அயோத்தி – பாபர் மசூதி, முத்தலாக் தடை, பண மதிப்பிழப்பு, தனிநபர் ரகசியம் அடிப்படை உரிமை போன்ற முக்கிய வழக்குகளில் தீர்ப்பு வழங்கிய உச்ச நீதிமன்ற அமர்வில் இடம்பெற்றவர் உச்சநீதிமன்ற முன்னாள் நீதிபதி சையது அப்துல் நசீர்.
சர்ச்சைக்குரிய அயோத்தி வழக்கை விசாரித்த அரசியல் சாசன அமர்வில் இடம்பெற்றிருந்த ஒரே முஸ்லிம் நீதிபதி இவர் ஆவார். கர்நாடக உயர் நீதிமன்ற நீதிபதியாக பணியாற்றி 2017ல் உச்ச நீதிமன்ற நீதிபதியாக பதவி உயர்வு பெற்றார். முத்தலாக் சர்ச்சையில் தீர்ப்பு வழங்கிய முழு பெஞ்சில் நீதிபதி நசீரும் இருந்தார். முத்தலாக்கை தடை செய்யும் பெரும்பான்மை தீர்ப்பை எதிர்த்த இரண்டு நீதிபதிகளில் இவரும் ஒருவர்.
இந்தநிலையில் நீதிபதி நசீரை பாஜக சார்பானவர் என சமூக ஆர்வலர்களும் எதிர்கட்சிகளும் குற்றம்சாட்டி வந்தனர். மேலும் முஸ்லீம் நீதிபதியை வைத்தே அயோத்தி பாபர் மசூதி இடிப்பு, முத்தலாக் தடை சட்டம் ஆகியவற்றில் தீர்ப்பு வழங்க வைத்ததாக பாஜக மீது அரசியல் விமர்சகர்கள் கருத்து தெரிவித்தனர். இந்தநிலையில் இந்திய குடியரசு தலைவர் திரௌபதி முர்மு, கடந்த பிப்ரவரி 12 அன்று நீதிபதி நசீரை ஆந்திராவின் ஆளுநராக நியமித்து உத்தரவிட்டார்.
பாஜகவிற்கு விசுவாசமாக இருக்கும் நீதிபதிகளை மாநிலத்தின் ஆளுநராக நியமிப்பது பாஜகவின் வழக்கம் என ஜனநாயகவாதிகள் குற்றம்சாட்டி வந்தநிலையில், நீத்பதி நசீர் ஆந்திர ஆளுநராக நியமிக்கப்பட்டது அக்குற்றச்சாட்டை உண்மையாக மாற்றியதாக அவர்கள் கூறிவருகின்றனர்.
இந்தநிலையில் ஆந்திர மாநில ஆளுநராக உச்ச நீதிமன்ற முன்னாள் நீதிபதி எஸ் அப்துல் நசீர் இன்று பதவியேற்றார். விஜயவாடாவில் உள்ள ராஜ்பவனில் நடைபெற்ற விழாவில், ஆந்திர மாநில உயர்நீதிமன்ற தலைமை நீதிபதி பிரசாந்த் குமார் மிஸ்ரா, நீதிபதி நசீருக்கு பதவிப் பிரமாணம் செய்து வைத்தார்.
இந்த விழாவில் முதல்வர் ஜெகன் மோகன் ரெட்டி, எதிர்க்கட்சித் தலைவர் சந்திரபாபு நாயுடு, அமைச்சர்கள், நீதிபதிகள், உயர் அதிகாரிகள் கலந்து கொண்டனர். பதவியேற்பு முடிந்ததும் புதிய ஆளுநருக்கு தலைவர்கள் மற்றும் அதிகாரிகள் வாழ்த்து தெரிவித்தனர்.
ஆந்திர முன்னாள் ஆளுநர் பிஸ்வா பூசன் ஹரிசந்தன் சத்தீஸ்கர் ஆளுநராக மாற்றப்பட்ட பிறகு முன்னாள் நீதிபதி நசீர் இன்று பதவியேற்றார். ஒடிசாவைச் சேர்ந்த பாஜக மூத்த தலைவரான ஹரிசந்தன், கடந்த 2019ம் ஆண்டு ஜூலையில் ஆந்திராவின் ஆளுநராகப் பதவியேற்றார்.
ரோகிணி சிந்தூரி ஐஏஎஸ், டி.ரூபா ஐபிஎஸ் ட்ரான்ஸ்பர்; சீக்ரெட் போட்டோ லீக்… கர்நாடக அரசு அதிரடி!
கடந்த புதன்கிழமை, முதல்வர் ஜெகன் மோகன் ரெட்டி, கவர்னர் ஹரிசந்தன் மற்றும் அவரது மனைவிக்கு கன்னவரம் விமான நிலையத்தில் அன்புடன் அனுப்பினார். பதவி விலகிய ஆளுநரும் அவரது மனைவியும் பின்னர் ராய்ப்பூருக்கு விமானம் மூலம் சென்றனர். பிப்ரவரி 12ஆம் தேதி மத்திய அரசு சத்தீஸ்கர் ஆளுநராக ஹரிசந்தனை நியமித்தது.