளிட்ட 21 இடங்களில் சிபிஐ அதிகாரிகள் அதிரடியாக சோதனை நடத்தினர். அதையடுத்து மணீஷ் சிசோடியா மற்றும் 14 பேர் மீது கடந்த ஆண்டு ஆகஸ்ட் மாதம் சிறப்பு நீதிமன்றத்தில் சிபிஐ எப்ஐஆர் பதிவு செய்தது.
இந்த வழக்கில் ஆந்திரா ஆளுங்கட்சியைச் சேர்ந்த எம்பி மகுண்டா சீனிவாச ரெட்டியின் மகன் ராகவ்வையும் அமலாக்கத்துறை கைது செய்துள்ளது. அதேபோல் தெலங்கானா முதல்வரின் மகள் கவிதாவை சிபிஐ விசாரணை செய்தது குறிப்பிடதக்கது.
இந்தநிலையில் மதுக்கொள்கை விவகாரம் தொடர்பாக நேற்று ஆஜராகும் படி சிபிஐ மணிஷ் சிசோடியாவிற்கு சம்மன் அனுப்பியது. மணிஷ் சிசோடியா நேற்று டெல்லியில் உள்ள மத்திய புலனாய்வுத் துறை (சிபிஐ) தலைமையகத்தில் காலை 11 மணிக்கு ஆஜராகுமாறு கேட்டுக் கொள்ளப்பட்டார். மணீஷ் சிசோடியாவுக்கு எதிரான புதிய ஆதாரங்களின் அடிப்படையில் விசாரணைக்கு அழைக்கப்பட்டுள்ளார் என சிபிஐ வட்டாரங்கள் தெரிவித்துள்ளன. அடுத்தடுத்து கைது செய்யப்பட்ட புதிய தகவல்களின் அடிப்படையில் அவர் மீண்டும் விசாரிக்கப்படுவார் என்றும் கூறப்பட்டுள்ளது.
ஆனால் மார்ச் மாதம் டெல்லி ப்டஜெட் கூட்டத்தொடர் நடக்க இருக்கிறது. எனவே அப்பணிகளில் வேலையாக இருப்பதால் தன்னால் ஆஜராகமுடியாது எனவே கால அவகாசம் வழங்குமாறு மணிஷ் சிசோடியா நேற்று தெரிவித்தார். அதைத் தொடர்ந்து நேற்று அவருக்கு விலக்கு அளிக்கப்பட்டது.
இது குறித்து அவர் கூறும்போது, “சிபிஐ மீண்டும் என்னை விசாரணைக்கு அழைத்துள்ளது. ஒன்றிய அரசு எனக்கு எதிராக சிபிஐ, அமலாக்க துறை உள்ளிட்ட ஏஜென்சிகள் மூலம் முழு அதிகாரத்தையும் கட்டவிழ்த்துவிட்டனர். என் வீட்டில் சோதனை நடத்தினர், எனது வங்கி லாக்கரை சோதனை செய்தனர். ஆனால் இன்னும் எனக்கு எதிராக எந்த ஆதாரங்களும் கிடைக்கவில்லை.
டெல்லியின் குழந்தைகளுக்கு நான் நல்ல கல்வியை ஏற்பாடு செய்துள்ளேன். அவர்கள் அதை நிறுத்த விரும்புகிறார்கள். விசாரணைக்கு நான் எப்போதும் ஒத்துழைத்து வருகிறேன், தொடர்ந்து செய்வேன். பாஜகவினர் என்னை பழிவாங்க வேண்டுமானால் கைது செய்ய முடியும், ஆனால் டெல்லி மக்களின் பட்ஜெட்டை தடுத்து நிறுத்த முடியாது. பாஜகவுக்கு சொந்த அரசியல் இருக்கலாம், ஆனால் சிபிஐ அதிகாரிகள் எனது கோரிக்கையை செவிசாய்ப்பார்கள் என்று நான் முழு நம்பிக்கையுடன் இருக்கிறேன்.
டெல்லி மேயர் தேர்தலுக்கு நாள் குறிப்பு; இந்த முறையாவது தேர்தல் நடக்குமா.?
ஒவ்வொரு கேள்விக்கும் பதில் சொல்வேன், ஓடிப்போகவில்லை. பட்ஜெட் பணிகள் தேக்கமடையும் என்று தான் சொல்கிறேன். அதனால்தான் பிப்ரவரி இறுதி வரை சிபிஐயிடம் கால அவகாசம் கேட்டுள்ளேன்” என்று மணிஷ் சிசோடியா கூறினார். இந்தநிலையில் வருகிற 26ம் தேதி கண்டிப்பாக விசாரணைக்கு ஆஜராக சிபிஐ உத்தரவிட்டுள்ளது.