அதிமுக பொதுக்குழு வழக்கில் அதிரடியான தீர்ப்பு வழங்கியுள்ளது உச்ச நீதிமன்றம். எட்டு மாதங்களுக்கும் மேலாக அதிமுகவில் நிலவி வந்த உட்கட்சி மோதலை முடிவுக்கு கொண்டு வரும் வகையில் தீர்ப்பு வெளியாகியுள்ளது.
இடைக்கால பொதுச் செயலாளராக
எடப்பாடி பழனிசாமி
தேர்ந்தெடுக்கப்பட்டது செல்லும் என்றும், அதிமுகவிலிருந்து ஓபிஎஸ் மற்றும் அவரது ஆதரவாளர்கள் நீக்கப்பட்டதும் செல்லும் என்றும் உச்ச நீதிமன்ற தீர்ப்பின் மூலம் தெரியவந்துள்ளது.
எடப்பாடி பழனிசாமிக்கு அளவற்ற மகிழ்ச்சியளிக்கும் தீர்ப்பாகவும், ஓ.பன்னீர் செல்வத்துக்கு பெரும் அதிர்ச்சியளிக்கும் தீர்ப்பாகவும் இது அமைந்துள்ளது.
காலை 10.30 மணிக்கு இந்த தீர்ப்பு வெளியான போது எடப்பாடி பழனிசாமி, ஓ.பன்னீர் செல்வம் ஆகியோரது எண்ணவோட்டம் எப்படி இருந்தது, அவர்கள் இதை எப்படி எதிர்கொண்டனர் என்பது குறித்து விசாரித்தோம்.
எடப்பாடி பழனிசாமி ரியாக்ஷன் இது தான்!
எடப்பாடி பழனிசாமி ஏற்கெனவே திட்டமிட்டபடி ஆர்.பி.உதயகுமார் ஏற்பாடு செய்திருந்த 51 ஜோடி திருமண விழாவிற்கு மதுரை சென்றிருந்தார். ஆர்.பி.உதயகுமாரின் மகளின் திருமணத்தோடு ஐம்பது ஜோடிகளின் திருமணம் நடைபெற்றதால் பிரம்மாண்ட மாநாடு போல் விழா ஏற்பாடு செய்யப்பட்டிருந்தது.
எடப்பாடி பழனிசாமியை மேடைக்கு அழைத்துச் செல்லும் சமயத்தில் உச்ச நீதிமன்ற தீர்ப்பு சாதகமாக வந்துள்ளது என்ற செய்தியை ஆர்.பி.உதயகுமார் எடப்பாடி பழனிசாமியிடம் கூறினார். இதனால் எடப்பாடியின் முகத்தில் மகிழ்ச்சியின் ரேகை மேலும் படர்ந்தது.
ஓபிஎஸ் ரியாக்ஷன் என்ன?
தீர்ப்பு வெளியாகும் நாளில் சென்னையில் இருக்க வேண்டாம் என்று ஓ.பன்னீர் செல்வம் தனது சொந்த ஊரான பெரியகுளத்திற்கு சென்றுவிட்டார். அங்கிருந்து இன்று காலையில் தேனி சென்று தனியார் மருத்துவமனையில் சிகிச்சை பெற்று வரும் தனது தாயாரின் உடல்நிலை குறித்து விசாரித்தார்.
அதன்பின்னர் பெரியகுளம் வீட்டுக்கு காலை 9 மணியளவில் வந்த ஓபிஎஸ் அதன் பின்னர் வெளியே வரவில்லை. அந்த வீட்டில் அவரது உதவிக்கு ஓரிருவரை தவிர வேறு யாரும் இல்லை. அவரது ஆதரவாளர்கள் யாரும் அவரை காணவரவில்லை. தொலைக்காட்சியில் தீர்ப்பு தொடர்பான செய்திகளை பார்த்தபடியே இருந்தார். அப்போது தான் கட்சியிலிருந்து அவர் நீக்கப்பட்டது செல்லும் என்ற அறிவிப்பு வெளியானது. அதைத் தொடர்ந்து தனது வழக்கறிஞர்களிடம் ஓபிஎஸ் தொலைபேசியில் வழக்கு தொடர்பாக பேசினார்.