சென்னையில் முதல்கட்ட மெட்ரோ ரயில் திட்டத்தின் கீழ் பச்சை (சென்னை சென்ட்ரல் – பரங்கிமலை) மற்றும் நீல நிற (விம்கோ நகர் பணிமனை – விமான நிலையம்) ஆகிய இரண்டு வழித்தடங்களில் ரயில்கள் இயக்கப்பட்டு வருகின்றன. அடுத்தகட்டமாக ஊதா (மாதவரம் பால் பண்ணை – சிறுசேரி சிப்காட்), காவி (கலங்கரை விளக்கம் – பூவிருந்தவல்லி புறவழிச்சாலை), சிவப்பு (மாதவரம் பால் பண்ணை – சோழிங்கநல்லூர்) ஆகிய மூன்று வழித்தடங்களில் ரயில்கள் இயக்கப்பட உள்ளன.
சென்னை மெட்ரோ ரயில்
இதற்கான வேலைகள் மும்முரமாக நடந்து வரும் சூழலில் 2026ஆம் ஆண்டு பயன்பாட்டிற்கு வரும் எனத் தெரிவிக்கப்பட்டுள்ளது. இந்நிலையில் பச்சை மற்றும் நீல நிற வழித்தடங்களில் பயணிகளின் எண்ணிக்கை நாளுக்கு நாள் அதிகரித்து வருகிறது. தற்போது தினசரி சராசரி பயணிகளின் எண்ணிக்கை 2.5 லட்சமாக இருக்கிறது. இது வார இறுதியில் மேலும் அதிகரிக்கிறது.
பயணிகள் வருகை
குறிப்பாக பீக் ஹவர்களில் மாநகரப் பேருந்துகளில் அலைமோதும் கூட்டத்தை போல மெட்ரோ ரயில்கள் மற்றும் ரயில் நிலையங்களில் மூச்சு முட்டும் அளவிற்கு கூட்டம் நிரம்பி வழிகிறது. இதனால் அலுவலகம் செல்வோர், பெண்கள் சிரமத்திற்கு ஆளாகின்றனர். எனவே முதல் தர பெட்டிகளை (First Class Coach) அறிமுகம் செய்ய வேண்டும் என்று கோரிக்கை விடுத்துள்ளனர்.
முதல் தர பெட்டிகள்
இதன்மூலம் சிரமமின்றி பயணிக்க முடியும் எனக் குறிப்பிட்டுள்ளனர். முதல் தர பெட்டிகள் என்றால் வழக்கமான மெட்ரோ ரயில் கட்டணத்தை விட இருமடங்கு கட்டணம் என்பது கவனிக்கத்தக்கது. முன்னதாக சென்னையில் மெட்ரோ ரயில்கள் அறிமுகம் செய்யப்பட்ட போது முதல் தர பெட்டிகள் பயன்பாட்டில் இருந்தன. கொரோனா நெருக்கடி ஏற்பட்ட போது முதல் தர பெட்டிகளை பெண்களுக்கான பிரத்யேக பெட்டிகளாக மாற்றி விட்டது.
பீக் ஹவர் பயணம்
இதுதொடர்பாக அண்ணா நகரை சேர்ந்த பயணி ஒருவர் கூறுகையில், அண்ணா நகரில் இருந்து சென்ட்ரல் செல்லும் போது பீக் ஹவர்களில் மெட்ரோ ரயிலில் கூட்டம் இருக்காது. ஆனால் சென்ட்ரலுக்கு பிறகு கூட்டம் நிரம்பி வழிய ஆரம்பித்துவிடும். நிற்கக் கூட இடம் இருக்காது. அண்ணா சாலை வழியாக பயணிக்கும் போது ஒவ்வொரு ரயில் நிலையத்திலும் ஏராளமான ரயிலில் ஏறுவர்.
மீண்டும் கோரிக்கை
இதனால் நெருக்கடி அதிகரித்து விடுகிறது. எனவே மெட்ரோ ரயில்களின் எண்ணிக்கையை அதிகப்படுத்த வேண்டும். இல்லையெனில் முதல் தர பெட்டிகளை மீண்டும் அறிமுகம் செய்ய வேண்டும். எங்களுக்கு பயணம் செய்ய மிகவும் சிரமமாக உள்ளது என்றார். மேலும் சிலர் கூறுகையில், மெட்ரோ ரயில்களில் தற்போது புறநகர் ரயில்களை போல கூட்டம் ததும்பி கொண்டிருக்கிறது.
6 பெட்டி ரயில்
இதனால் நாங்கள் வழக்கமாக புறப்படும் நேரத்தை விட ஒருமணி நேரம் முன்னதாகவே ரயில் நிலையத்திற்கு வந்துவிடுவதாக கூறுகின்றனர். சென்னை மெட்ரோ ரயில் நிர்வாகத்தை (CMRL) சேர்ந்த அதிகாரிகள் கூறுகையில், புதிதாக 6 பெட்டிகள் சேர்க்கப்பட்ட ரயில்களை பயன்பாட்டிற்கு கொண்டு வரும் திட்டமுள்ளது. தற்போது 4 பெட்டிகள் கொண்ட 42 ரயில்கள் இயக்கப்பட்டு வருகின்றன. இந்த எண்ணிக்கையை 52 வரை உயர்த்தலாம்.
விரிவான ஆய்வு
நாளுக்கு நாள் அதிகரித்து வரும் பயணிகளால் 2.5 நிமிடங்களுக்கு ஒரு ரயில் இயக்க வேண்டிய தேவை ஏற்பட்டுள்ளது. இதுதொடர்பாக விரிவாக ஆலோசிக்கப்பட்டு வருகிறது. ஒப்பந்த நிறுவனம் மூலம் ஆய்வுகள் நடந்து கொண்டிருக்கின்றன. இதன் முடிவுகள் வெளியான உடன் உரிய நடவடிக்கைகள் எடுக்கப்படும். ஆனால் முதல் தர பெட்டிகளை மீண்டும் அறிமுகம் செய்வது சாத்தியமல்ல. இதில் பயணிக்கும் பயணிகள் மிகவும் குறைவு தான் என்று கூறினர்.