டெல்லி துணை முதல்வராக இருந்த மணிஷ் சிசோடியாவிற்கு மேலும் 2 நாள் காவலை நீட்டித்து சிபிஐ நீதிமன்றம் உத்தரவிட்டுள்ளது.
கடந்த 2015ம் ஆண்டில் இருந்து 2023 பிப்ரவரி மாதம் வரை டெல்லியின் துணை முதல்வராக ஆம் ஆத்மி கட்சியின் மூத்த தலைவர் மணிஷ் சிசோடி இருந்தார். இந்தநிலையில் டெல்லியில் புதிய மதுபானக் கொள்கை கடந்த 2020ஆம் ஆண்டில் முன்மொழியப்பட்டது. அதன் பிறகு, 2021ஆம் ஆண்டின் இறுதியில் இந்த கொள்கையானது நடைமுறைக்கு கொண்டுவரப்பட்டது.
அதைத் தொடர்ந்து வருமானத்தை அதிகரிக்கவும், மதுபான விற்பனை நிலையங்களின் சமமான விநியோகத்தை உறுதி செய்வதற்கும், கள்ளச்சந்தை மற்றும் மாஃபியா ஆகியவற்றுக்கு முற்றுப்புள்ளி வைக்கவும் டெல்லியை 32 மண்டலங்களாகப் பிரித்து அதில் ஒவ்வொரு மண்டலத்திற்கும் 27 மதுபான விற்பனை கடைகள் வைக்கப்பட்டது. தனியார் பார்கள் மட்டும் நகரத்திற்கு வெளியே இயக்கப்பட்டது.
இந்தநிலையில் டெல்லி அரசின் 2021-22ம் ஆண்டுக்கான புதிய மதுபானக் கொள்கையில் பல்வேறு முறைகேடுகள் நடந்துள்ளதாக கடந்தாண்டு ஜூலை மாதம் டெல்லியின் துணைநிலை ஆளுநர் வி.கே.சக்சேனா, டெல்லி கலால் கொள்கை 2021-22ஆம் ஆண்டு குறித்து சிபிஐ விசாரணைக்கு பரிந்துரைத்தார். அதையடுத்து துணை முதல்வர் மணிஷ் சிசோடியா உட்பட 15 பேர் மீது சிபிஐ வழக்குப்பதிந்தது.
மேலும் மணிஷ் சிசோடியா வீடு மற்றும் அலுவலகங்களில் சோதனை நடத்தப்பட்டது. ஆனால் எந்தவித ஆதாரங்களையும் சிபிஐ கைப்பற்றவில்லை என கூறப்படுகிறது. மேலும் இந்த வழக்கில் தெலங்கானா முதல்வரின் மகள் கவிதா மற்றும் ஆந்திர ஆளும் ஒய்.எஸ்.ஆர். காங்கிரஸ் எம்.பி. ஸ்ரீனிவாசலு ரெட்டி மற்றும் அவரது மகன் மகுந்தா ராகவா ரெட்டி உள்ளிட்டவர்கள் மீது குற்றஞ்சாட்டப்பட்டுள்ளது.
இந்தநிலையில் கடந்த 26ம் தேதி மணிஷ் சிசோடியாவை சுமார் 8 மணி நேரம் விசாரணை நடத்திய சிபிஐ, அவரை கைது செய்தது. அதைத் தொடர்ந்து கடந்த செவ்வாய்கிழமை அவர் தனது ராஜினாமா கடிதத்தை முதல்வர் அரவிந்த் கெஜ்ரிவாலிடம் அளித்தார். இந்த சூழலில் ஜாமீன் கேட்டு மணிஷ் சிசோடியா விண்ணப்பித்த நிலையில், அவரை மேலும் 2 நாட்கள் சிபிஐ காவலில் வைக்க நீதிமன்றம் இன்று தீர்ப்பளித்தது.
டெல்லி மதுபானக் கொள்கை வழக்கில் விசாரணைக்கு உட்படுத்தப்பட்ட ஆம் ஆத்மி கட்சித் தலைவர் மணிஷ் சிசோடியா ஜாமீன் கோரி சிபிஐ நீதிமன்றத்தில் விண்ணப்பித்திருந்தார். மணீஷ் சிசோடியாவின் ஐந்து நாள் காவலின் முடிவில் அவரை இன்று மதியம் 2 மணி அளவில் நீதிமன்றத்தில் ஆஜர்படுத்தபட்டார்.
திரிபுரா தேர்தல் 2023;காங்கிரஸ் கூட்டணியை ஓடவிட்ட பழங்குடியினர் கட்சி.!
அதன்படி டெல்லியில் உள்ள சிபிஐ தலைமையகத்திற்கு வெளியே டெல்லி போலீஸ், விரைவு அதிரடிப் படை மற்றும் மத்திய ரிசர்வ் போலீஸ் படைகள் நிறுத்தப்பட்டன. இந்த வழக்கில் அனைத்து மீட்டெடுப்புகளும் ஏற்கனவே செய்யப்பட்டுள்ளதால், தன்னை காவலில் வைத்திருப்பது எந்தப் பலனையும் அளிக்காது என்று மணிஷ் சிசோடியா தனது ஜாமீன் கோரிக்கையில் கூறினார். ஆனால் வழக்கில் முகாந்திரம் இருப்பதாக கருதிய சிபிஐ நீதிமன்றம், அவரது காவலை மேலும் 2 நாட்களுக்கு நீட்டித்து உத்தரவிட்டுள்ளது.