பனிப்பொழிவு குறைந்து நாளுக்கு நாள் வெப்பநிலை உயர்ந்து வருகிறது. மார்ச் மாதமே வெயில் வாட்டி வதைக்க தொடங்கியுள்ள நிலையில் ஏப்ரல், மே மாதங்களில் மக்கள் கோடை வெப்பம் இன்னும் அதிகமாக இருக்கும் என எதிர்பார்க்கப்படுகிறது.
வெயிலில் காய்ந்து வரும் மக்களுக்கு நற்செய்தியாக மழை பற்றிய முன்னறிவிப்பை வெளியிட்டுள்ளது சென்னை வானிலை ஆய்வு மையம். அதிலும் குறிப்பாக தென் தமிழக மாவட்டங்களில் இன்று முதல் மார்ச் 11ஆம் தேதி (சனிக் கிழமை) வரை லேசானது முதல் மிதமான மழைக்கு வாய்ப்பு உள்ளதாக தெரிவிக்கப்பட்டுள்ளது.
சென்னை வானிலை ஆய்வு மையம் இன்று (மார்ச் 8 )வெளியிட்ட அறிவிப்பில், “கிழக்கு திசை காற்றின் வேக மாறுபாடு காரணமாக, 08.03.2023 முதல் 10.03.2023 வரை: தென்தமிழக மாவட்டங்கள், டெல்டா மாவட்டங்கள், அதனை ஒட்டிய மாவட்டங்கள் மற்றும் காரைக்கால் பகுதிகளில் ஓரிரு இடங்களில் லேசானது முதல் மிதமான மழை பெய்யக்கூடும்.
11.03.2023 (சனிக் கிழமை): தென்தமிழக மாவட்டங்களில் ஓரிரு இடங்களில் லேசான / மிதமான மழை பெய்யக்கூடும்.
12.03.2023 (ஞாயிற்றுக் கிழமை): தமிழ்நாடு, புதுச்சேரி மற்றும் காரைக்கால் பகுதிகளில் பொதுவாக வறண்ட வானிலை நிலவக்கூடும்.
சென்னை மற்றும் புறநகர் பகுதிகளுக்கான வானிலை முன்னறிவிப்பு:
அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 32-33 டிகிரி செல்சியஸ் மற்றும் குறைந்தபட்ச வெப்பநிலை 22-23 டிகிரி செல்சியஸ் அளவில் இருக்கக்கூடும்.
கடந்த 24 மணி நேரத்தில் பதிவான மழை அளவு
(சென்டிமீட்டரில்): ஏதுமில்லை.
மீனவர்களுக்கான எச்சரிக்கை:
ஏதுமில்லை.” என்று தெரிவிக்கப்பட்டுள்ளது.