காங்கிரஸ் நிகழ்த்தும் சாதனை : ஈரோடு கிழக்கில் யாரும் செய்யாதது இது!

ஈரோடு கிழக்கு இடைத்தேர்தலில் ஐந்து சுற்று வாக்குகள் எண்ணிக்கை நிறைவடைந்து ஆறாம் சுற்று வாக்குகள் எண்ணப்பட்டு வருகின்றன. மொத்தம் 15 சுற்றுக்களாக வாக்கு எண்ணிக்கை நடைபெறும் என தெரிவிக்கப்பட்டுள்ளது.

ஐந்து சுற்றுகள் முடிவில்
காங்கிரஸ்
வேட்பாளர் ஈவிகேஎஸ் இளங்கோவன் 39, 751 வாக்குகளும், அதிமுக வேட்பாளர் கே.எஸ்.தென்னரசு 13,574 வாக்குகளும், நாம் தமிழர் வேட்பாளர் மேனகா 2,629 வாக்குகளும், தேமுதிக வேட்பாளர் 386 வாக்குகளும் பெற்றுள்ளனர்.

ஐந்து சுற்றுகள் முடிவில் காங்கிரஸ் வேட்பாளர் 26,177 வாக்குகள் முன்னிலையில் உள்ளார். அடுத்தடுத்த சுற்றுகளில் இதே நிலை நீடிக்கும் பட்சத்தில் காங்கிரஸ் இந்த தேர்தலில் ஈரோடு கிழக்கு தொகுதியில் அதிக வாக்குகள் வித்தியாசத்தில் வெற்றி பெற்ற கட்சி என்ற சாதனையை புரியக்கூடும்.

ஒருங்கிணைந்த ஈரோடு சட்டமன்ற தொகுதியை பிரித்து ஈரோடு கிழக்கு தொகுதி 2008ஆம் ஆண்டு உருவாக்கப்பட்டது. தொகுதி பிரிக்கப்பட்ட பின்னர் நடைபெற்ற முதல் சட்டமன்ற பொதுத் தேர்தல் 2011ஆம் ஆண்டு நடைபெற்றது. அந்த தேர்தலில் அதிமுக கூட்டணியில் இணைந்து போட்டியிட்ட தேமுதிக 10,644 வாக்குகள் வித்தியாசத்தில் வெற்றி பெற்றது.

2016 சட்டமன்ற பொதுத் தேர்தலில் அதிமுக போட்டியிட்டு 7794 வாக்குகள் வித்தியாசத்தில் வெற்றி பெற்றது. 2021 சட்டமன்றத் தேர்தலில் திமுக கூட்டணியில் இடம்பெற்ற காங்கிரஸ் போட்டியிட்டு 8,904 வாக்குகள் வித்தியாசத்தில் வெற்றி பெற்றது.

அதிமுக, திமுக இரு கட்சிகளும் இந்த தொகுதியில் கிட்டதட்ட சம பலத்தில் இருப்பதாலே வெற்றி மாறி மாறி வந்தாலும் வாக்கு வித்தியாசம் என்பது பத்தாயிரம் அல்லது அதற்கு குறைவாகவே இருந்துள்ளது.

அண்மைச் செய்திகளை உடனுக்குடன் படிக்க கூகுள் நியூஸில் தமிழ் சமயம் இணையதளத்தை பின் தொடரவும்

இந்நிலையில் 2023 ஈரோடு கிழக்கு இடைத்தேர்தலில் தற்போதைய நிலவரப்படி காங்கிரஸ் வேட்பாளர் 26 ஆயிரம் வாக்குகள் முன்னிலை வகிப்பது கவனம் பெற்று வருகிறது. இன்னும் பத்து சுற்றுகள் வாக்குகள் எண்ணப்பட உள்ள நிலையில் வாக்கு வித்தியாசம் மேலும் அதிகரிக்கும் என எதிர்பார்க்கப்படுகிறது.